കാലവര്‍ഷം ശക്തമാകാനുള്ള സാധ്യത മുന്നില്‍കണ്ട് പുനരധിവാസം ഉള്‍പ്പെടെ ജാഗ്രതയോടെ നടപ്പാക്കും: ജില്ലാ കളക്ടര്‍
പത്തനംതിട്ട : ബംഗാള്‍ ഉള്‍ക്കടലില്‍ രൂപംകൊണ്ട ന്യൂനമര്‍ദത്തെ തുടര്‍ന്ന് ആഗസ്റ്റ് 10 വരെയുള്ള ദിവസങ്ങളില്‍ കേരളത്തില്‍ മഴ ശക്തമാകാന്‍ സാധ്യതയുണ്ടെന്ന കേന്ദ്ര കാലാവസ്ഥ നിരീക്ഷണ കേന്ദ്രത്തിന്റെ മുന്നറിയിപ്പ് കണക്കിലെടുത്ത് ജില്ലയിലെ ആര്‍.ഡി.ഒ, തഹസില്‍ദാര്‍മാര്‍, വില്ലേജ് ഓഫീസര്‍മാര്‍ തുടങ്ങിയവര്‍ സാഹചര്യം മുന്നില്‍കണ്ട് 24 മണിക്കൂറും ജാഗ്രതയോടെ പ്രവര്‍ത്തിക്കണമെന്ന് ജില്ലാ കളക്ടര്‍ പി.ബി നൂഹ് പറഞ്ഞു. ജില്ലയിലെ നദികളിലെ ജലനിരപ്പ് ഉയരുന്ന സ്ഥലങ്ങളിലേയും ഉരുള്‍പ്പൊട്ടല്‍ സാധ്യതയുള്ള മേഖലകളിലേയും ജനങ്ങളെ യഥാസമയം പുനരധിവസിപ്പിക്കുന്നതിനും ഈ ഉദ്യോഗസ്ഥര്‍ ജാഗ്രതയോടെ പ്രവര്‍ത്തിക്കണമെന്നും കളക്ടര്‍ നിര്‍ദേശിച്ചു.
നിലവിലെ കാലാവസ്ഥ സാഹചര്യം വിലയിരുത്താന്‍ ഉദ്യോഗസ്ഥരുമായി നടത്തിയ വീഡിയോ കോണ്‍ഫറന്‍സില്‍ സംസാരിക്കുകയായിരുന്നു കളക്ടര്‍.
ജില്ലയിലെ കണ്‍ട്രോള്‍ റൂമുകള്‍ പൂര്‍ണ്ണ സജ്ജമാക്കി നിര്‍ത്തും. ഡാമുകളിലെ ജലനിരപ്പ് യഥാസമയം കണക്കിലെടുത്ത് ആവശ്യമെങ്കില്‍ ഷട്ടര്‍ തുറക്കും. പമ്പ ഡാമില്‍ കഴിഞ്ഞ 24 മണിക്കൂറിനുള്ളില്‍ 10 ശതമാനം ജലനിരപ്പ് ഉയര്‍ന്നു. കക്കിയിലും സമാനമായി ജല നിരപ്പ് ഉയര്‍ന്നു. ആറ് ദിവസത്തോളം ശക്തമായ മഴ തുടര്‍ന്നാല്‍ എല്ലാ ഡാമുകളുടെയും ഷട്ടര്‍ തുറക്കേണ്ടതായി വരും. ഇപ്പോള്‍തന്നെ പമ്പ, അച്ചന്‍കോവില്‍, മണിമല നദികളില്‍ ഇതുവരെ പെയ്ത മഴയില്‍ ജലനിരപ്പ് ഉയര്‍ന്നിട്ടുണ്ട്.
കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ് പ്രകാരം ന്യൂനമര്‍ദത്തെ തുടര്‍ന്ന് പശ്ചിമഘട്ട മലനിരകളില്‍ ശക്തമായ മഴയ്ക്കും കാറ്റിനും സാധ്യത ഉണ്ട്. പശ്ചിമഘട്ട മലനിരകളോട് ചേര്‍ന്നാണ് പമ്പ, അച്ചന്‍കോവില്‍, മണിമല നദികളിളുടെ കൈവഴികളായ നീര്‍ചാലുകള്‍ എത്തുന്നത്. കോന്നി, റാന്നി താലൂക്കുകളില്‍ ഉറുള്‍പൊട്ടല്‍ ഉണ്ടാകാന്‍ സാധ്യത മുന്നില്‍കണ്ട് ആവശ്യമെങ്കില്‍ പുനരധിവാസം യഥാസമയം നടത്തും.
മഴ ശക്തമായാല്‍ നദികളില്‍ ജലം ഉയരുന്നത് കണക്കിലെടുത്തുള്ള പുനരധിവാസവും യഥാസമയം നടപ്പിലാക്കും. ആറ് താലൂക്കിലും എമര്‍ജന്‍സി റെസ്പോണ്‍സ് ടീമിനെ സജ്ജമാക്കിയിട്ടുണ്ട്. നദികളിലെ ജലനിരപ്പ് യഥാസമയം വിലയിരുത്തി വരുന്നു.
ജില്ലാ ദുരന്ത നിവാരണ അതോറിറ്റി നിലവിലെ കാലാവസ്ഥ മുന്നറിയിപ്പ് സംബന്ധിച്ച വീഡിയോയും ഉദ്യോഗസ്ഥര്‍ക്കായി പ്രദര്‍ശിപ്പിച്ചു. വീഡിയോ കോണ്‍ഫറന്‍സില്‍ എ.ഡി.എം അലക്സ് പി.തോമസ്, ദുരന്തനിവാരണ വിഭാഗം ഡെപ്യൂട്ടി കളക്ടര്‍ ബി. രാധാകൃഷ്ണന്‍, അടൂര്‍ ആര്‍.ഡി.ഒ ഹരികുമാര്‍, ആര്‍.ആര്‍ ഡെപ്യൂട്ടി കളക്ടര്‍ ജെസിക്കുട്ടി മാത്യു, എല്‍.ആര്‍ ഡെപ്യൂട്ടി കളക്ടര്‍ ആര്‍.രാജലക്ഷ്മി, എല്‍.എ ഡെപ്യൂട്ടി കളക്ടര്‍ ജയശ്രീ, തഹസിദാര്‍മാര്‍ തുടങ്ങിയവര്‍ വീഡിയോ കോണ്‍ഫറന്‍സില്‍ പങ്കെടുത്തു.
