ആലപ്പുഴയിലേക്കുള്ള വിദേശ വിനോദസഞ്ചാരികളുടെ എണ്ണത്തിൽ 95.5 ശതമാനം വർദ്ധന: മന്ത്രി പി എ മുഹമ്മദ് റിയാസ് 

ആലപ്പുഴ അരൂക്കുറ്റിയിലെ നവീകരിച്ച ബോട്ട് ടെർമിനലിന്റെ ഉദ്ഘാടനം ടൂറിസം, പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് ഓൺലൈനായി നിർവഹിച്ചു.

ആലപ്പുഴ ജില്ലയിലെ വിനോദസഞ്ചാര സാധ്യതകൾ കൃത്യമായി ഉപയോഗപ്പെടുത്താനായി വിനോദസഞ്ചാരവകുപ്പ് ആവിഷ്കരിച്ച നിരവധി നവ ടൂറിസം പദ്ധതികളുടെ ഭാഗമായി വിദേശ സഞ്ചാരികളുടെ എണ്ണത്തിൽ മുൻവർഷത്തേക്കാൾ 95.5 ശതമാനത്തിന്റെ വർദ്ധനവുണ്ടായതായി മന്ത്രി പറഞ്ഞു.

ആഭ്യന്തര സഞ്ചാരികളുടെ എണ്ണത്തിൽ മുൻവർഷത്തേക്കാൾ 27.8 ശതമാനം വർദ്ധനവാണ് ഉണ്ടായത്. പുതിയ സംരംഭങ്ങൾ ആരംഭിക്കുന്നതിനോടൊപ്പം നിലവിലുള്ള വിനോദസഞ്ചാരകേന്ദ്രങ്ങൾ പൊതു, സ്വകാര്യ പങ്കാളിത്തത്തോടെ നവീകരിച്ച് പൊതുജനങ്ങൾക്ക് കൂടുതൽ സൗകര്യങ്ങൾ ലഭ്യമാക്കുകയെന്ന കാഴ്ചപ്പാടോടെയാണ് സർക്കാർ മുന്നോട്ടുപോകുന്നത്. ഇതിന്റെ ഭാഗമായി വ്യത്യസ്തമായ പദ്ധതികൾ നടപ്പിലാക്കി വരുന്നുണ്ടെന്നും മന്ത്രി പറഞ്ഞു.

അരൂക്കുറ്റി ബോട്ട് ടെർമിനൽ അങ്കണത്തിൽ നടന്ന ചടങ്ങിൽ ദലീമ ജോജോ എംഎൽഎ അധ്യക്ഷയായി. നമ്മുടെ നാട് ഗംഭീര വളർച്ചയാണ് കഴിഞ്ഞ 10 വർഷത്തിനിടെ നേടിയതെന്ന് എംഎൽഎ പറഞ്ഞു. അരൂർ മണ്ഡലത്തിൽ 10 പാലങ്ങളാണ് സർക്കാർ അനുവദിച്ചത്. നിർമ്മാണം പൂർത്തിയായ വിളക്കുമരം പാലം നവംബർ ആറിന് ഉദ്ഘാടനം ചെയ്യും. പെരുമ്പളംപാലം ഡിസംബറിൽ നാടിന് സമർപ്പിക്കും. നേരെകടവ് മാക്കേക്കടവ് പാലത്തിന്റെ ഉദ്ഘാടനവും ഉടനുണ്ടാകുമെന്നും എംഎൽഎ പറഞ്ഞു.

കേരളത്തിലേക്ക് കൂടുതൽ വിനോദ സഞ്ചാരികളെ ആകർഷിക്കുന്നതിനും പൊതുജനങ്ങൾക്ക് കൂടുതൽ സൗകര്യങ്ങൾ ലഭ്യമാക്കുന്നതിനും നിലവിലുള്ള ടൂറിസം കേന്ദ്രങ്ങൾ സ്വകാര്യ പങ്കാളിത്തത്തിലൂടെ നവീകരിച്ചു വരുന്നതിൻ്റെ ഭാഗമായാണ് അരൂക്കുറ്റി ഹൗസ്‌ബോട്ട് ടെർമിനൽ നവീകരിച്ച്

വിഹാര ബൈ ദിവ്യ എന്ന പേരിൽ സ്വകാര്യ പങ്കാളിത്തത്തോടെയുള്ള സംരംഭം പ്രവർത്തനമാരംഭിച്ചത്. പ്രദേശവാസികൾക്കും സ്വദേശികളും വിദേശികളുമായ വിനോദ സഞ്ചാരികൾക്കും ഏറെ പ്രയോജനപ്പെടുന്ന വിധത്തിലാണ്‌ 50 ലക്ഷം രൂപയോളം മുതൽ മുടക്കി പദ്ധതി വിഭാവനം ചെയ്തിട്ടുള്ളത്‌. മനോഹര ശിൽപ്പങ്ങൾ, ഇരിപ്പിടങ്ങൾ, വൈദ്യുത അലങ്കാരങ്ങൾ, കുട്ടികൾക്കുള്ള കളിയുപകരണങ്ങൾ, ഭിന്നശേഷിക്കാർക്ക് പ്രത്യേക സൗകര്യം, റസ്‌റ്റോറന്റ്, കൾച്ചറൽ സെന്റർ എന്നിവയും ജെറ്റ്സ്‌കീ, കനോയിംഗ്, കയാക്കിംഗ്, സ്പീഡ് ബോട്ട് തുടങ്ങിയ വിവിധ വാട്ടർ സ്പോർട്സ് പ്രവർത്തനങ്ങളും ഇതിൻ്റെ ഭാഗമായി തയ്യാറാക്കിയിട്ടുണ്ട്. കൂടാതെ പുരവഞ്ചി, ശിക്കാര വള്ളം എന്നീ സർവീസുകളും പദ്ധതിയുടെ ഭാഗമായി ആരംഭിക്കും. ജില്ലയിലെ മെഗാ ടൂറിസം സർക്യൂട്ട് പദ്ധതിക്ക് കീഴിൽ പഴയ ബോട്ട് ജെട്ടിയിൽ നാല് വർഷം മുമ്പ് ഏകദേശം 1.5 കോടി രൂപ ചെലവിൽ നിർമിച്ചതാണ് അരൂക്കുറ്റി ബോട്ട് ടെർമിനൽ.

ചടങ്ങിൽ തൈക്കാട്ടുശ്ശേരി ബ്ലോക്ക് പഞ്ചായത്ത് പ്രസിഡന്റ് വി ആർ രജിത, മുൻ എംപി എ എം ആരിഫ്, അരൂക്കുറ്റി ഗ്രാമപഞ്ചായത്ത് പ്രസിഡന്റ് അഷ്റഫ്‌ വെള്ളേഴത്ത്, ബ്ലോക്ക് പഞ്ചായത്തംഗം പി എം പ്രമോദ്, പഞ്ചായത്തംഗം വിദ്യാരാജ്, ഡിടിപിസി ഡെപ്യൂട്ടി ഡയറക്ടർ ഡി വി പ്രഭാത്, ഡിടിപിസി സെക്രട്ടറി കെ ജി അജേഷ്, വിഹാര ബൈ ദിവ്യ സംരംഭ ഉടമ ദിവ്യ സൈജിത്ത് തുടങ്ങിയവർ പങ്കെടുത്തു.