ജീവിതശൈലീ രോഗനിയന്ത്രണം ലക്ഷ്യമിട്ട് നടപ്പാക്കുന്ന ‘ആരോഗ്യം ആനന്ദം വൈബ് ഫോർ വെൽനെസ്' ക്യാമ്പയിന്റെ ജില്ലാതല പ്രീ ലോഞ്ചിന് തുടക്കമായി. കാസർഗോഡ് നിന്നും തുടങ്ങിയ കെ.എസ്.ആർ.ടി.സി വാഹന പ്രചാരണ ജാഥയും ദീപശിഖ പ്രയാണവും പത്തനാപുരത്ത് സ്വീകരിച്ചു. ജില്ലാ പഞ്ചായത്ത് അംഗം വിഷ്ണു ഭഗത്, ബ്ലോക്ക് പഞ്ചായത്ത് പ്രസിഡന്റ് അജിത് കൃഷ്ണ, പത്തനാപുരം ഗ്രാമപഞ്ചായത്ത് പ്രസിഡന്റ് ഷീജ ഷാനവാസ്, വാർഡ് മെമ്പർ ഫാറൂഖ് മുഹമ്മദ്, ജില്ലാ പ്രോഗ്രാം മാനേജർ ഡോ. ദേവ് കിരൺ, ജൂനിയർ അഡ്മിനിസ്ട്രേറ്റീവ് മെഡിക്കൽ ഓഫീസർ ഡോ. ക്ലെനിൻ ഫ്രാൻസിസ് ഫെറിയ, ഡോ. വിപിൻ, ഡോ. ആശാലക്ഷ്മി, തുടങ്ങിയവർ പങ്കെടുത്തു. ദീപശിഖ പ്രയാണം സ്നേഹതീരം സിസ്റ്റർ റോസലിൻ ഏറ്റുവാങ്ങി, ബോധവത്കരണ സൈക്കിൾ റാലിയുടെ ഫ്ളാഗ് ഓഫ് പുനലൂർ സോമരാജൻ നിർവഹിച്ചു. കുന്നിക്കോട്, ചെങ്ങമനാട്, കൊട്ടാരക്കര വിജയ ഹോസ്പിറ്റൽ എന്നിവിടങ്ങളിൽ ബോധവത്കരണ ക്ളാസുകൾ, ഫ്ളാഷ് മോബ്, വിവിധ കലാപരിപാടികൾ എന്നിവ അരങ്ങേറി.

കൊട്ടാരക്കര കെ.എസ്.ആർ.ടി.സി ബസ് സ്റ്റാൻഡിൽ സംഘടിപ്പിച്ച ജില്ലാതല പ്രീ ലോഞ്ച് പരിപാടി കൊട്ടാരക്കര മുനിസിപ്പാലിറ്റി ചെയർപേഴ്സൺ അനിത ഗോപകുമാർ ഉദ്ഘാടനം ചെയ്തു. ജീവിതശൈലീ രോഗനിയന്ത്രണത്തിന് യോഗ, വ്യയാമം, ചിട്ടയായ ജീവിത ശൈലീ, നല്ല ആഹാരം എന്നിവ ജീവിതത്തിന്റെ ഭാഗമാക്കണമെന്ന് മുഖ്യാതിഥിയായ ജില്ലാ കളക്ടർ എൻ ദേവിദാസ് പറഞ്ഞു. ഡെപ്യൂട്ടി ഡി.എം.ഒ അധ്യക്ഷയായി. ആരോഗ്യ കേരളം ജില്ലാ പ്രോഗ്രാം മാനേജർ വിഷയാവതരണം നടത്തി.

ക്യാമ്പയിനിന്റെ പ്രചരണാർഥം ജില്ലാ കളക്ടറുടെ നേതൃത്വത്തിലുള്ള കലക്ടറേറ്റ് ടീം, ആരോഗ്യ വകുപ്പ്, എക്സൈസ്, ട്രഷറി വിഭാഗം, പെരുമൺ എൻജിനീയറിങ് വിഭാഗം, സ്വകാര്യ മെഡിക്കൽ കോളജിൽ നിന്നുള്ള ടീം, വനിത ടീം പങ്കെടുത്ത ക്രിക്കറ്റ് മത്സരം സംഘടിപ്പിച്ചിരുന്നു. ഫൈനലിൽ ജില്ലാ എക്സൈസ് ടീം, വനിതകളുടെ മത്സരത്തിൽ റവന്യൂ ടീം എന്നിവർ വിജയികളായി. സമ്മാന വിതരണം ജില്ലാ പഞ്ചായത്ത് വൈസ് പ്രസിഡന്റ് എസ് ആർ അരുൺകുമാർ നിർവഹിച്ചു.