പതിനാറാമത് ദേശീയ സമ്മതിദായക ദിനാഘോഷം തിരുവനന്തപുരം കനകക്കുന്നിൽ സംഘടിപ്പിച്ചു. സംസ്ഥാന ഗവർണർ രാജേന്ദ്ര വിശ്വനാഥ് ആർലേക്കർ ഉദ്ഘാടനം ചെയ്തു. 'എന്റെ ഇന്ത്യ, എന്റെ വോട്ട്' എന്നതാണ് ഈ വർഷത്തെ സന്ദേശം. ദേശീയ സമ്മതിദായക പ്രതിജ്ഞ ചൊല്ലിക്കൊടുത്ത ഗവർണർ അവാർഡ് വിതരണവും നിർവ്വഹിച്ചു.

മുഖ്യതെരഞ്ഞെടുപ്പ് ഓഫീസർ ഡോ. രത്തൻ യു കേൽക്കർ സ്വാഗതം പറഞ്ഞ ചടങ്ങിൽ സംസ്ഥാന തെരഞ്ഞെടുപ്പ് കമ്മീഷണർ എ ഷാജഹാൻ അദ്ധ്യക്ഷനായി. 'വെർച്വൽ റിയാലിറ്റി പോളിംഗ് ബൂത്തിന്റെ ഉദ്ഘാടനവും കോഫീ ടേബിൾ ബുക്ക് പ്രകാശനവും ഗവർണർ നിർവഹിച്ചു.

SVEEP ഐക്കണുകളായ മജീഷ്യൻ ഗോപിനാഥ് മുതുകാട്, നാഗര ഉന്നതി ഊരുമൂപ്പൻ സോമൻ കാണി, പദ്ധതിയുടെ സ്‌പോൺസർമാർ തുടങ്ങിയവരെ ചടങ്ങിൽ ആദരിച്ചു.

തിരഞ്ഞെടുപ്പ് ഉദ്യോഗസ്ഥർക്ക് ആദരം

SIR 2026-ന്റെ ഭാഗമായി 'വോട്ടർപട്ടികയുടെ കൃത്യതയും ശുദ്ധീകരണവും' എന്നനേട്ടം കൈവരിക്കുന്നതിൽ വിവിധവിഭാഗങ്ങളിൽ മികച്ച നേട്ടം കൈവരിച്ച ജില്ലാ തിരഞ്ഞെടുപ്പ് ഓഫീസർമാരെ ചടങ്ങിൽ ആദരിച്ചു. മികച്ച ഇ. എൽ. സി. കോർഡിറ്റർമാരെയും ചടങ്ങിൽ ആദരിച്ചു.

മികച്ച ഇലക്ഷൻ ലിറ്ററസി ക്ലബ്ബുകൾ വിഭാഗത്തിൽ ഒന്നാം സ്ഥാനം നേടിയ (ഒരു ലക്ഷം രൂപ) ഐ.എച്ച്.ആർ.ഡി അപ്ലൈഡ് സയൻസ് കോളേജ്, അഗളി, അട്ടപ്പാടി, രണ്ടാം സ്ഥാനം (50,000 രൂപ) നേടിയ സാമൂതിരി ഗുരുവായൂരപ്പൻ കോളേജ്, കോഴിക്കോട്, മൂന്നാം സ്ഥാനത്തിന് അർഹരായ (25,000 രൂപ) രാജീവ് ഗാന്ധി മെമ്മോറിയൽ ഗവ. ആർട്‌സ് & സയൻസ് കോളേജ്, അട്ടപ്പാടി എന്നിവയുടെ പ്രതിനിധികൾ പുരസ്‌കാരം സ്വീകരിച്ചു.

മികച്ച ബിഎൽഒ വിഭാഗത്തിൽ പുഷ്പ്പത്തൂർ വിനോദ് കുമാർ (കൽപ്പറ്റ), ബിനു ചന്ദ്രൻ (കായംകുളം), ഡെറ്റി പി.വി (അങ്കമാലി), രാജേഷ് കെ (കുന്ദമംഗലം), സിന്ധു (ആറ്റിങ്ങൽ), എസ്. രാജീവ് (കോവളം) എന്നിവർ പുരസ്‌കാരം സ്വന്തമാക്കി.