അഷ്ടമുടിക്കായലിന്റെ ഓളപ്പരപ്പുകളിൽ വീറും വാശിയും നിറയ്ക്കാൻ 11-മത് പ്രസിഡന്റ്‌സ് ട്രോഫി വള്ളംകളി ജനുവരി 10ന്. ഉച്ചയ്ക്ക് 2ന് ധനകാര്യ വകുപ്പ് മന്ത്രി കെ.എൻ.ബാലഗോപാൽ ജലോത്സവം ഉദ്ഘാടനം ചെയ്യും. ക്ഷീരവികസന-മൃഗസംരക്ഷണ വകുപ്പ് മന്ത്രി ജെ. ചിഞ്ചുറാണി അധ്യക്ഷയാകും. ഗതാഗത വകുപ്പ് മന്ത്രി കെ.ബി.ഗണേഷ് കുമാറാണ് മുഖ്യാതിഥി. മേയർ എ.കെ.ഹഫീസ് പതാക ഉയർത്തും. മാസ്ഡ്രിൽ ഫ്‌ളാഗ് ഓഫ് എൻ കെ പ്രേമചന്ദ്രൻ എം.പി നിർവഹിക്കും.

എം.പിമാരായ കൊടിക്കുന്നിൽ സുരേഷ്, കെ.സി വേണുഗോപാൽ, എം.എൽ.എമാരായ എം മുകേഷ്, എം നൗഷാദ്, പി.എസ്. സുപാൽ, സുജിത്ത് വിജയൻപിള്ള, ജി.എസ് ജയലാൽ, കോവൂർ കുഞ്ഞുമോൻ, പി.സി വിഷ്ണുനാഥ്, സി.ആർ.മഹേഷ്, ജില്ലാ പഞ്ചായത്ത് പ്രസിഡന്റ് ആർ. ലതാദേവി, ജില്ലാ കലക്ടർ എൻ. ദേവിദാസ്, എ.ഡി.എം ജി. നിർമൽകുമാർ, ഡെപ്യൂട്ടി മേയർ കരുമാലിൽ ഡോ. ഉദയാ സുകുമാരൻ തുടങ്ങിയവർ പങ്കെടുക്കും. സമാപനസമ്മേളനവും സമ്മാനദാനവും മന്ത്രി ജെ.ചിഞ്ചുറാണി നിർവഹിക്കും. മന്ത്രി കെ.എൻ. ബാലഗോപാൽ അധ്യക്ഷനാകും.

വിവിധ മത്സരങ്ങളിലായി ഒമ്പത് ചുണ്ടൻ വള്ളങ്ങളും എട്ട് ചെറുവള്ളങ്ങളുമാണ് ഇത്തവണ മാറ്റുരയ്ക്കുന്നത്. സിബിഎല്ലിൽ മൂന്ന് ട്രാക്കുകളിലായി നിരണം ചുണ്ടൻ, വീയപുരം ചുണ്ടൻ, മേൽപ്പാടം ചുണ്ടൻ, നടുഭാഗം ചുണ്ടൻ, നടുവിലെപറമ്പൻ ചുണ്ടൻ, കാരിച്ചാൽ ചുണ്ടൻ, ചെറുതന ചുണ്ടൻ, പായിപ്പാടൻ ചുണ്ടൻ, ചമ്പക്കുളം ചുണ്ടൻ എന്നീ വള്ളങ്ങളാണ് മത്സരിക്കുന്നത്.

നിലവിലെ പോയിന്റ് പട്ടികയിൽ വീയപുരം ചുണ്ടൻ ഒന്നാം സ്ഥാനത്താണ്. രണ്ടാം സ്ഥാനത്ത് മേൽപ്പാടം ചുണ്ടനും മൂന്നാം സ്ഥാനത്ത് നിരണം ചുണ്ടനുമാണ്. സിബിഎല്ലിലെ ഒന്നാം സ്ഥാനക്കാർക്ക് 25 ലക്ഷം രൂപ, രണ്ടാം സ്ഥാനം 15 ലക്ഷം രൂപ, മൂന്നാം സ്ഥാനക്കാർക്ക് 10 ലക്ഷം രൂപ എന്നിങ്ങനെയാണ് ലഭിക്കുക.

