ലഹരിവിരുദ്ധ ജനകീയ പ്രതിരോധത്തിൻ്റെ ഭാഗമായി ജൂൺ 26 ന് കോഴിക്കോട് ജില്ലയിലെ 20 ലക്ഷം പേരെ പങ്കെടുപ്പിച്ച് '2 മില്യൺ പ്ലഡ്ജ്' സംഘടിപ്പിക്കുന്ന കോഴിക്കോട് ജില്ലാ പഞ്ചായത്തിനും അതിൽ പങ്കെടുക്കുന്ന ജനങ്ങൾക്കും അഭിനന്ദനം അറിയിച്ച് മുഖ്യമന്ത്രി പിണറായി വിജയൻ.

ഈ വർഷത്തെ അന്താരാഷ്ട്ര ലഹരിവിരുദ്ധ ദിനമായ ജൂൺ 26ന് സംസ്ഥാന തലത്തിൽ നടക്കുന്ന ലഹരിവിരുദ്ധ ക്യാമ്പയിൻ അഞ്ചാം ഘട്ടത്തിൻറെ ഉദ്ഘാടനവുമായി ബന്ധപ്പെട്ട് തിരുവനന്തപുരത്ത് ബുധനാഴ്ച നടത്തിയ വാർത്താ സമ്മേളനത്തിലാണ് ജില്ലാ പഞ്ചായത്തിന്റെ ടൂ മില്യൺ പ്ലഡ്ജിനെ മുഖ്യമന്ത്രി അഭിനന്ദിച്ചത്.

തദ്ദേശഭരണ സ്ഥാപനങ്ങളും വിവിധ സംഘടനകളും ജനങ്ങളുടെ മറ്റു കൂട്ടായ്മകളുമെല്ലാം മാതൃകാപരമായ പ്രവർത്തനങ്ങളുമായി ലഹരി വിപത്തിനെതിരെ അണി നിരക്കുകയാണെന്ന് മുഖ്യമന്ത്രി പറഞ്ഞു. കോഴിക്കോട് ജില്ലാ പഞ്ചായത്ത് അതിൻറെ വാർഷിക പരിപാടിയിൽ തന്നെ ലഹരിക്കെതിരെ ജനകീയ ബോധവൽക്കരണവും ജാഗ്രതയും ഉറപ്പു വരുത്താനുള്ള പദ്ധതി ഉൾപ്പെടുത്തിയിരിക്കുകയാണ്.ലഹരിമുക്ത കോഴിക്കോട് എന്ന ഈ സംയോജിത പദ്ധതിയുടെ ഭാഗമായി കോഴിക്കോട് ജില്ലയിലെ 20 ലക്ഷം ആളുകളെ അണിനിരത്തി അന്താരാഷ്ട്ര ലഹരി വിരുദ്ധ ദിനമായ ജൂൺ 26ന് ടു മില്യൺ പ്ലഡ്ജ് എന്ന പേരിൽ ഒരു ജനകീയ പ്രതിജ്ഞ പരിപാടി നടത്തുകയാണ്. ഇത്രയധികം ആളുകളെ പങ്കെടുപ്പിച്ച് കൊണ്ട് നടത്തുന്ന ബൃഹത്തായ ജനകീയ പരിപാടി സംഘടിപ്പിക്കാൻ പോകുന്ന കോഴിക്കോട് ജില്ലാ പഞ്ചായത്തിനും അതിൽ പങ്കു ചേരുന്ന ജനങ്ങൾക്കും അഭിനന്ദനങ്ങൾ നേരുന്നതായി മുഖ്യമന്ത്രി പറഞ്ഞു.

ജൂൺ 26ന് പകൽ 11:30 നാണ് ജില്ലയിലെ 20 ലക്ഷം പേരെ പങ്കെടുപ്പിച്ചുകൊണ്ട് ലഹരിക്കെതിരെ ടു മില്യൻ പ്ലഡ്ജ് സംഘടിപ്പിക്കുക.