കണയങ്കവയലിലെ കുട്ടികള്‍ക്ക് കളിയിടം തിരികെ കിട്ടി
ഇടുക്കി കണയങ്കവയലിലെ കുട്ടികള്‍ക്ക് അവരുടെ പ്രിയപ്പെട്ട കളിയിടം തിരികെ കിട്ടി. കാട് മൂടിക്കിടന്ന പെരുവന്താനം കണയങ്കവയലിലെ മൈതാനമാണ് ഗ്രാമപഞ്ചായത്ത് പ്രസിഡന്റ് ഡോമിന സജിയുടെ നേതൃത്വത്തില്‍ നവീകരിച്ച് കുട്ടികള്‍ക്ക് നല്‍കിയത്. കളിക്കളങ്ങള്‍ നഷ്ടമായ നാടുകള്‍ക്ക് മാതൃകയാവുകയാണ് പെരുവന്താനം പഞ്ചായത്തും കണങ്കവയലിലെ കളിമൈതാനവും.
പഞ്ചായത്തിലെ കുട്ടികള്‍ക്കും യുവജനങ്ങള്‍ക്കും കളികളില്‍ ഏര്‍പ്പെടാനുള്ള അന്തരീക്ഷം ഒരുക്കാന്‍ മുന്നിട്ടിറങ്ങേണ്ട ആവശ്യകത മനസിലാക്കി ആസ്തി വികസന ഫണ്ടില്‍ നിന്നും 2.5 ലക്ഷം രൂപ വിനിയോഗിച്ച് കാട് മൂടികിടന്ന മൈതാനം വെട്ടിത്തെളിച്ച് നവീകരണപ്രവര്‍ത്തനങ്ങള്‍ നടത്തുകയായിരുന്നു. തുടര്‍ന്ന് മൈതാനത്ത് പോസ്റ്റുകള്‍ സ്ഥാപിക്കുകയും നെറ്റുകള്‍ സജ്ജീകരിക്കുകയും ചെയ്തു. കൂടാതെ വോളിബോള്‍, ഫുട്ബോള്‍, ക്രിക്കറ്റ് എന്നിവയ്ക്ക് ആവശ്യമായ ഉപകരണങ്ങളും പഞ്ചായത്ത് പ്രസിഡന്റ് കുട്ടികള്‍ക്ക് വാങ്ങി നല്‍കി.
കുട്ടികളുടെ വളര്‍ച്ചയിലും വ്യക്തിത്വ വികാസത്തിലും കളിയുടെ പ്രാധാന്യം തള്ളിക്കളയാനാവില്ലെന്നും ആരോഗ്യവും കായികക്ഷമതയും വര്‍ധിപ്പിച്ച് കുട്ടികള്‍ക്കും യുവജനങ്ങള്‍ക്കും അവരുടെ കര്‍മമണ്ഡലത്തില്‍ മികവ് പുലര്‍ത്താന്‍ അവസരമൊരുക്കേണ്ടത് അത്യന്താപേക്ഷിതമാണെന്നും പഞ്ചായത്ത് പ്രസിഡന്റ് പറഞ്ഞു. കണയങ്കവയലിലെ മൈതാനത്ത് നിന്നും ഉയരുന്ന കുട്ടികളുടെ ആരവം അങ്ങിനെ ഒരു നാടിന് തന്നെ ഉണര്‍വ് പകരുകയാണ്.
