പ്ലാസ്റ്റിക് മുക്ത വേമ്പനാട്: മെഗാശുചീകരണം തുടങ്ങി

* വേമ്പനാട് കായൽ പുനരുജ്ജീവനം ആലപ്പുഴയെ വീണ്ടെടുക്കാനുള്ള ശ്രമം: പി.പി ചിത്തരഞ്ജൻ എംഎൽഎ
പ്ലാസ്റ്റിക് മുക്ത വേമ്പനാട് എന്ന ലക്ഷ്യത്തോടെ ജില്ലാ ഭരണകൂടവും തദ്ദേശസ്വയംഭരണ സ്ഥാപനങ്ങളും ചേർന്ന് സംഘടിപ്പിച്ച മെഗാ ശുചീകരണ കാമ്പയിൻ തുടങ്ങി. ആലപ്പുഴയെ വീണ്ടെടുക്കാനുള്ള ശ്രമമാണ് വേമ്പനാട് കായൽ പുനരുജ്ജീവനമെന്ന് പി പി ചിത്തരഞ്ജൻ എംഎൽഎ പറഞ്ഞു. പ്ലാസ്റ്റിക് മുക്ത വേമ്പനാട് മെഗാ ശുചീകരണ കാമ്പയിൻ പുന്നമട ഫിനിഷിംഗ് പോയിന്റിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
തദ്ദേശസ്വയംഭരണ സ്ഥാപനങ്ങളും ജനപ്രതിനിധികളും ഫണ്ട് കണ്ടെത്തി ജനകീയ പങ്കാളിത്തത്തോടെ വേമ്പനാട് കായൽസംരക്ഷണ പ്രവർത്തനം നടത്തണം. വേമ്പനാട് കായലിലും കരയിലും മാറ്റം ഉണ്ടാക്കാൻ ആലപ്പുഴയൊന്നാകെ മുന്നിട്ടിറങ്ങുന്ന ഈ ജനകീയ കാമ്പയിനിലൂടെ കഴിയും. വേമ്പനാട് കായൽ സംരക്ഷണത്തിന് ജനകീയ പങ്കാളിത്തം ഉറപ്പുവരുത്തുകയും മുന്നിട്ടിറങ്ങുകയും ചെയ്ത ജില്ലാ ഭരണകൂടത്തെ അഭിനന്ദിക്കുന്നതായും എംഎൽ പറഞ്ഞു.
എച്ച് സലാം എംഎൽഎ ശുചിത്വപ്രതിജ്ഞ ചൊല്ലിക്കൊടുത്തു. വേമ്പനാട് കായൽ സംരക്ഷണം തുടർപ്രവർത്തനമാക്കി മാറ്റണം. മണ്ണും വെള്ളവും ഒക്കെ സംരക്ഷിക്കേണ്ട ബാധ്യത മനുഷ്യനുണ്ട്. കായൽസംരക്ഷണവും തോട് ശുചീകരണവുമൊക്കെ വികസനപ്രവർത്തനങ്ങളുടെ ഭാഗമാകണമെന്നും അദ്ദേഹം പറഞ്ഞു.
നഗരസഭ ചെയർപെഴ്സൺ കെ കെ ജയമ്മ അധ്യക്ഷത വഹിച്ചു. വേമ്പനാട് കായൽ നാശത്തിന്റെ വക്കിലാണെന്നും പ്ലാസ്റ്റിക് മാലിന്യങ്ങൾ മൂലം മത്സ്യസമ്പത്ത് വൻതോതിൽ കുറഞ്ഞതായും അവർ പറഞ്ഞു.
ജില്ലാ കളക്ടർ അലക്സ് വർഗീസ്, സബ് കളക്ടർ സമീർ കിഷൻ, അന്തർദേശീയ കായൽ ഗവേഷണ കേന്ദ്രം ഡയറക്ടർ കെ ജി പത്മകുമാർ, നഗരസഭ കൗൺസിലർമാരായ എം ആർ പ്രേം, പി റഹിയാനത്ത്, ഹെലൻ ഫെർണാണ്ടസ്, എ എസ് കവിത, ഡിവൈഎസ്പി മധു ബാബു, മറ്റ് തദ്ദേശസ്ഥാപന പ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.
ശുചീകരണപ്രവർത്തനങ്ങളുടെ ഫ്ളാഗ് ഓഫ് കർമ്മം പി പി ചിത്തരഞ്ജൻ എം എൽ എ നിർവഹിച്ചു. മൽസ്യത്തൊഴിലാളികൾ, ഹരിത കർമ്മസേനാംഗങ്ങൾ, കുടുംബശ്രീ പ്രവർത്തകർ, എസ് ഡി കോളേജ്, സെൻറ് ജോസഫ്സ് കോളേജ്, ലജനത്തുൽ മുഹമ്മദീയ സ്കൂൾ എന്നിവിടങ്ങളിൽ നിന്നുള്ള എൻ സി സി കേഡറ്റുകൾ, എൻ എസ് എസ് വോളണ്ടിയർമാർ, ശുചിത്വമിഷൻ ജീവനക്കാർ, നഗരസഭ ശുചീകരണ തൊഴിലാളികൾ, ഡിറ്റിപിസി ജീവനക്കാർ, ഹൗസ് ബോട്ട് ഉടമ അസോസിയേഷൻ പ്രവർത്തകർ, സോൾജിയേഴ്സ് ഓഫ് ഈസ്റ്റ് വെനീസ്, എ ഡി ആർ എഫ്, കെയർ ഫോർ ആലപ്പി, വാപ് പുറക്കാട് എന്നീ സന്നദ്ധസംഘടനകളിലെ പ്രവർത്തകരും ശുചീകരണ യജ്ഞത്തിൽ പങ്കാളികളായി. പുന്നമട സ്പോർട്സ് അതോറിറ്റി ഓഫ് ഇന്ത്യ കേന്ദ്രത്തിലെ 75 ഓളം കനോയിങ്, കയാക്കിങ് വിദ്യാർഥികൾ രാവിലെ 7 ന് തന്നെ പുന്നമട ജെട്ടിയിൽ നിന്ന് ശുചീകരണം ആരംഭിച്ചിരുന്നു. ഉദ്ഘാടന ചടങ്ങിന് ശേഷം 50 ഓളം വള്ളങ്ങളിൽ മൽസ്യത്തൊഴിലാളികൾ റോസ് പവലിയൻ മുതൽ കുരിശടി വരെ വള്ളങ്ങളിലും മറ്റുള്ള സന്നദ്ധപ്രവർത്തകർ കരയിലും ശുചീകരണപ്രവർത്തനങ്ങൾ ആരംഭിച്ചു. കാമ്പയിന്റെ ഭാഗമായി ജില്ലയിലെ ബാക്കി 11 കേന്ദ്രങ്ങളിലും രാവിലെ 7.30 മുതൽ തദ്ദേശസ്ഥാപനങ്ങളുടെ നേതൃത്വത്തിൽ പ്ലാസ്റ്റിക് നിർമാർജന പ്രവർത്തനങ്ങൾ ആരംഭിച്ചിരുന്നു. സന്നദ്ധപ്രവർത്തകർക്ക് കുടിവെള്ളം, പ്രാതൽ തുടങ്ങിയവ ശുചീകരണ കേന്ദ്രങ്ങളിൽ ഒരുക്കിയിരുന്നു.