ചെത്തുകടവ് പാലം സര്‍വീസ് റോഡ് പ്രവൃത്തി ഉദ്ഘാടനം ചെയ്തു
കോഴിക്കോട് കുന്ദമംഗലം ഗ്രാമപഞ്ചായത്തിലെ ചെത്തുകടവ് മുഹമ്മദ് അബ്ദുറഹ്‌മാന്‍ പാലം സര്‍വീസ് റോഡിന്റെ നവീകരണ പ്രവൃത്തി പി ടി എ റഹീം എംഎല്‍എ ഉദ്ഘാടനം ചെയ്തു. എംഎല്‍എ ഫണ്ടില്‍നിന്ന് അനുവദിച്ച 77.55 ലക്ഷം രൂപ വിനിയോഗിച്ചുള്ള പദ്ധതിയുടെ മൂന്നാംഘട്ട പ്രവൃത്തികള്‍ക്കാണ് തുടക്കമായത്. പുഴയുടെ ഭാഗത്ത് സംരക്ഷണഭിത്തി നിര്‍മാണം, അഴുക്കുചാല്‍ നിര്‍മാണം, റോഡ് വീതികൂട്ടല്‍, സൈന്‍ ബോര്‍ഡുകള്‍ സ്ഥാപിക്കല്‍, ടാറിങ് തുടങ്ങിയ പ്രവൃത്തികളാണ് നടത്തുന്നത്. റോഡിന്റെ നവീകരണം പൂര്‍ത്തിയാകുന്നതോടെ താമരശ്ശേരി വരിട്ട്യാക്കില്‍ റോഡിലേക്കുള്ള ബൈപാസായി ഇത് മാറും.
ചടങ്ങില്‍ കുന്ദമംഗലം ഗ്രാമപഞ്ചായത്ത് പ്രസിഡന്റ് ലിജി പുല്‍ക്കുന്നുമ്മല്‍ അധ്യക്ഷയായി. ഗ്രാമപഞ്ചായത്ത് വൈസ് പ്രസിഡന്റ് വി അനില്‍കുമാര്‍, ജില്ലാ പഞ്ചായത്ത് അംഗം എം ധനീഷ്‌ലാല്‍, ബ്ലോക്ക് മെമ്പര്‍ എന്‍ ഷിയോലാല്‍, ഗ്രാമപഞ്ചായത്ത് ആരോഗ്യ-വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ ചന്ദ്രന്‍ തിരുവലത്ത്, ഗ്രാമപഞ്ചായത്ത് അംഗം ലീന വാസുദേവന്‍, അസി. എക്‌സിക്യൂട്ടീവ് എഞ്ചിനീയര്‍ എന്‍ പി ഷിനി, എക്‌സിക്യൂട്ടീവ് എഞ്ചിനീയര്‍ സി എസ് അജിത്, അസി. എഞ്ചിനീയര്‍ എന്‍ ബൈജു എന്നിവര്‍ സംസാരിച്ചു.
