കാസർഗോഡ് പ്ലാസ്റ്റിക് നിരോധനം കര്‍ശനമാക്കും
പരിപാടികളില്‍ ഹരിത ചട്ടം പാലിക്കണം
കാസർഗോഡ്: ഒറ്റത്തവണ ഉപയോഗമുള്ള പ്ലാസ്റ്റിക്കുകളുടെ നിരോധനം കര്‍ശനമായി നടപ്പാക്കാന്‍ ജില്ലാ കളക്ടര്‍ ഉത്തരവിട്ടു. പ്ലാസ്റ്റിക് മുക്ത ജില്ല എന്ന ലക്ഷ്യം കൈവരിക്കുന്നതിന് ജില്ലയില്‍ നടക്കുന്ന എല്ലാ ചടങ്ങുകളിലും, ആഘോഷങ്ങളിലും, കലാ-കായിക-ശാസ്ത്ര മേളകളിലും മറ്റു ഉത്സവങ്ങളിലും പൂര്‍ണമായും ഹരിതപെരുമാറ്റ ചട്ടം കര്‍ശനമായി പാലിക്കണം. ആഘോഷങ്ങളുടെ ഭാഗമായി വരുന്ന കച്ചവട സ്ഥാപനങ്ങളിലും ഭക്ഷണശാലകളിലും ഇത് ബാധകമാണ്. സര്‍ക്കാര്‍ പൊതുപരിപാടികളിലുള്‍പ്പെടെ ഹരിത ചട്ടം ബാധകമാണ്.
50 മൈക്രോണില്‍ താഴെയുള്ള ഒറ്റത്തവണ ഉപയോഗമുള്ള പ്ലാസ്റ്റികിന്റെ ഉപയോഗവും വ്യാപനവും 2020 ജനുവരി ഒന്നു മുതല്‍ നിരോധിച്ചിട്ടുണ്ട്. ഇത്തരം നിരോധിത പ്ലാസ്റ്റിക് വസ്തുക്കളുടെ നിര്‍മ്മാണം, ഉപയോഗം, വ്യാപനം എന്നിവ തദ്ദേശ സ്ഥാപനങ്ങള്‍ കര്‍ശനമായി തടയണം. ജില്ലയിലെ എല്ലാ സ്‌കൂള്‍, കോളേജ്, പ്രൊഫഷണല്‍ കോളേജ് ഉള്‍പ്പെടെയുള്ള വിദ്യാഭ്യാസ സ്ഥാപനങ്ങളില്‍ തീരുമാനം ഫലപ്രദമായി നടപ്പിലാക്കാന്‍ സ്ഥാപന മേധാവികള്‍ നടപടികള്‍ സ്വീകരിക്കണമെന്നും ജില്ലാ കളക്ടര്‍ അറിയിച്ചു.
