ഇടുക്കിയിൽ സ്റ്റുഡന്റ് പോലീസ് കേഡറ്റ് യൂണിറ്റുകൾ ഉദ്ഘാടനം ചെയ്തു
ഇടുക്കി ജില്ലയിലെ വിവിധ സ്‌കൂളുകളിൽ പുതിയ സ്റ്റുഡന്റ് പോലീസ് കേഡറ്റ് യൂണിറ്റുകൾ ഉദ്ഘാടനം ചെയ്തു.കട്ടപ്പന സെന്റ് ജോർജ് ഹയർ സെക്കൻഡറി സ്‌കൂൾ, ഇരട്ടയാർ സെന്റ് തോമസ് ഹയർ സെക്കന്ററി സ്‌കൂൾ എന്നിവിടങ്ങളിലെ എസ്.പി.സി യൂണിറ്റുകൾ ജലവിഭവ വകുപ്പ് മന്ത്രി റോഷി അഗസ്റ്റിൻ ഉദ്ഘാടനം ചെയ്തു. കലയന്താനി സെന്റ് ജോർജ് ഹയർ സെക്കൻഡറി സ്‌കൂളിലെ യൂണിറ്റ് അഡീഷണൽ എസ്.പി ഇമ്മാനുവൽ പോൾ ഉദ്ഘാടനം ചെയ്തു.
കട്ടപ്പന സെന്റ് ജോര്‍ജ് ഹയര്‍ സെക്കന്‍ഡറി സ്‌കൂൾ സ്റ്റുഡന്റ് പൊലീസ് കേഡറ്റ് യൂണിറ്റ്
ഇടുക്കി കട്ടപ്പന സെന്റ് ജോര്‍ജ് ഹയര്‍ സെക്കന്‍ഡറി സ്‌കൂളില്‍ പുതിയതായി അനുവദിക്കപ്പെട്ട സ്റ്റുഡന്റ് പൊലീസ് കേഡറ്റ് യൂണിറ്റിന്റെ ഉദ്ഘാടനം മന്ത്രി റോഷി അഗസ്റ്റിന്‍ നിര്‍വഹിച്ചു .സ്‌കൂളുകളിലെ ലഹരി വിരുദ്ധ പ്രവര്‍ത്തനങ്ങള്‍ക്ക് ശക്തി പകരാന്‍ സ്റ്റുഡന്റ് പൊലീസ് കേഡറ്റുകള്‍ക്ക് കഴിയുമെന്ന് മന്ത്രി പറഞ്ഞു .
ചിട്ടയായ പരിശീലനത്തിലൂടെ വിദ്യാര്‍ഥികളുടെ മാനസിക വളര്‍ച്ചയും കായിക ക്ഷമതയും മെച്ചപ്പെടുത്തുന്നതിന് എസ്പിസി വഴിയൊരുക്കും. കുട്ടികളുടെ പഠനത്തിന് ശക്തി പകരാനും ഇതുവഴി കഴിയും. നിയമങ്ങളെക്കുറിച്ചുള്ള അവബോധവും അനുകമ്പയും സഹാനുഭൂതിയും കുട്ടികളില്‍ വളര്‍ത്തുന്നതില്‍ എസ്പിസി സ്വാധീനം ചെലുത്തും. മയക്കുമരുന്നിനും രാസലഹരിക്കും എതിരേ നിതാന്ത ജാഗ്രത വേണം. ഓരോ വിദ്യാര്‍ഥികളും ലഹരിയുടെ വ്യാപനത്തെക്കുറിച്ചും അതിന്റെ ദൂഷ്യവശങ്ങളെക്കുറിച്ചും ബോധവാനായിരിക്കണം. വിവിധ വകുപ്പുകളുടെ ഏകോപനത്തോടെ ലഹരിക്കെതിരേ ശക്തമായ പ്രതിരോധ പ്രവര്‍ത്തനങ്ങള്‍ നടത്തിവരികയാണ്. ഇതിന് കൂടുതല്‍ ശക്തിപകരാനും വിദ്യാര്‍ഥികളുടെ സമഗ്രമായ വ്യക്തിത്വ വളര്‍ച്ചയ്ക്കും സ്റ്റുഡന്റ് പൊലീസ് കേഡറ്റ് പദ്ധതി വഴി സാധിക്കുമെന്നും മന്ത്രി പറഞ്ഞു.
ഇടുക്കിയില്‍ മെഡിക്കല്‍ കോളേജും എഞ്ചിനീയറിങ് കോളേജും പ്രവര്‍ത്തിക്കുന്നുണ്ട്. കട്ടപ്പനയില്‍ പുതിയ ലോ കോളേജ് ആരംഭിക്കുന്നതിന് നടപടി സ്വീകരിക്കുമെന്നും മന്ത്രി പറഞ്ഞു.
