സുഭിക്ഷ ഭക്ഷ്യസുരക്ഷയുടെ മികച്ച മാതൃക
സുഭിക്ഷ കഫെ സംസ്ഥാന സർക്കാർ നൽകുന്ന ഭക്ഷ്യ സുരക്ഷയുടെ മികച്ച മാതൃകയാണെന്ന് ഭക്ഷ്യ വകുപ്പ് മന്ത്രി ജി.ആർ അനിൽ. തലശ്ശേരി സുഭിക്ഷ കഫെ സന്ദർശിച്ച ശേഷം സംസാരിക്കുകയായിരുന്നു അദ്ദേഹം. സാധാരണക്കാരായ 250 പേർക്ക് ഉപയോഗിക്കാൻ പാകത്തിലാണ് സുഭിക്ഷ കഫെ ആരംഭിച്ചത്. എന്നാൽ ഇപ്പോൾ 600 ഓളം പേരാണ് പ്രതിദിനം കഫെയിൽ നിന്നും ഭക്ഷണം കഴിക്കുന്നത്.
സുഭിക്ഷ എന്ന വാക്ക് അന്വർത്ഥമാക്കുംവിധമാണ് തലശ്ശേരിയിലെ കഫെ പ്രവർത്തിക്കുന്നതെന്നും മന്ത്രി പറഞ്ഞു. ശനിയാഴ്ച ഉച്ചയോടെ കഫെയിൽ എത്തിയ മന്ത്രിയും സ്റ്റാഫ് അംഗങ്ങളും ഭക്ഷണം കഴിച്ചു. ഭക്ഷണത്തെക്കുറിച്ച് പൂർണ തൃപ്തി രേഖപ്പെടുത്തിയാണ് മന്ത്രി മടങ്ങിയത്.
