ഇടുക്കി ജില്ലാ പഞ്ചായത്തിന്റെ പരിധിയിൽ വരുന്ന പട്ടികജാതി യുവതികൾക്ക് 100% സ്‌കോളർഷിപ്പോടെ ആയുർവേദ തെറാപ്പി പഠിക്കാൻ അവസരം. ഇടുക്കി ജില്ലാ പഞ്ചായത്ത്, കേരള സർക്കാർ ഉന്നതവിദ്യാഭ്യാസ വകുപ്പിന് കീഴിലുള്ള അസാപ്പ് കേരളയും ജില്ല പട്ടികജാതി വികസന ഓഫീസും സംയുക്തമായി ആരംഭിക്കുന്ന സർട്ടിഫിക്കറ്റ് പ്രോഗ്രാം ഇൻ ആയുർവേദ തെറാപ്പി കോഴ്‌സിലേക്ക് അപേക്ഷ ക്ഷണിച്ചു. ഒരു വർഷക്കാലം ദൈർഘ്യമുള്ള എൻസിവിഇറ്റി അംഗീകൃത കോഴ്‌സിന് ക്ലാസ്‌റൂം പഠനത്തിന് പുറമെ 3 മാസത്തെ ഇന്റേൺഷിപ്പുമുണ്ട്.

കൂടാതെ കോഴ്‌സ് വിജയകരമായി പൂർത്തിയാക്കുന്നവർക്ക് പ്ലേസ്‌മെന്റ് സഹായം ലഭിക്കും. കുമളി, തൊടുപുഴ എന്നിവടങ്ങളിൽ ആണ് ട്രെയിനിങ് സെന്റർ. ഇടുക്കി ജില്ല പഞ്ചായത്ത് പരിധിയിൽ സ്ഥിരതാമസക്കാരായ പട്ടികജാതി വിഭാഗത്തിൽപ്പെടുന്ന 18 നും 35 നും ഇടയിൽ പ്രായമുളള പ്ലസ്ടു വിദ്യാഭ്യാസ യോഗ്യതയുള്ള യുവതികൾക്ക് അപേക്ഷിക്കാം. തിരഞ്ഞെടുക്കപ്പെടുന്നവർക്ക് ഫീസ് ഇനത്തിൽ 100 % സ്‌കോളർഷിപ്പ് ലഭിക്കും. താൽപ്പര്യമുള്ളവർക്ക് https://forms.gle/Pb4U2PbVFYqW2VxZ9 എന്ന ലിങ്ക് വഴി രജിസ്റ്റർ ചെയ്യാം. കൂടുതൽ വിവരങ്ങൾക്ക് 9495999655/ 9495999713. അപേക്ഷിക്കാനുള്ള അവസാന തീയതി - ജനുവരി 30.