പോലീസ് ഉദ്യോഗസ്ഥര്‍ക്ക് ജെന്‍ഡര്‍ അവബോധ പരിശീലനം: ഇടുക്കിയില്‍ ദ്വിദിന ശില്‍പ്പശാല
കുടുംബശ്രീ ജില്ലാ മിഷനും ജില്ലാ പോലീസ് വകുപ്പും സംയുക്തമായി ഇടുക്കിയിലെ പോലീസ് ഉദ്യോഗസ്ഥര്‍ക്കായി ജെന്‍ഡര്‍ അവബോധ പരിശീലന പരിപാടി ആരംഭിച്ചു. വാഴവര ആശ്രമം ട്രെയിനിംഗ് കോളേജില്‍ ദ്വിദിന ശില്‍പശാലയുടെ ഉദ്ഘാടനം ജില്ലാ പോലീസ് മേധാവി സാബു മാത്യു കെ. എം. നിര്‍വഹിച്ചു. ജെന്‍ഡര്‍ വിഷയങ്ങളില്‍ പോലീസ് ഉദ്യോഗസ്ഥര്‍ക്ക് അവബോധം നല്‍കുന്നത് സേവന നിലവാരം മെച്ചപ്പെടുത്താന്‍ സഹായിക്കുമെന്ന് അദ്ദേഹം അഭിപ്രായപ്പെട്ടു.
കുടുംബശ്രീ ഇടുക്കി ജില്ലാമിഷന്‍ കോ-ഓര്‍ഡിനേറ്റര്‍ മണികണ്ഠന്‍ എ. അധ്യക്ഷത വഹിച്ച ചടങ്ങില്‍ അഡീഷണല്‍ എസ്. പി. ഇമ്മാനുവല്‍ പോള്‍ മുഖ്യപ്രഭാഷണം നടത്തി. ജെന്‍ഡര്‍ സമത്വം ഉറപ്പാക്കുന്നതിലും സ്ത്രീ സൗഹൃദപരമായ സമീപനം കൈക്കൊള്ളുന്നതിലും പോലീസിന്റെ പങ്ക് അദ്ദേഹം വിശദീകരിച്ചു.
ജില്ലാ പ്രോഗ്രാം മാനേജര്‍ (ജെന്‍ഡര്‍) സൗമ്യ ഐ. എസ്. സ്വാഗതമാശംസിച്ചു. അസി. ജില്ലാ മിഷന്‍ കോ-ഓര്‍ഡിനേറ്റര്‍ ജി. ഷിബു ആശംസകള്‍ അര്‍പ്പിച്ചു സംസാരിച്ചു. സ്നേഹിത ജെന്‍ഡര്‍ ഹെല്‍പ്പ് ഡെസ്‌ക് കൗണ്‍സിലര്‍ വിനോജി റ്റി. കെ. നന്ദി പറഞ്ഞു. പരിശീലന പരിപാടിയില്‍ പ്രമുഖ പരിശീലകര്‍ ക്ലാസുകള്‍ നയിക്കുന്നുണ്ട്. കോര്‍പ്പറേറ്റ ട്രെയിനറും എന്‍.എല്‍.പി. വിദഗ്ധനുമായ ഡോ. ജസ്റ്റിന്‍ തോമസ്, ഇന്റര്‍നാഷണല്‍ ട്രെയിനറും റേഡിയോ ജോക്കിയുമായ ആര്‍.ജെ. ശരത് റ്റി ആര്‍, കവിയും കേരള സാഹിത്യ അക്കാദമി അംഗവുമായ ആര്‍.ടി.എന്‍. വിജയരാജമല്ലിക എന്നിവരാണ് ജെന്‍ഡര്‍ അവബോധ പരിശീലനത്തിന് നേതൃത്വം നല്‍കുന്നത്.
