എന്റെ കേരളം ആന്റിബയോട്ടിക് സാക്ഷര കേരളം ക്യമ്പയിന്റെ ഭാഗമായി ജില്ലയിലെ ഐസിഡിഎസ് സൂപ്പർവൈസർമാർ, എൻഎസ്എസ് പ്രോഗ്രാം ഓഫീസർമാർ, ബ്ലോക്ക് പബ്ലിക് ഹെൽത്ത് യൂണിറ്റിലെ എപ്പിഡെമിയോളോജിസ്റ്റുമാർ എന്നിവർക്കായി ബോധവത്ക്കരണ ക്ലാസ് സംഘടിപ്പിച്ചു. ജില്ലാ മെഡിക്കൽ ഓഫീസർ ഡോ. കെ കെ രാജാറാം ക്ലാസ് ഉദ്ഘാടനം ചെയ്തു. അഡീ. ഡിഎംഒ ഡോ. കെ ടി മനോജ്, ആരോഗ്യ കേരളം ജില്ലാ പ്രോഗ്രാം മാനേജർ ഡോ. സി കെ ഷാജി, നവകേരള കർമ്മപദ്ധതി മെഡിക്കൽ ഓഫീസർ ഡോ. അഖിലേഷ് കുമാർ, ജില്ലാ എഡ്യൂക്കേഷൻ ആൻഡ് മീഡിയ ഓഫീസർ ഡോ. എൽ ഭവില എന്നിവർ പങ്കെടുത്തു.

ആന്റിബയോട്ടിക് മരുന്നുകളുടെ ദുരുപയോഗം മൂലം ബാക്ടീരിയകൾ ശക്തി പ്രാപിച്ച് സൂപ്പർ ബഗ്ഗുകളായി മാറുകയും അവയ്‌ക്കെതിരെ ചികിത്സ ഫലിക്കാതെയിരിക്കുകയും ചെയ്യുന്ന അവസ്ഥയാണ് ആന്റിമൈക്രോബിയൽ റെസിസ്റ്റൻസ്. ആന്റിബയോട്ടിക്കുകൾ ഫലിക്കാതെ ആയാൽ ചികിത്സകൾ ഫലപ്രദമാകാതെ വരും.

ആന്റിബയോട്ടിക്കുകളുടെ ഉപയോഗം- അറിഞ്ഞിരിക്കേണ്ട കാര്യങ്ങൾ

ആന്റിബയോട്ടിക്കുകളുടെ ദുരുപയോഗവും അമിത ഉപയോഗവും പാടില്ല. ഇവയുടെ ദുരുപയോഗം ഗുരുതര പ്രത്യഘാതങ്ങൾക്ക് ഇടയാക്കും. ആന്റിബയോട്ടിക് ഉപയോഗം ഡോക്ടറുടെ നിർദ്ദേശ പ്രകാരം മാത്രമായിരിക്കണം. ചികിത്സയ്ക്ക് ശേഷം അവശേഷിക്കുന്ന ആന്റിബയോട്ടിക്കുകൾ പിന്നീട് ഉപയോഗിക്കരുത്. അവശേഷിക്കുന്നതോ കാലാവധി അവശേഷിക്കുന്നതോ ആയ ആന്റിബയോട്ടിക്കുകൾ മണ്ണിലോ ജലാശയങ്ങളിലോ വലിച്ചെറിയരുത്. ഡോക്ടർ നിർദ്ദേശിക്കുന്ന ആന്റിബയോട്ടിക്കുകൾ കൃത്യമായ സമയത്തും അളവിലും കഴിക്കണം.

രോഗലക്ഷണങ്ങൾ കുറഞ്ഞു എന്ന കാരണത്താൽ അവ ഇടയ്ക്ക് വെച്ച് നിർത്തരുത്. ഡോക്ടർ നിർദ്ദേശിച്ച ആന്റിബയോട്ടിക് മരുന്നുകൾ മറ്റുള്ളവരുമായി പങ്ക് വയ്ക്കുകയോ മറ്റുള്ളവർക്ക് നിർദ്ദേശിച്ച മരുന്നുകൾ വാങ്ങി കഴിക്കകയോ ചെയ്യരുത്. ബാക്ടീരിയ മൂലമുള്ള ചില രോഗങ്ങൾക്ക് മാത്രമേ ആന്റിബയോട്ടിക് മരുന്നുകൾ ആവശ്യമുള്ളു. പനി, ചുമ, ജലദോഷം തുടങ്ങിയ വൈറസുകൾ ഉണ്ടാക്കുന്നവ ഭേദമാക്കാൻ ആന്റിബയോട്ടിക്കുകൾ ഫലപ്രദമല്ല. കോഴിവളർത്തൽ, കന്നുകാലി വളർത്തൽ മത്സ്യ കൃഷി എന്നിവയിൽ വെറ്റിനറി ഡോക്ടറുടെ നിർദ്ദേശപ്രകാരം മാത്രം ആന്റിബയോട്ടിക്കുകൾ ഉപയോഗിക്കണം. ആരോഗ്യകരമായ ജീവിതത്തിന് ഏറ്റവും ഉത്തമം അണുബാധകൾ തടയുകയാണ്. അതിനായി കൈകൾ സോപ്പ് ഉപയോഗിച്ച് കഴുകുന്നത് ശീലമാക്കുകയും ലഭ്യമായ പ്രതിരോധ കുത്തിവെപ്പുകൾ കൃത്യമായി എടുക്കുകയും വേണം. രോഗികളുമായി ഇടപെടുമ്പോൾ സുരക്ഷാ മാനദണ്ഡങ്ങൾ പാലിക്കണം.