വട്ടവട ഗ്രാമപഞ്ചായത്തില്‍ വികസന സദസ് നടത്തി
വട്ടവട ഗ്രാമപഞ്ചായത്തില്‍ നടപ്പാക്കിയ വികസന പ്രവര്‍ത്തനങ്ങളും ഭാവിവികസനങ്ങളും ചര്‍ച്ചചെയ്ത് വികസന സദസ്. പഞ്ചായത്ത് കമ്മ്യൂണിറ്റി ഹാളില്‍ നടന്ന സദസ് പഞ്ചായത്ത് പ്രസിഡന്റ് ഗണപതിയമ്മാള്‍ ഉദ്ഘാടനം ചെയ്തു.
ഗ്രാമപഞ്ചായത്ത് സെക്രട്ടറി സി. വിനോദ് കുമാര്‍ പഞ്ചായത്തിന്റെ വികസന നേട്ടങ്ങളുടെ റിപ്പോര്‍ട്ട് അവതരിപ്പിച്ചു. കാര്‍ഷിക മേഖലയുടെ ഉന്നമനം ലക്ഷ്യമിട്ട് വിവിധ പദ്ധതികള്‍ ആവിഷ്‌കരിച്ച് നടപ്പിലാക്കിയിട്ടുണ്ടെന്ന് സെക്രട്ടറി പറഞ്ഞു. കൃഷി ധനസഹായമായി കഴിഞ്ഞ നാലുവര്‍ഷംകൊണ്ട് 30 ലക്ഷം രൂപ വകയിരുത്തി. കൂടാതെ വട്ടവട ഗ്രാമപഞ്ചായത്തിന്റെ ഭൂപ്രകൃതിയുടെ പ്രത്യേകത മനസ്സിലാക്കി കാര്‍ഷിക വിളയായ സ്‌ട്രോബെറി കൃഷി ചെയ്യുന്നതിന് പൂനയില്‍ നിന്ന് ഹൈബ്രിഡ് വിത്തിനം നാട്ടിലെത്തിച്ച് കര്‍ഷകര്‍ക്ക് നല്‍കി. ഇതിലൂടെ ചെറിയ സ്‌ട്രോബറി പഴത്തിന് പകരം വലിപ്പം കൂടിയ സ്‌ട്രോബെറി പഴങ്ങള്‍ കൃഷി ചെയ്യാന്‍ കഴിഞ്ഞു. നിലവില്‍ ഏകദേശം 32 ഹെക്ടര്‍ സ്ഥലത്ത് സ്‌ട്രോബറി കൃഷി വ്യാപിപ്പിക്കുന്നതിനും സാധിച്ചു. കൂടാതെ ശീതകാല പച്ചക്കറികളായ ബട്ടര്‍ ബീന്‍സ്, കാബേജ്, ഉരുളക്കിഴങ്ങ്, വെളുത്തുള്ളി ക്യാരറ്റ് മുതലായ ഇനങ്ങള്‍ കൃഷി ചെയ്യുന്നതിന് കൃഷികാര്‍ക്ക് ധനസഹായം നല്‍കുന്നതിന് 10 ലക്ഷം രൂപ വകയിരുത്തിയിട്ടുണ്ടെന്നും സെക്രട്ടറി പറഞ്ഞു.
ലൈഫ് ഭവന പദ്ധതിയില്‍ കഴിഞ്ഞ നാല് സാമ്പത്തിക വര്‍ഷങ്ങളിലായി 570 പേര്‍ക്ക് വീടെന്ന സ്വപ്നം സാക്ഷാത്കരിച്ചു. ലൈഫ് ഭവന പദ്ധതിക്കായി 2025-26 സാമ്പത്തിക വര്‍ഷം വികസന ഫണ്ടും ലോണും ഉള്‍പ്പെടെ 3.96 കോടി വകയിരുത്തിയിട്ടുണ്ട്. ജല്‍ ജീവന്‍ മിഷന്‍ പദ്ധതിയില്‍ പഞ്ചായത്തില്‍ 22 കോടി രൂപയുടെ പദ്ധതിയ്ക്കാണ് രൂപം നല്‍കിയിരിക്കുന്നത്. പദ്ധതിപ്രകാരം 800 കുടുംബങ്ങള്‍ കുടിവെള്ളം ലഭ്യമാകും. ഗ്രാമീണറോഡുകളുടെ പുനരുദ്ധാരണത്തിനായി റോഡ് ഫണ്ട് പ്ലാന്‍ ഫണ്ട്, തനത് ഫണ്ട് ഉള്‍പ്പെടെ 61 ലക്ഷം രൂപ വകയിരുത്തിയിട്ടുണ്ട്. കഴിഞ്ഞ 4 സാമ്പത്തിക വര്‍ഷങ്ങളിലായി 65.59 ലക്ഷം രൂപയുടെ റോഡ് വികസന പ്രവര്‍ത്തികള്‍ പൂര്‍ത്തീകരിച്ചു.
ലൈഫ് മിഷന്‍ വഴി കൂടുതല്‍ പേര്‍ക്ക് വീടുകള്‍ ലഭ്യമാക്കണമെന്ന് പൊതുചര്‍ച്ചയില്‍ അഭിപ്രായം ഉയര്‍ന്നു. റോഡുകളുടെ വികസനം, മെച്ചപ്പെട്ട ശുചീകരണ പ്രവര്‍ത്തനങ്ങള്‍, കൂടുതല്‍ തെരുവ് വിളക്കുകള്‍ സ്ഥാപിക്കല്‍, തൊഴിലുറപ്പ് പദ്ധതിയിലൂടെ കൂടുതല്‍ തൊഴില്‍ തുടങ്ങിയ ആവശ്യങ്ങളും ചര്‍ച്ചയില്‍ ഉയര്‍ന്നു.
വൈസ് പ്രസിഡന്റ് സി. മനോഹരന്‍ അധ്യക്ഷത വഹിച്ചു. സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ പരിമള എന്‍ വി, ഗ്രാമപഞ്ചായത്ത് അസിസ്റ്റന്റ് സെക്രട്ടറി പ്രതീഷ്. പി.ജെ, റിസോഴ്‌സ് പേഴ്‌സണ്‍ സന്തോഷ് കുമാര്‍ എന്നിവര്‍ പങ്കെടുത്തു.