ചെറുവള്ളങ്ങളുടെ മത്സരത്തിൽ രണ്ട് ഇരുട്ടുകുത്തി എ ഗ്രേഡ്, മൂന്ന് ഇരുട്ടുകുത്തി ബി ഗ്രേഡ്, മൂന്ന് തെക്കനോടി വനിതാ വിഭാഗം പങ്കെടുക്കും. ഇരുട്ടുകുത്തി എ ഗ്രേഡ് വിഭാഗത്തിന് ബോണസ് ഇനത്തിൽ 75,000 രൂപയും പ്രൈസ് മണി ഇനത്തിൽ 25,000 രൂപയുമാണ് സമ്മാനം. ഇരുട്ടുകുത്തി ബി ഗ്രേഡിന് ബോണസിനത്തിൽ 50000 രൂപയും പ്രൈസ് മണിയായി ഒന്നാം സ്ഥാനത്തിന് 20000 രൂപയും രണ്ടാം സ്ഥാനത്തിന് 15,000 രൂപയുമാണ്. തെക്കനോടി വനിതാ വിഭാഗത്തിന് 60,000 രൂപയും പ്രൈസ് മണിയായി ഒന്നാം സ്ഥാനത്തിന് 25000 രൂപയും രണ്ടാം സ്ഥാനത്തിന് 20,000 രൂപയും നൽകും. മൂന്ന് ട്രാക്കുകളാണ് മത്സരത്തിനായി തയാറാക്കിയിരിക്കുന്നത്.

സ്‌പോർട്‌സ് കമ്മിറ്റിയുടെ നേതൃത്വത്തിൽ വള്ളംകളിയുടെ ഭാഗമായി ജനുവരി ഒൻപതിന് വൈകിട്ട് നാലിന് കൊല്ലം ബീച്ചിൽ കബഡി മത്സരം സംഘടിപ്പിക്കും. സ്റ്റിയറിങ് കമ്മിറ്റിയുടെ നേതൃത്വത്തിൽ ജെറ്റ് സ്‌കി വിത്ത് ഫ്‌ളൈ ബോർഡ് പ്രദർശനവും ഉണ്ടാകും.

സ്വാഗതസംഘം ഓഫീസ് ഉദ്ഘാടനം ചെയ്തു

11-ാമത് പ്രസിഡന്റ്‌സ് ട്രോഫി ജലോത്സവത്തോടനുബന്ധിച്ച് കെഎസ്ആർടിസി സ്റ്റാൻഡിന് സമീപത്തെ ബോട്ട് ജെട്ടിയിൽ ഒരുക്കിയ സ്വാഗതസംഘം ഓഫീസിന്റെ ഉദ്ഘാടനം ജില്ലാ കലക്ടർ എൻ ദേവിദാസ് നിർവഹിച്ചു. വള്ളംകളിയുടെ പ്രചരണാർഥം ക്യൂ എ സി മൈതാനത്ത് ജനപ്രതിനിധികളുടേയും ജില്ലാ കലക്ടറുടേയും ടീമുകൾ പങ്കെടുക്കുന്ന ഫുട്‌ബോൾ മത്സരവും നടത്തി.

ഡി ടി പി സി സെക്രട്ടറി ജ്യോതിഷ് കേശവൻ, വിവിധ കമ്മിറ്റി അംഗങ്ങളായ എൻ.ചന്ദ്രബാബു, ഡോ കെ. രാമഭദ്രൻ, ടി.കെ സുൽഫി, അഡ്വ. ടി.സി വിജയൻ, ഡോ.ഡി സുജിത്, കുരീപ്പുഴ ഷാനവാസ്, എസ്.പ്രശാന്ത്, എം.മാത്യു, പെരിനാട് മുരളി, ക്ലാപ്പന മുഹമ്മദ്, എ.ഇഖ്ബാൽ കുട്ടി, ഷിബു റാവുത്തർ, സ്വാമിനാഥൻ, ഉപേന്ദ്രൻ മങ്ങാട്, അയത്തിൽ അപ്പുക്കുട്ടൻ, എം.എസ് ശ്യാം കുമാർ, കെ.ദിലീപ് കുമാർ, ഹരീഷ് തെക്കടം തുടങ്ങിയവർ പങ്കെടുത്തു.