44 കേഡറ്റുകളാണ് സ്‌കൂളിലെ സ്റ്റുഡന്റ് പൊലീസ് കേഡറ്റുകളായി ആദ്യഘട്ടത്തില്‍ ചേര്‍ന്നിട്ടുളളത്. സെന്റ് ജോര്‍ജ് പാരീഷ് ഹാളില്‍ ചേര്‍ന്ന പരിപാടിയില്‍ നഗരസഭാ ചെയര്‍പേഴ്സണ്‍ ബീന ടോമി അധ്യക്ഷത വഹിച്ചു. സ്‌കൂള്‍ മാനേജര്‍ ഫാദര്‍ ജോസ് മംഗലത്തില്‍ അനുഗ്രഹ പ്രഭാഷണം നടത്തി. എസ് പി സിയുടെ ലക്ഷ്യവും പ്രവര്‍ത്തനരീതികളും അഡീഷണല്‍ എസ്.പി ഇമ്മാനുവേല്‍ പോള്‍ വിശദീകരിച്ചു. കട്ടപ്പന എസ് എച്ച് ഒ ടി.സി. മുരുകന്‍ മുഖ്യപ്രഭാഷണം നിര്‍വഹിച്ചു. ഔദ്യോഗിക യൂണിഫോം വിതരണം എസ് പി സി അഡീഷണല്‍ നോഡല്‍ ഓഫീസര്‍ എസ്.ആര്‍ സുരേഷ് ബാബു നിര്‍വഹിച്ചു. എസ് പി സി ഓഫീസ് റൂം ഉദ്ഘാടനം നഗരസഭാ വൈസ് ചെയര്‍മാന്‍ അഡ്വ. കെ.ജെ. ബെന്നി നിര്‍വഹിച്ചു.
ജില്ലാ വിദ്യാഭ്യാസ ഓഫീസര്‍ ആന്‍സണ്‍ ജോസഫ്, ഉപജില്ലാ വിദ്യാഭ്യാസ ഓഫീസര്‍ സി.രാജശേഖരന്‍, നഗരസഭ കൗണ്‍സിലര്‍മാരായ ഐബിമോള്‍ രാജന്‍, സോണിയ ജെയ്ബി, എല്‍.പി സ്‌കൂള്‍ ഹെഡ്മാസ്റ്റര്‍ ദീപു ജേക്കബ്, ബിജു ജോസഫ്, പി.ടി.എ. പ്രസിഡന്റ് സിജു ചക്കുംമൂട്ടില്‍, പ്രിന്‍സിപ്പല്‍ മാണി കെ.സി തുടങ്ങിയവര്‍ പങ്കെടുത്തു.
ഇരട്ടയാര്‍ സെന്റ് തോമസ് ഹയര്‍ സെക്കന്ററി സ്‌കൂൾ സ്റ്റുഡന്റ് പൊലീസ് കേഡറ്റ് യൂണിറ്റ്
ഇടുക്കി ഇരട്ടയാര്‍ സെന്റ് തോമസ് ഹയര്‍ സെക്കന്ററി സ്‌കൂളിലെ സ്റ്റുഡന്റ് പൊലീസ് കേഡറ്റ് യൂണിറ്റിന്റെ ഉദ്ഘാടനം മന്ത്രി റോഷി അഗസ്റ്റിന്‍ നിര്‍വഹിച്ചു . പഠനത്തോടൊപ്പം വിദ്യാര്‍ഥികളുടെ വ്യക്തിത്വ വികസനവും ഉറപ്പാക്കുകയാണ് സ്റ്റുഡന്റ് പൊലീസ് കേഡറ്റ് പദ്ധതിയെന്ന് മന്ത്രി പറഞ്ഞു. 2010 ല്‍ പത്ത് സ്‌കൂളുകളിലാണ് പദ്ധതി ആരംഭിച്ചത്.
ഇപ്പോള്‍ 1044 സ്‌കൂളുകളില്‍ സ്റ്റുഡന്റ് പൊലീസ് കേഡറ്റ് പദ്ധതിയുണ്ട്. പൊതുസമൂഹത്തിലും വിദ്യാര്‍ഥികള്‍ക്കിടയിലും ശക്തമായി ഇടപെടാന്‍ കഴിയുന്ന സേനാവിഭാഗമായി എസ്.പി.സി. മാറി. വിദ്യാര്‍ഥികള്‍ക്കും രക്ഷാകര്‍ത്താക്കള്‍ക്കും ഒരുപോലെ പ്രവര്‍ത്തിക്കാന്‍ കഴിയുന്ന അന്തരീക്ഷമാണ് എസ്.പിസി. ഒരുക്കുന്നത്.
