തദ്ദേശ തിരഞ്ഞെടുപ്പ് ബോധവൽക്കരണ പരിപാടിയായ ലീപിന്റെ നേതൃത്വത്തിൽ മൂലമറ്റം സെന്റ് ജോസഫ് കോളേജിൽ യൂത്ത് വോട്ടിംഗ് ഫെസ്റ്റിവൽ സംഘടിപ്പിച്ചു. തദ്ദേശ സ്വയംഭരണ വകുപ്പ് ജില്ലാ ജോയിന്റ് ഡയറക്ടർ ട്രീസ ജോസ് ഉദ്ഘാടനം നിർവഹിച്ചു. മൂലമറ്റം സെന്റ് ജോസഫ്‌ കോളേജ് പ്രിൻസിപ്പൽ ഡോ.ജോസഫ് ജോർജ് അധ്യക്ഷത വഹിച്ചു.

യുവജനങ്ങളുടെ വോട്ടിംഗ് പങ്കാളിത്തം വർധിപ്പിക്കുകയും ബോധവൽക്കരണം ശക്തമാക്കുന്നതിനും വേണ്ടിയാണ് യൂത്ത് വോട്ടിംഗ് ഫെസ്റ്റിവൽ സംഘടിപ്പിച്ചത്. വോട്ട് ഒരു പൗരന്റെ അടിസ്ഥാന അവകാശവും ഉത്തരവാദിത്തവുമാണെന്ന സന്ദേശം യുവ സമൂഹത്തിലേക്ക് എത്തിക്കുകയാണ് പരിപാടിയുടെ പ്രധാന ലക്ഷ്യം. പരിപാടിയുടെ ഭാഗമായി തിരഞ്ഞെടുപ്പുമായി ബന്ധപ്പെട്ട ക്വിസ് മത്സരങ്ങൾ, നാടൻ കളികൾ, ഷോർട്ട് ഫിലിം പ്രദർശനം, കലാപരിപാടികൾ, ഇന്ററാക്ടീവ് സെഷനുകൾ തുടങ്ങിയവയും സംഘടിപ്പിച്ചു.യോഗത്തിൽ ലീപ് ഇടുക്കി നോഡൽ ഓഫീസറും തദ്ദേശ വകുപ്പ് ഡെപ്യൂട്ടി ഡയ്‌റക്ടറുമായ അനീസ് ജി,തദ്ദേശ വകുപ്പ് ഇടുക്കി അസിസ്റ്റന്റ്‌ ഡയറക്ടർ പ്രവീൺ വാസു, ജില്ലാ ശുചിത്വമിഷൻ കോർഡിനേറ്റർ ഭാഗ്യരാജ് കെ ആർ, ഇംഗ്ലീഷ് വിഭാഗം അസിസ്റ്റന്റ് പ്രൊഫസർ ഡോ. സലിനി എൽ.ആർ,ഐക്യുഎസി കോർഡിനേറ്റർ റോബി മാത്യു, അധ്യാപകർ, വിദ്യാർത്ഥികൾ,സാമൂഹിക പ്രവർത്തകർ തുടങ്ങിയവർ പങ്കെടുത്തു.