ഭിന്നശേഷി ദിനാചരണം 'കലക്ടര്ക്കൊപ്പം കൈകോര്ക്കാം' സംഘടിപ്പിച്ചു
അന്താരാഷ്ട്ര ഭിന്നശേഷി ദിനാചരണത്തിന്റെ ഭാഗമായി ജില്ലാ ഭരണകൂടവും വൈസ് മെന് ക്ലബ് പത്തനംതിട്ടയും സംയുക്തമായി കളക്ടറേറ്റ് കോണ്ഫറന്സ് ഹാളില് സംഘടിപ്പിച്ച 'കലക്ടര്ക്കൊപ്പം കൈകോര്ക്കാം' പരിപാടിയുടെ ഉദ്ഘാടനം ജില്ലാ കളക്ടര് എസ്. പ്രേം കൃഷ്ണന് നിര്വഹിച്ചു. ഭിന്നശേഷി കുട്ടികളെ വീട്ടില് മാത്രമായി ഒതുക്കാതെ പഠനത്തിലും കലാപരിപാടികളിലും സജീവമായി പങ്കെടുപ്പിച്ച് അവരുടെ ലോകം വിശാലമാക്കണമെന്ന് അദ്ദേഹം പറഞ്ഞു.
സമൂഹത്തില് ഇടം ലഭിക്കുമ്പോഴാണ് ഭിന്നശേഷി കുട്ടികളുടെ കഴിവ് പൂര്ണമായി തെളിയുന്നത്. ഇവരുടെ പഠനത്തിനായി ജില്ലയില് വിവിധ സ്കൂളുകള് ഉണ്ട്. ഓരോ വ്യക്തിയുടെയും കഴിവ് വ്യത്യസ്തമാണ്.
പ്രതിഭയും കഴിവും തിരിച്ചറിയപ്പെട്ട് ഭിന്നശേഷി കുട്ടികള് വളരുവാന് സമൂഹത്തിന്റെ പിന്തുണ ആവശ്യമാണെന്നും ജില്ല കലക്ടര് പറഞ്ഞു. ജില്ലാ ദുരന്തനിവാരണ ഡെപ്യൂട്ടി കളക്ടര് ആര് രാജലക്ഷ്മി അധ്യക്ഷയായി. സിനിമ സംവിധായകന് രാകേഷ് കൃഷ്ണന് കുരമ്പാല മുഖ്യാതിഥിയായി.
മലയാലപ്പുഴ ബഡ്സ് സ്കൂള്, പത്തനംതിട്ട മുനിസിപ്പാലിറ്റി ബഡ്സ് സ്കൂള് എന്നിവിടങ്ങളിലെ കുട്ടികള്ക്ക് ജില്ലാ കളക്ടര് സ്നേഹോപഹാരം നല്കി. കുട്ടികള് കലാപരിപാടി അവതരിപ്പിച്ചു. ഡെപ്യൂട്ടി കളക്ടര് ബീന എസ് ഹനീഫ്, ഹുസൂര് ശിരസ്തദാര് വര്ഗീസ് മാത്യു, വൈസ് മെന് ക്ലബ് ഭാരവാഹി ജേക്കബ് വര്ഗീസ് എന്നിവര് പങ്കെടുത്തു.
ഭിന്നശേഷി ദിനാഘോഷം
സമഗ്ര ശിക്ഷാ കേരളം പത്തനംതിട്ട ജില്ലയുടെ ആഭിമുഖ്യത്തില് ലോക ഭിന്ന ശേഷി ദിനാഘോഷം തിരുവല്ല ബോധനയില് സംഘടിപ്പിച്ചു. പത്തനാപുരം ഗാന്ധിഭവന് ഡയറക്ടര് പുനലൂര് സോമരാജന് സമ്മേളനം ഉദ്ഘാടനം ചെയ്തു. തിരുവല്ല ഡി ഇ ഒ പി ആര് മല്ലിക അധ്യക്ഷയായി. സമഗ്ര ശിക്ഷാ കേരളം ജില്ലാ പ്രോജക്ട് കോര്ഡിനേറ്റര് റെനി ആന്റണി , ഫാ.ബിനീഷ് സൈമണ് കാഞ്ഞിരത്തിങ്കല്, റോയ് റ്റി മാത്യു, ആരതി കൃഷ്ണ, വി കെ മിനി കുമാരി, എ വി ജോര്ജ്, ഷാജി മാത്യു എന്നിവര് പങ്കെടുത്തു.
