ട്രൈബല്‍ മേഖലയിലെ കുഞ്ഞുങ്ങളുടെ പോഷകാഹാര കുറവ് പരിഹരിക്കുന്നതിനുള്ള ന്യുട്രി ട്രൈബ് പദ്ധതിയ്ക്ക് അരുവാപ്പുലം ഗ്രാമപഞ്ചായത്തില്‍ മികച്ച പ്രതികരണം. ട്രൈബല്‍ കോളനിയിലെ 18 വയസില്‍ താഴെയുള്ള കുട്ടികള്‍ക്ക് പ്രത്യേക,അധിക പോഷകാഹാരം വിതരണം ചെയ്യുന്നതിനായി പഞ്ചായത്തും ഐസിഡിഎസും ആവിഷ്‌കരിച്ച പദ്ധതിയാണിത്. ജീവിതസാഹചര്യങ്ങള്‍ കൊണ്ട് പോഷകസമ്പൂര്‍ണ്ണമായ ആഹാരം ലഭിക്കാത്ത കുഞ്ഞുങ്ങള്‍ക്ക് പദ്ധതിയിലൂടെ പരമാവധി ഗുണം ലഭ്യമാക്കാനുള്ള പ്രവര്‍ത്തനങ്ങളാണ് പഞ്ചായത്ത് തലത്തില്‍ നടക്കുന്നത്.

പോഷകാഹാരക്കുറവ്, അനിമീയ, ഭാരക്കുറവ് തുടങ്ങിയ നിരവധി പ്രശ്നങ്ങളാണ് പഞ്ചായത്തിലെ പട്ടിക വര്‍ഗ വിഭാഗത്തിലെ കുട്ടികള്‍ മുന്‍പ് നേരിട്ടിരുന്നത്. കോട്ടാംപാറ ട്രൈബല്‍ കോളനി, ആവണിപ്പാറ ഗിരിജന്‍ സങ്കേതം, കാട്ടാത്തി കോളനി എന്നീ കോളനികളിലുള്ള കുട്ടികള്‍ക്കാണ് പോഷകാഹാര വിതരണം നടത്തുന്നത്. 6 മാസം മുതല്‍ 3 വയസു വരെയുള്ള കുട്ടികള്‍ക്ക് റാഗി, ശര്‍ക്കര ,നെയ്യ് എന്നിവയും, 3 മുതല്‍ 6 വയസു വരെയുള്ള കുട്ടികള്‍ക്കും 10 മുതല്‍ 18 വയസുവരെയുള്ള കുട്ടികള്‍ക്കും അണ്ടി പരിപ്പ്, ബദാം,കറുത്ത മുന്തിരി , കപ്പലണ്ടി, എന്നിവയുമാണ് നല്‍കുന്നത്. അങ്കണവാടി അനുപൂരക ഭക്ഷണം ഡബിള്‍ റേഷന്‍ ആയി നല്‍കുന്നതിന് പുറമെയാണിത്.

ഗര്‍ഭിണികള്‍ക്കും മുലയൂട്ടുന്ന അമ്മമാര്‍ക്കുള്ള പോഷകാഹാരവും പദ്ധതിയില്‍ ഉൾപ്പെടുത്തിയിട്ടുണ്ട്. പദ്ധതിയുടെ വിപുലമായ പ്രവര്‍ത്തനങ്ങള്‍ക്കായി അംഗന്‍വാടി ജീവനക്കാരുടെ ടീം രൂപീകരിച്ചു. ടീമംഗങ്ങള്‍ എല്ലാ മാസവും 15 -ന് ട്രൈബല്‍ കോളനികള്‍ സന്ദര്‍ശിക്കുകയും സ്ഥിതിഗതികള്‍ വിലയിരുത്തുകയും ചെയ്യും. കുട്ടികളുടെ ഉയരം, ഭാരം തുടങ്ങിയവ രേഖപ്പെടുത്തി അനാരോഗ്യമുള്ള കുട്ടികള്‍ക്ക് പ്രത്യേക ശ്രദ്ധ കൊടുക്കും. പോഷകസമ്പൂര്‍ണ്ണമായ ആഹാരം കുട്ടികളുടെ ആവശ്യവും അവകാശവുമാണ് എന്നതിലൂന്നിയുള്ള പ്രവര്‍ത്തനങ്ങളാണ് പദ്ധതി ലക്ഷ്യം വെയ്ക്കുന്നത്.