സ്കൂളുകൾക്കും ബസ് സ്റ്റോപ്പുകൾ കയ്ക്കും സമീപമുള്ള അപകടകരമായ മരങ്ങൾ ഉടൻ മുറിക്കണമെന്ന് മന്ത്രി പി. രാജീവ്. കനത്ത മഴയെ തുടർന്നുള്ള സ്ഥിതി വിലയിരുത്തുന്നതിനായി മന്ത്രി പി.രാജീവിന്റെ അധ്യക്ഷതയിൽ ചേർന്ന ഓൺലൈൻ യോഗത്തിൽ സംസാരിക്കുകയായിരുന്നു മന്ത്രി. മരം വീണ് ആളപായമുണ്ടാകാൻ സാധ്യതയുള്ള സ്ഥലങ്ങളിൽ പ്രത്യേക പരിശോധന നടത്തണം. സ്കൂളുകളുടെ സുരക്ഷ ഉറപ്പാക്കാൻ പ്രത്യേക ശ്രദ്ധ വേണമെന്ന് മന്ത്രി നിർദേശിച്ചു. പെരിയാർ വാലി പദ്ധതിക്ക് സമീപത്തെ അപകടകരമായ മരങ്ങളും മുറിക്കാൻ നടപടി സ്വീകരിക്കണം. കൊച്ചി നഗരത്തിൽ കൊച്ചി മെട്രോ നിർമ്മാണവുമായി ബന്ധപ്പെട്ടുണ്ടാകുന്ന കാനകളിലെ വെള്ളക്കെട്ട് ഒഴിവാക്കുന്നതിന് മെട്രോ അധികൃതർ അടിയന്തര നടപടി സ്വീകരിക്കണം. പോലീസ്, ഫയർ വകുപ്പുകൾ ആവശ്യമായ ഉപകരണങ്ങൾ ക്രമീകരിക്കണം. കൺട്രോൾ റൂമുകൾ സജ്ജമായിരിക്കണം. പഞ്ചായത്ത് തലത്തിൽ ജനപ്രതിനിധികൾ യോഗം ചേർന്ന് സ്ഥിതിഗതികൾ വിലയിരുത്തണം. ജില്ലാതലത്തിൽ എല്ലാ ദിവസവും അവലോകനയോഗം ചേരാനും മന്ത്രി നിർദേശിച്ചു.