ലോക ഹെപ്പറ്റൈറ്റിസ് ദിനത്തിന്റെ സംസ്ഥാനതല ഉദ്ഘാടനം തിരുവനന്തപുരം ഗവൺമെന്റ് ആർട്സ് കോളജിൽ ഗതാഗത മന്ത്രി ആന്റണി രാജു നിർവഹിച്ചു. 2030 ഓടെ ഹെപ്പറ്റൈറ്റിസ് ലോകത്ത് നിന്നു നിവാരണം ചെയ്യുക എന്ന സുസ്ഥിരവികസന ലക്ഷ്യത്തിലെത്തുന്നതിനായി പുതുതായി രോഗം ഉണ്ടാകാതെ സൂക്ഷിക്കുകയും അതുവഴി രോഗ വർധന തടയുകയും ചെയ്യണമെന്നും മന്ത്രി പറഞ്ഞു. ഹെപ്പറ്റൈറ്റിസ് രോഗം മൂലമുള്ള മരണം പടിപടിയായി കുറച്ചു കൊണ്ടു വരണം. ഈ ലക്ഷ്യം നേടാൻ ജനനത്തിൽ തന്നെ എല്ലാ കുഞ്ഞുങ്ങൾക്കും ഹെപ്പറ്റൈറ്റിസ് ബി-യ്ക്ക് എതിരായ പ്രതിരോധ കുത്തിവയ്പ് നൽകുന്നുണ്ടെന്ന് ഉറപ്പ് വരുത്തണമെന്നും മന്ത്രി നിർദ്ദേശിച്ചു.

ബോധവത്ക്കരണ പരിപാടികളുടെ ഭാഗമായി പപ്പറ്റ് ഷോ സംഘടിപ്പിച്ചു. തുടർന്ന് നടന്ന ബോധവത്കരണ സെമിനാറിൽ തിരുവനന്തപുരം ജനറൽ ആശുപത്രിയിലെ ഗാസ്ട്രോ എൻട്രോളജി കൺസൾട്ടന്റ് ഡോ. പൊന്നി കൃഷ്ണൻ ഹെപ്പറ്റൈറ്റിസ് രോഗബാധയിലേക്ക് നയിക്കുന്ന സാഹചര്യങ്ങളെക്കുറിച്ചും സ്വീകരിക്കേണ്ട പ്രതിരോധ നടപടികളെക്കുറിച്ചും വിശദീകരിച്ചു. ദിനാചരണത്തോടനുബന്ധിച്ച് ഹെപ്പറ്റൈറ്റിസ്, എച്ച്. ഐ. വി. രോഗബാധാ പരിശോധന ക്യാമ്പും കോളജിൽ സംഘടിപ്പിച്ചു.

ആരോഗ്യ വകുപ്പും തിരുവനന്തപുരം ഗവൺമെന്റ് ആർട്സ് കോളജ് എൻ.എസ്.എസ്. യൂണിറ്റും സംയുക്തമായാണ് ദിനാചരണം സംഘടിപ്പിച്ചത്. തൈക്കാട് വാർഡ് കൗൺസിലർ ജി. മാധവദാസ് അധ്യക്ഷത വഹിച്ചു. ആരോഗ്യവകുപ്പ് ഡയറക്ടർ ഡോ. കെ. ജെ. റീന, കുടുംബക്ഷേമ വിഭാഗം അഡീഷണൽ ഡയറക്ടർ ഡോ. വി. മീനാക്ഷി, പൊതുജനാരോഗ്യ വിഭാഗം അഡീഷണൽ ഡയറക്ടർ ഡോ. കെ. സക്കീന, തുടങ്ങിയവർ പങ്കെടുത്തു.