സാന്ത്വന പരിചരണ രംഗത്ത് സേവനം നൽകുന്ന വിവിധ സംഘടനകളുടെ ജില്ലാസംഗമം ജില്ലാപഞ്ചായത്ത് പ്രസിഡന്റ് അഡ്വ. ബിനോയ് കുര്യൻ ഉദ്ഘാടനം ചെയ്തു. ജില്ലാ പഞ്ചായത്ത് ആരോഗ്യ വിദ്യാഭ്യാസ സ്ഥിരം സമിതി ചെയർമാൻ പി രവീന്ദ്രൻ അധ്യക്ഷനായി. ജില്ലാ കളക്ടർ അരുൺ കെ വിജയൻ മുഖ്യാതിഥിയായി.

തദ്ദേശ സ്വയംഭരണ വകുപ്പും കണ്ണൂർ ജില്ലാ പഞ്ചായത്തും ചേർന്ന് ആരോഗ്യവകുപ്പിന്റെ സഹകരണത്തോടെയാണ് പരിപാടി സംഘടിപ്പിച്ചത്. കിടപ്പുരോഗികളുടെ പരിചരണം ഏകോപിപ്പിക്കുന്നതിനും മെച്ചപ്പെടുത്തുന്നതിനുമായി സംസ്ഥാന സർക്കാർ നടപ്പിലാക്കിയ പാലിയേറ്റീവ് ഗ്രിഡ് സംവിധാനത്തിൽ രജിസ്റ്റർ ചെയ്ത പാലിയേറ്റീവ് സന്നദ്ധ സംഘടനകളുടെ പ്രതിനിധികൾ സംഗമത്തിൽ പങ്കെടുത്തു. സംഘടനകൾക്കുള്ള അനുമോദനവും സർട്ടിഫിക്കറ്റ് വിതരണവും സംഘടിപ്പിച്ചു.

ജില്ലാപഞ്ചായത്ത് ക്ഷേമകാര്യ സ്ഥിരം സമിതി ചെയർപേഴ്‌സൺ ബോബി എണ്ണച്ചേരിയിൽ, എൻ.എച്ച്.എം ജില്ലാ പ്രോഗ്രാം മാനേജർ ഡോ. പി.കെ അനിൽകുമാർ, ഐ.എസ്.എം ജില്ലാ മെഡിക്കൽ ഓഫീസർ ഡോ. ഡി.സി ദീപ്തി, ഹോമിയോ ജില്ലാ മെഡിക്കൽ ഓഫീസർ ഡോ. കെ ജ്യോതി, ജില്ലാപഞ്ചായത്ത് സെക്രട്ടറി പി.എം ധനീഷ്, തദ്ദേശസ്വയംഭരണ വകുപ്പ് അസിസ്റ്റന്റ് ഡയറക്ടർ ടി.വി സുഭാഷ്, പാലിയേറ്റീവ് കെയർ ജില്ലാ കോ ഓർഡിനേറ്റർ എ.കെ സനോജ്, എന്നിവർ സംഗമത്തിൽ പങ്കെടുത്തു.