വിദ്യാര്‍ഥികള്‍ക്ക് പഠനത്തോടൊപ്പം ചിട്ടയായ പരിശീലനവും സാധ്യമാകുന്നു. പൊലീസ് ആകാന്‍ കഴിയുന്ന വിധത്തില്‍ വിദ്യാര്‍ഥികള്‍ക്ക് വളരാന്‍ കഴിയുന്നു. നിയമവാഴ്ചയെക്കുറിച്ചുള്ള സമഗ്രമായ അവബോധം പകരുന്നു. എസ്.പി.സി. അംഗങ്ങള്‍ക്ക് മാത്രമല്ല എല്ലാ വിദ്യാര്‍ഥികള്‍ക്കും ഇതിന്റെ പ്രയോജനം ലഭിക്കും. വിവിധ വകുപ്പുകളുടെ ഏകോപനത്തോടെ ലഹരി വിരുദ്ധ പ്രവര്‍ത്തനങ്ങള്‍ നടത്തിവരികയാണ്. ഇത്തരം പ്രവര്‍ത്തനങ്ങള്‍ക്ക് വലിയ സഹായം നല്‍കാന്‍ എസ് പി സിക്ക് കഴിയും. രാസലഹരികള്‍ വലിയ വിപത്താണ് സമൂഹത്തില്‍ സൃഷ്ടിക്കുന്നത്. നിരവധി കേസുകള്‍ രജിസ്റ്റര്‍ ചെയ്യുകയും ശിക്ഷ നല്‍കുകയും ചെയ്യുന്നുണ്ട്. എന്നാല്‍ സ്വയം ബോധവാന്മാരാകുക എന്നതാണ് പ്രധാനം. സര്‍ക്കാര്‍ ഒരുക്കുന്ന മികച്ച വിദ്യാഭ്യാസ സൗകര്യങ്ങള്‍ പുതുതലമുറ പ്രയോജനപ്പെടുത്തണമെന്നും മന്ത്രി പറഞ്ഞു.
ജില്ലാ പഞ്ചായത്ത് പ്രസിഡന്റ് രാരിച്ചന്‍ നീറണാംകുന്നേല്‍ അധ്യക്ഷത വഹിച്ചു. ഇടുക്കി രൂപത വികാരി ജനറല്‍ മോണ്‍. ജോസ് കരിവേലിക്കല്‍, സ്‌കൂള്‍ മാനേജര്‍ ഫാ. സഖറിയാസ് കുമ്മണ്ണുപറമ്പില്‍, ഇരട്ടയാര്‍ ഗ്രാമപഞ്ചായത്ത് പ്രസിഡന്റ് ആനന്ദ് സുനില്‍കുമാര്‍, വാര്‍ഡ് അംഗം ജിന്‍സണ്‍ വര്‍ക്കി, ഹെഡ് മാസ്റ്റര്‍ എം.വി. ജോര്‍ജു കുട്ടി, അഡീഷണല്‍ എസ് പി ഇമ്മാനുവല്‍ പോള്‍, എസ് പി സി അസിസ്റ്റന്റ് നോഡല്‍ ഓഫീസര്‍ എസ്. ആര്‍. സുരേഷ് ബാബു, കട്ടപ്പന എസ് എച്ച് ഒ ടി.സി. മുരുകന്‍, പി.ടി.എ. പ്രസിഡന്റ് സിജോ ഇലന്തൂര്‍, എം.പി.ടി.എ പ്രസിഡന്റ് ബിനു ജസ്റ്റിന്‍, സി പി ഒ ജിറ്റോ മാത്യു, എ സി പി ഒ ലിജോ ജോയ് തുടങ്ങിയവര്‍ പങ്കെടുത്തു.
