മാലിന്യമുക്തം നവകേരളം ജനകീയ ക്യാമ്പയിൻ പ്രവർത്തനങ്ങളിലൂടെ ഹരിതജില്ല പദവി ഇടുക്കിക്ക് സ്വന്തം. ഇത് സംബന്ധിച്ച പ്രഖ്യാപനം ജലവിഭവ വകുപ്പ് മന്ത്രി റോഷി അഗസ്റ്റിൻ നിർവഹിച്ചു. മാലിന്യമുക്ത നവകേരളം എന്നത് ഈ സർക്കാരിന്റെ നയമാണ്. അത് നമ്മൾ ഏറ്റെടുക്കുകയാണെന്ന് അദ്ദേഹം പറഞ്ഞു. ഇന്ന് ലോകം നേരിടുന്ന ഏറ്റവും വലിയ പ്രശ്നം മാലിന്യനിർമാർജനമാണ് . നഗരവത്കരണത്തിൻ്റെയും വ്യവസായികവത്കരണത്തിൻ്റെയും വളർച്ചയുടെ വഴിയിൽ നാടും നഗരവും മാലിന്യമുക്തമാകുന്നത് പെട്ടെന്ന് ശ്രദ്ധയിൽപ്പെടില്ല. നാടും നഗരവും ഒരുപോലെ ഈ വിഷയത്തിൽ ശ്രദ്ധിക്കുമ്പോൾ മാത്രമേ കേരളം ലക്‌ഷ്യം നേടുകയുള്ളു. തദ്ദേശ സ്വയംഭരണ സ്ഥാപനങ്ങൾ, വ്യാപാരസ്ഥാപനങ്ങൾ , കോളജുകൾ, സ്കുളുകൾ, ഓഫീസുകൾ തുടങ്ങി വിവിധ സ്ഥാപനങ്ങളുടെ കൂട്ടായ പ്രവർത്തനത്തിൻ്റെ ഫലമായാണ് ജില്ലയെ മാലിന്യമുക്തമാക്കാൻ സാധിച്ചതെന്നും അദ്ദേഹം കൂട്ടിച്ചേർത്തു. ശുചിത്വമുള്ള സമൂഹത്തിലൂടെ മാത്രമേ സാംക്രമിക രോഗങ്ങൾ, പകർച്ചവ്യാധികൾ, ജലജന്യ രോഗങ്ങളെ എന്നിവയെ തടയാൻ കഴിയുവെന്നും അദ്ദേഹം പറഞ്ഞു. പരിപാടിയിൽ ജില്ലാ കളക്ടർ വി.വിഗ്നേശ്വരി മുഖ്യ പ്രഭാഷണം നടത്തി.

2024 ഒക്ടോബർ 2 ന് ആരംഭിച്ച മാലിന്യ മുക്തം നവകേരളം ജനകീയ ക്യാമ്പയിൻ പ്രവർത്തനങ്ങളിലൂടെ 2025 മാർച്ച് 30 ന് അകം 2432 ഹരിത സ്ഥാപനങ്ങൾ,586 ഹരിത വിദ്യാലയങ്ങൾ, 56 ഹരിത കലാലയങ്ങൾ, 11244 ഹരിത അയൽ കൂട്ടങ്ങൾ, 211 ഹരിത സുന്ദര ടൗണുകൾ, 180 വൃത്തിയുള്ള പൊതുസ്ഥലങ്ങൾ, 59 ഹരിത ടൂറിസ്റ്റ് കേന്ദ്രങ്ങൾ എന്നിവ ലക്ഷ്യം കൈവരിച്ചു. 40 ഓളം ഹരിത അവാർഡുകളും ചടങ്ങിൽ വിതരണം ചെയ്തു. മികച്ച ഹരിത ഗ്രാമപഞ്ചായത്തായി ഇരട്ടയാർ ഗ്രാമപഞ്ചായത്തിനെ തിരഞ്ഞെടുത്തു. മികച്ച പ്രത്യേക ഹരിത ഗ്രാമപഞ്ചായത്ത് പുരസ്കാരം രാജകുമാരി, ഉടുമ്പന്നൂർ ഗ്രാമപഞ്ചായത്തുകൾ നേടി. മികച്ച ഹരിത നഗരസഭ കട്ടപ്പന, മികച്ച ഹരിത ബ്ലോക്ക് പഞ്ചായത്തായി കട്ടപ്പനയും പ്രത്യേക ഹരിത ബ്ലോക്ക് പഞ്ചായത്ത് പുരസ്കാരം നെടുംങ്കണ്ടവും നേടി. കുടുംബശ്രീ അംഗങ്ങളുടെയും ഹരിത കർമ്മ സേന അംഗങ്ങളും അവതരിപ്പിച്ച വിവിധ കലാപരിപാടികളും അരങ്ങേറി.

ചെറുതോണി ടൗൺ ഹാളിൽ ചേർന്ന യോഗത്തിൽ ജില്ലാപഞ്ചായത്ത് പ്രസിഡന്റ് രാരിച്ചൻ നീർണാംകുന്നേൽ അധ്യക്ഷത വഹിച്ചു. തദ്ദേശസ്വയം ഭരണ വകുപ്പ് ജോയിന്റ് ഡയറക്ടർ ട്രീസ ജോസ് റിപ്പോർട്ട് അവതരിപ്പിച്ചു. ത്രിതല പഞ്ചായത്ത് അംഗങ്ങളായ ബീന ടോമി, ആൻസി തോമസ്, ഉഷാകുമാരി മോഹൻ കുമാർ, കെ. ജി സത്യൻ, എം. ലതീഷ്, ഡിറ്റാജ് ജോസഫ്, നിമ്മി ജയൻ, ജില്ലാ പഞ്ചായത്ത് സെക്രട്ടറി പി.കെ സജീവ്, നവകേരളം കർമ്മ പദ്ധതി ജില്ലാ കോർഡിനേറ്റർ ഡോ.അജയ് പി കൃഷ്ണ, ശുചിത്വ മിഷൻ ജില്ലാ കോർഡിനേറ്റർ ഭാഗ്യരാജ് കെ. ആർ, തദ്ദേശ സ്വയം .ഭരണ അസിസ്റ്റൻ്റ് ഡയറക്ടർ സി. ശ്രീലേഖ എന്നിവർ സംസാരിച്ചു.