കിഫ്ബിയിലൂടെ 90,000 കോടി രൂപയുടെ പദ്ധതികൾ നടപ്പാക്കുന്നുവെന്ന് മുഖ്യമന്ത്രി പിണറായി വിജയൻ. കുണ്ടറ താലൂക്ക് ആശുപത്രിയിൽ കിഫ്ബിയുടെ 76.13 കോടി രൂപ ചിലവിൽപൂർത്തിയാക്കിയ ഏഴുനില കെട്ടിടത്തിന്റെ ഉദ്ഘാടനം നിർവഹിക്കുകയായിരുന്നു അദ്ദേഹം.

കഴിഞ്ഞ സർക്കാരിന്റെ കാലത്ത് 50,000 കോടി രൂപയുടെ പശ്ചാത്തലസൗകര്യ വികസനമാണ് കിഫ്ബി മുഖേന ലക്ഷ്യമിട്ടത്. അഞ്ചു വർഷം പൂർത്തിയായപ്പോൾ 62000 കോടി രൂപയുടെ പദ്ധതികൾ ഏറ്റെടുത്തു. നിലവിൽ 90,000 കോടി രൂപയുടെ പദ്ധതികളായി. വിദ്യാഭ്യാസ-ആരോഗ്യസ്ഥാപനങ്ങൾ, റോഡ്, പാലം, മേൽപാലങ്ങൾ, തുടങ്ങി എല്ലായിടത്തും സാക്ഷ്യപത്രങ്ങൾ കാണാം. മാറ്റങ്ങളുടെ പട്ടികയിൽ കുണ്ടറ താലൂക്ക് ആശുപത്രി മുന്നിലാണ്. എക്‌സ്-റേ, അൾട്രാസൗണ്ട്, സ്ത്രീ-പുരുഷ വാർഡുകൾ, ലബോറട്ടറി, ബ്ലഡ് സ്റ്റോറേജ് യൂണിറ്റ് തുടങ്ങി അത്യാധുനിക സൗകര്യങ്ങളാണ് സജ്ജമാക്കിയിരിക്കുന്നത്.

പ്രാഥമിക ആരോഗ്യ കേന്ദ്രങ്ങൾ കുടുംബാരോഗ്യ കേന്ദ്രങ്ങളായി ഉയർത്തി. താലൂക്ക് ആശുപത്രി മുതൽ മെഡിക്കൽ കോളേജുകളിൽ വരെ സൂപ്പർ സ്‌പെഷ്യാലിറ്റി സേവനങ്ങൾ ലഭ്യമാക്കുന്നു. നവജാത ശിശുക്കളുടെ മരണനിരക്ക് കുറഞ്ഞു. ആയുർദൈർഘ്യം വർദ്ധിച്ചു; മാതൃമരണനിരക്ക് കുറയ്ക്കാനായി. ലോകത്താകെ മാതൃകയാകുന്ന പ്രവർത്തനങ്ങളാണ് കഴിഞ്ഞ 10 വർഷങ്ങളായി നടപ്പാക്കുന്നതെന്നും മുഖ്യമന്ത്രി കൂട്ടിച്ചേർത്തു.

ആരോഗ്യ വകുപ്പ് മന്ത്രി വീണാ ജോർജ് അധ്യക്ഷയായി. എല്ലാ ആരോഗ്യകേന്ദ്രങ്ങളിലും ആർദ്രം മിഷൻ വഴി അടിസ്ഥാനസൗകര്യങ്ങൾ ഒരുക്കിയതായി പറഞ്ഞു. 1200 ലാബുകളെ ‘ഹബ് ആൻഡ് സ്‌പോക്ക്’ മാതൃകയിൽ ബന്ധിപ്പിച്ച്, 131 പരിശോധനകൾ വീടിനടുത്തുള്ള ആരോഗ്യകേന്ദ്രങ്ങളിൽ ലഭ്യമാക്കാൻ ‘നിർണയ’ പദ്ധതി നടപ്പാക്കി. കൊട്ടാരക്കര, കരുനാഗപ്പള്ളി, നീണ്ടകര, പുനലൂർ താലൂക്ക് ആശുപത്രികളിൽ പുതിയകെട്ടിടങ്ങൾ. സൗജന്യചികിത്സ കൂടുതൽ നൽകുന്ന സംസ്ഥാനമായ കേരളം ആരോഗ്യ സൂചകങ്ങളുടെ മാനദണ്ഡങ്ങളിലും മുന്നേറുകയാണ് – മന്ത്രി വ്യക്തമാക്കി.

ധനകാര്യ വകുപ്പ് മന്ത്രി കെ എൻ ബാലഗോപാൽ മുഖ്യാതിഥിയായി. പി.സി വിഷ്ണുനാഥ് എം.എൽ.എ മുഖ്യപ്രഭാഷണം നടത്തി. എംഎൽഎമാരായ എം. മുകേഷ്, കോവൂർ കുഞ്ഞുമോൻ, ജില്ലാ പഞ്ചായത്ത് പ്രസിഡന്റ് ആർ. ലതാദേവി, ജില്ലാ കലക്ടർ എൻ. ദേവിദാസ്, മുൻ മന്ത്രി ജെ.മേഴ്സിക്കുട്ടിയമ്മ, ആരോഗ്യവകുപ്പ് ഡയറക്ടർ ഡോ. കെ ജെ റീന, ചിറ്റുമല ബ്ലോക്ക് പഞ്ചായത്ത് പ്രസിഡന്റ് ബി. ബൈജു, വൈസ് പ്രസിഡന്റ് ബിന്ദുമോൾ, ബ്ലോക്ക് ആരോഗ്യ-വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്‌സൺ എ.വിജയകുമാർ, ജില്ലാ പഞ്ചായത്ത് ആരോഗ്യ സ്റ്റാന്റിംഗ് കമ്മിറ്റി ചെയർപേഴ്സൺ ബി ജയന്തി, ഗ്രാമപഞ്ചായത്ത് പ്രസിഡന്റുമാരായ വിനോദ്കുമാർ, സൈമൺ വർഗീസ്, വിനീത വിജയൻ, മനോജ്, എസ് ശ്യാം, റോസമ്മ മാർഷൽ, മായാ നെപ്പോളിയൻ, ജില്ലാ മെഡിക്കൽ ഓഫീസർ ഇൻ ചാർജ് ഡോ. എം എസ് അനു, എൻ എച്ച് എം ജില്ലാ പ്രോഗ്രാം മാനേജർ ഡോ. ദേവ്കിരൺ, കുണ്ടറ താലൂക്ക് ആശുപത്രി മെഡിക്കൽ സൂപ്രണ്ട് ഡോ. ജി. ബാബുലാൽ, ജില്ലാ-ബ്ലോക്ക് പഞ്ചായത്ത് അംഗങ്ങൾ, രാഷ്ട്രീയകക്ഷി നേതാക്കൾ തുടങ്ങിയവർ പങ്കെടുത്തു.