കലയന്താനി സ്‌കൂൾ സ്റ്റുഡന്റ് പൊലീസ് കേഡറ്റ് യൂണിറ്റ്
കലയന്താനി സെന്റ് ജോര്‍ജ് ഹയര്‍ സെക്കന്‍ഡറി സ്‌കൂളില്‍ സ്റ്റുഡന്റ് പൊലീസ് കേഡറ്റ് (എസ്പിസി) യൂണിറ്റിന്റെ ഉദ്ഘാടനം അഡീഷനല്‍ എസ്.പി ഇമ്മാനുവല്‍ പോള്‍ നിര്‍വഹിച്ചു. മികച്ച പരിശീലനത്തിലൂടെ വ്യക്തിത്വരൂപീകരണത്തിനും സ്വഭാവരൂപീകരണത്തിനും വിദ്യാര്‍ഥികളെ എസ്പിസി സഹായിക്കും. അതുവഴി സമൂഹത്തെ അടുത്തറിഞ്ഞു നല്ല തലമുറയായി വളര്‍ന്നു വരാന്‍ സാധിക്കുമെന്നും അഡീഷനല്‍ എസ്.പി പറഞ്ഞു. ഇടുക്കി ജില്ലാ പഞ്ചായത്തംഗം എം ജെ ജേക്കബ് എസ്പിസി ഓഫീസ് ഉദ്ഘാടനം ചെയ്തു. തൊടുപുഴ ഡിഇഒ ഷീബാ മുഹമ്മദ് എസ് പി സി ലൈബ്രറി ഉദ്ഘാടനം ചെയ്തു. തൊടുപുഴ എസ്. എച്ച്. ഒ മഹേഷ് കുമാര്‍ എസ് യൂണിഫോം വിതരണ ഉദ്ഘാടനം നിര്‍വഹിച്ചു. കലയന്താനി സെന്റ് മേരീസ് പാരീഷ് ഹാളില്‍ നടന്ന ചടങ്ങില്‍ ഇളംദേശം ബ്ലോക്ക് പഞ്ചായത്ത് പ്രസിഡന്റ് ടോമി തോമസ് കാവാലം അധ്യക്ഷത വഹിച്ചു. സ്‌കൂള്‍ മാനേജര്‍ റവ. ഡോ. ജോര്‍ജ് താനത്തുപറമ്പില്‍ മുഖ്യപ്രഭാഷണം നടത്തി. എസ്പിസി ഇടുക്കി എഡിഎന്‍ഒ എസ്.ആര്‍ സുരേഷ് ബാബു പദ്ധതി വിശദീകരണം നടത്തി.
കലയന്താനി സെന്റ് ജോര്‍ജ് ഹയര്‍ സെക്കന്‍ഡറി സ്‌കൂളില്‍ പുതുതായി അനുവദിച്ച സ്റ്റുഡന്റ് പൊലീസ് കേഡറ്റ് (എസ്പിസി) യൂണിറ്റില്‍ അപേക്ഷ നല്‍കിയ 66 കുട്ടികളില്‍ നിന്ന് പ്രവേശനപരീക്ഷയും കായികക്ഷമത പരീക്ഷണവും നടത്തിയ ശേഷം 44 കുട്ടികള്‍ തിരഞ്ഞെടുക്കപ്പെട്ടു. ഇടുക്കി ജില്ലയില്‍ നിലവില്‍ 51 സ്റ്റുഡന്റ് പൊലീസ് കേഡറ്റ് യൂണിറ്റുകളാണ് പ്രവര്‍ത്തിക്കുന്നത്. 17 എണ്ണം സര്‍ക്കാര്‍ സ്‌കൂളുകളിലും, 29 എയ്ഡഡ് സ്‌കൂളുകളിലും, മൂന്ന് എം.ആര്‍.എസ്. സ്‌കൂളുകളിലും, രണ്ട് അണ്‍എയ്ഡഡ് സ്‌കൂളുകളിലുമാണ് പ്രവര്‍ത്തിക്കുന്നത്. ജില്ലയില്‍ 3898 കേഡറ്റുകളാണുള്ളത്. അതില്‍ 1918 പേര്‍ സീനിയര്‍ കേഡറ്റുകളും 1980 പേര്‍ ജൂനിയര്‍ കേഡറ്റുകളുമാണ്.
എസ്പിസി തൊടുപുഴ സബ് ഡിവിഷന്‍ നോഡല്‍ ഓഫിസര്‍ ഇ.എസ് സിയാദ്, പ്രിന്‍സിപ്പല്‍ ജിജി ഫിലിപ്പ്, മുന്‍ ഹെഡ്മാസ്റ്റര്‍ ജോഷി മാത്യു, പൂര്‍വവിദ്യാര്‍ഥി സംഘടന പ്രസിഡന്റ് ജോബി സെബാസ്റ്റ്യന്‍, പിടിഎ പ്രസിഡന്റ് ഷിജു ജോസ്, സ്‌കൂള്‍ ഹെഡ്മാസ്റ്റര്‍ ഫാ. ആന്റണി പുലിമലയില്‍ തുടങ്ങിയവര്‍ പങ്കെടുത്തു.
