പാലക്കാട്: പട്ടാമ്പി കോളേജിലെ സയൻസ് ബ്ലോക്കിൽ ഒരുക്കിയിരിക്കുന്ന കോവിഡ്‌ ഫസ്റ്റ് ലൈൻ ട്രീറ്റ്മെൻറ് സെന്റർ ഇന്ന് (ഓഗസ്റ്റ് 2) പ്രവർത്തനം ആരംഭിക്കുമെന്നും പട്ടാമ്പി താലൂക്കിലെ ലോക് ഡൗൺ തുടരണമോയെന്നത് സംബന്ധിച്ച് നാളെ തീരുമാനമാകും എന്നും മുഹമ്മദ് മുഹ്സിൻ എംഎൽഎ അറിയിച്ചു.

കൂടാതെ പട്ടാമ്പിയിലെ കോവിഡ് പ്രതിരോധ പ്രവർത്തനങ്ങൾ ഊർജ്ജിതമാക്കുന്നതിന്റെ ഭാഗമായി ഇന്നലെ (ഓഗസ്റ്റ് 1) എംഎൽഎയുടെ അധ്യക്ഷതയിൽ ജനപ്രതിനിധികൾ, വിവിധ വകുപ്പുകളിലെ ഉദ്യോഗസ്ഥർ, ആരോഗ്യ പ്രവർത്തകർ ഉൾപ്പെടെയുള്ളവരുടെ ഓൺലൈൻ യോഗം ചേർന്നതായി എംഎൽഎ അറിയിച്ചു.

പട്ടാമ്പി കോളേജിലെ സയൻസ് ബ്ലോക്കിൽ ആദ്യഘട്ടത്തിൽ 500 ബെഡ്ഡുകൾ ആണ് ഒരുക്കിയിട്ടുള്ളത്. നിലവിൽ പട്ടാമ്പി കോളേജിലെ വനിതാ ഹോസ്റ്റലിൽ പ്രവർത്തിക്കുന്ന സി എഫ് എൽ ടീ സി യിൽ ചികിത്സയിലുള്ള രോഗികളെയും ഇവിടേക്ക് മാറ്റും.രോഗവ്യാപന സാഹചര്യം കണക്കിലെടുത്ത് എല്ലാ പഞ്ചായത്തുകളിലും സി എഫ് എൽ ടി സി ക്ക് വേണ്ട സംവിധാനം ഒരുക്കിയിട്ടുണ്ട്. പട്ടാമ്പി കോളേജിലെ സി എസ് ആർ ടി സി യിലെ ബെഡ്ഡുകൾ പൂർത്തിയായാൽ കുലുക്കല്ലൂർ, കൊപ്പം, ഓങ്ങല്ലൂർ പഞ്ചായത്തുകളിലെ സെൻററുകൾ പ്രവർത്തനം ആരംഭിക്കും.ഇവിടേക്ക് വേണ്ട ആരോഗ്യപ്രവർത്തകരെ നിയമിച്ചിട്ടുണ്ട് എന്ന് എംഎൽഎ അറിയിച്ചു. മറ്റു പഞ്ചായത്തുകളിലും സി എഫ് എൽ ടി സി കൾ സജ്ജമായിട്ടുണ്ട് എങ്കിലും ഇവിടേയ്ക്ക് ആവശ്യമായ ആരോഗ്യപ്രവർത്തകരെ കണ്ടെത്തുന്നതിന് അഭിമുഖം നടത്തുന്നത് തുടരുമെന്നും എംഎൽഎ പറഞ്ഞു.

പട്ടാമ്പി താലൂക്കിലെ ലോക് ഡൗൺ തുടരണമോയെന്നത് സംബന്ധിച്ച് ജില്ലാ കലക്ടർ ഇന്ന് തീരുമാനമെടുക്കും.നിലവിലെ സാഹചര്യം സംബന്ധിച്ച് ആരോഗ്യ വകുപ്പിൽ നിന്നും പോലീസിൽ നിന്നും ജില്ലാ കളക്ടർ റിപ്പോർട്ട് ആവശ്യപ്പെട്ടിട്ടുണ്ട്.അടിയന്തിര സാഹചര്യം നിലനിൽക്കുന്ന പഞ്ചായത്തുകളിൽ ലോക്ക് ഡൗൺ നീട്ടാൻ സാധ്യതയുള്ളതായി എംഎൽഎ പറഞ്ഞു.

പട്ടാമ്പിയിൽ താലൂക്കിൽ ഇതുവരെ 7050 കോവിഡ്‌ ടെസ്റ്റുകളാണ് നടത്തിയിട്ടുള്ളത്. ഇതിൽ 4800 എണ്ണം പട്ടാമ്പി മണ്ഡലത്തിൽ മാത്രം നടത്തിയിട്ടുണ്ട്.മൂന്നു ജില്ലകളിലായി 29 പഞ്ചായത്തുകളിലും പട്ടാമ്പി, ഷോർണൂർ നഗരസഭകളിലുമുള്ള ആളുകളിലാണ് പട്ടാമ്പി ക്ലസ്റ്ററിൽ നിന്നും രോഗബാധ ഉണ്ടായിട്ടുള്ളത്.

പട്ടാമ്പി മണ്ഡലത്തിൽ നിന്നുള്ള 233 പേർ ഉൾപ്പെടെ 374 പേർക്കാണ് കഴിഞ്ഞ ദിവസം വരെ രോഗം സ്ഥിരീകരിച്ചത്. കുടുംബത്തിലെ ഒരാൾക്ക് രോഗം ഉണ്ടായാൽ മറ്റുള്ളവരിലേക്കും ബാധിക്കുമെന്നതിനാൽ മുൻകരുതലിന്റെ ഭാഗമായി എല്ലാവരും വീട്ടിലും മാസ്ക് ധരിക്കണമെന്ന് യോഗത്തിൽ ഡിഎംഒ നിർദേശിച്ചതായി എംഎൽഎ അറിയിച്ചു.

നാളെ പട്ടാമ്പി താലൂക്കിലുള്ളവർക്കായി പട്ടാമ്പി ഗവ.ഹയർ സെക്കൻഡറി സ്കൂളിൽ ക്യാമ്പ് നടക്കും.

കോവിഡ് പ്രതിരോധ പ്രവർത്തനങ്ങൾക്കൊപ്പം ഡെങ്കിപ്പനി ഉൾപ്പെടെയുള്ള പകർച്ചവ്യാധികൾ പ്രതിരോധിക്കുന്നതിനായി വാർഡ് തല സമിതികൾ മുഖേന മഴക്കാല ശുചീകരണ പ്രവർത്തനങ്ങൾ ഊർജിതമാക്കാൻ പഞ്ചായത്തുകൾക്ക് നിർദേശം നൽകിയതായും എംഎൽഎ പറഞ്ഞു. കൂടാതെ പ്രളയ സാധ്യത നിലനിൽക്കുന്നതിനാൽ വർഡ്തല സമിതികളും റാപ്പിഡ് റെസ്പോൺസ് ടീമും വെള്ളം കയറാൻ ഇടയുള്ള വീടുകളിലെ ആളുകൾ എടുക്കേണ്ട മുൻ മുൻകരുതലുകൾ സംബന്ധിച്ച് അതാതു പ്രദേശത്തുള്ളവരെ ബോധവാന്മാരാക്കണമെന്നും എംഎൽഎ നിർദ്ദേശിച്ചു.