നൂതന സാങ്കേതിക വിദ്യകൾ കുടുംബശ്രീ സംരംഭകർക്ക് പരിചയപ്പെടുത്തുന്ന കെ ടാപ് പദ്ധതിയുടെ ജില്ലാതല ഉദ്ഘാടനം ജില്ലാപഞ്ചായത്ത് പ്രസിഡന്റ് അഡ്വ. കെ.കെ രത്നകുമാരി നിർവഹിച്ചു. കുടുംബശ്രീ ജില്ലാ മിഷൻ കോ ഓർഡിനേറ്റർ എം.വി ജയൻ അധ്യക്ഷനായി. രാജ്യത്തെ കാർഷിക മേഖലയിൽ ഗവേഷണം നടത്തുന്ന സ്ഥാപനങ്ങളുടെ 184 നൂതന സാങ്കേതിക വിദ്യകൾ കർഷകർക്കും സംരംഭകർക്കും ലഭ്യമാക്കുന്ന പദ്ധതിയാണ് കെ ടാപ് അഥവാ കുടുംബശ്രീ ടെക്നോളജി അഡ്വാൻസ്മെന്റ് പ്രോഗ്രാം. പുതിയ ആശയങ്ങളും സാങ്കേതിക വിദ്യകളുമുപയോഗിച്ച് കാർഷിക മേഖലയിലെ സുസ്ഥിര വികസനമാണ് കെ ടാപ് പദ്ധതിയുടെ ലക്ഷ്യം. ഡയബറ്റിക് ഇൻസ്റ്റന്റ് കേക്ക് മിക്സ്, തേൻ ഉൽപന്നങ്ങൾ, ഹൈ പ്രോട്ടീൻ ലഘു ഭക്ഷണങ്ങൾ, ഷുഗർ ഫ്രീ ബിസ്‌ക്കറ്റ്, ലോ ഗ്ലൈസീമിക് ഇൻഡക്സ് ഉൽപന്നങ്ങൾ, നാച്ചുറൽ ഫുഡ് കളർ, മൾട്ടി ഗ്രെയിൻ ബ്രഡുകൾ, ചെറുധാന്യ ഉൽപന്നങ്ങൾ, മുരിങ്ങ പൗഡർ, വിവിധ തരം ഐസ്‌ക്രീമുകൾ, ഇൻസ്റ്റന്റ് ഫുഡ് മിക്സുകൾ, ഗ്ലൂട്ടൻ ഫ്രീ ഉൽപന്നങ്ങൾ തുടങ്ങി വൈവിധ്യമാർന്ന 180 ഓളം ഉൽപന്നങ്ങൾ തയ്യാറാക്കാൻ കുടുംബശ്രീ സംരംഭകർക്ക് പരിശീലനം നൽകുകയാണ് പദ്ധതിയുടെ പ്രാരംഭ ലക്ഷ്യം. കാർഷിക മേഖലയിൽ ഈ വർഷം ആരംഭിക്കുന്ന കെ ലൈവ് പ്ലസ്, വൺ ഡിസ്ട്രിക്ട് വൺ പ്രൊഡക്റ്റ്, ന്യൂട്രി പാലറ്റ് പദ്ധതികൾക്കും കെ ടാപ് മുതൽക്കൂട്ടാകും.

ശിക്ഷക് സദനിൽ നടന്ന പരിപാടിയിൽ കുടുംബശ്രീ സംസ്ഥാന പ്രോഗ്രാം ഓഫീസർ ഡോ. എസ് ഷാനവാസ് വിഷയാവതരണം നടത്തി. പടിയൂർ, മാലൂർ, തില്ലങ്കേരി, കുറുമാത്തൂർ, പെരിങ്ങോം ഐ എഫ് സികളുടെ നൂറോളം മൂല്യ വർധിത ഉൽപന്നങ്ങളുടെ പ്രദർശന വിപണന മേളയും പുതിയ ഉൽപന്നങ്ങളുടെ പ്രകാശനവും നടന്നു. കുടുംബശ്രീ അസി. കോ ഓർഡിനേറ്റർമാരായ പി.ഒ ദീപ, കെ വിജിത്, കെ രാഹുൽ, ജില്ലാ പ്രോഗ്രാം മാനേജർ സൈജു പത്മനാഭൻ എന്നിവർ പങ്കെടുത്തു.