വികസന നേട്ടങ്ങള്‍ ജനങ്ങളിലെത്തിച്ച് ചേളന്നൂര്‍ ഗ്രാമപഞ്ചായത്ത് വികസന സദസ്സ്
സംസ്ഥാന സര്‍ക്കാരിന്റെയും ഗ്രാമപഞ്ചായത്തിന്റെയും വികസന-ക്ഷേമ പ്രവര്‍ത്തനങ്ങള്‍ ജനങ്ങളിലെത്തിക്കാന്‍ കോഴിക്കോട് ചേളന്നൂര്‍ ഗ്രാമപഞ്ചായത്തില്‍ സംഘടിപ്പിച്ച വികസന സദസ്സ് ബ്ലോക്ക് പഞ്ചായത്ത് പ്രസിഡന്റ് കെ പി സുനില്‍ കുമാര്‍ ഉദ്ഘാടനം ചെയ്തു. ഹരിതകര്‍മ സേന അംഗങ്ങള്‍ക്കുള്ള ആദരവും അദ്ദേഹം നിര്‍വഹിച്ചു.
ചേളന്നൂര്‍ ലീല അപ്പാര്‍ട്ട്‌മെന്റില്‍ നടന്ന ചടങ്ങില്‍ വാര്‍ഡ് മെമ്പര്‍ എന്‍ രമേശന്‍ അധ്യക്ഷനായി. പ്രോഗ്രസ് റിപ്പോര്‍ട്ട് ബ്ലോക്ക് പഞ്ചായത്ത് സ്ഥിരം സമിതി അധ്യക്ഷ സുജ അശോകന്‍ പ്രകാശനം ചെയ്തു.സംസ്ഥാന സര്‍ക്കാരിന്റെ നേട്ടങ്ങളുടെ അവതരണം ബ്ലോക്ക് പഞ്ചായത്ത് ബിഡിഒ കെ അബിനേഷ് കുമാറും പഞ്ചായത്തിന്‍േറത് സെക്രട്ടറി കെ മനോജ് കുമാറും നിര്‍വഹിച്ചു. ജില്ലാ പഞ്ചായത്ത് അംഗം ഇ ശശീന്ദ്രന്‍, ചേളന്നൂര്‍ ബ്ലോക്ക് പഞ്ചായത്ത് മെമ്പര്‍മാരായ ഷീന ചെറുവത്ത്, എന്‍ ഫാസില്‍, വാര്‍ഡ് മെമ്പര്‍മാരായ ടി വത്സല, എം കെ രാജേന്ദ്രന്‍, ഗ്രാമപഞ്ചായത്ത് അസി. സെക്രട്ടറി ഷീജകുമാരി, സിഡിഎസ് ചെയര്‍പേഴ്‌സണ്‍ ടി പി ബിനിഷ, വിവിധ രാഷ്ട്രീയപാര്‍ട്ടി പ്രതിനിധികള്‍, ഉദ്യോഗസ്ഥര്‍ എന്നിവര്‍ പങ്കെടുത്തു.
തുടര്‍ന്ന് ഗ്രാമപഞ്ചായത്തിന്റെ ഭാവി വികസന പ്രവര്‍ത്തനങ്ങള്‍ക്കുള്ള ആശയങ്ങളും നിര്‍ദേശങ്ങളും പൊതുജനങ്ങള്‍ അവതരിപ്പിച്ചു. ഗ്രാമപഞ്ചായത്തിനു കീഴില്‍ തൊഴില്‍ പരിശീലന സംവിധാനവും കളി സ്ഥലങ്ങളും ഒരുക്കണമെന്നും പഞ്ചായത്തുകള്‍ക്ക് കീഴില്‍ പൊതുശ്മശാനം, 60 വയസ്സ് കഴിഞ്ഞവര്‍ക്ക് സാന്ത്വന കേന്ദ്രം, ടൗണ്‍ഷിപ്പ്, കര്‍ഷകരുടെ ഉല്‍പ്പന്നങ്ങള്‍ വിറ്റഴിക്കുന്നതിന് കേന്ദ്രീകൃത ചന്ത എന്നിവ ആരംഭിക്കണമെന്നുമുള്ള നിര്‍ദേശങ്ങള്‍ ചര്‍ച്ചയില്‍ ഉയര്‍ന്നു. വികസന വീഡിയോയുടെ പ്രദര്‍ശനം, പ്രാദേശിക കലാകാരന്മാര്‍ അവതരിപ്പിച്ച കലാപരിപാടി, സാംസ്‌കാരിക സദസ്സ് എന്നിവയും ഉണ്ടായി.
