പാലക്കാട് ജില്ലയിലെ പുതുക്കോട് ഗ്രാമപഞ്ചായത്തിന് കീഴില്‍ വനിതാ വ്യവസായ കേന്ദ്രത്തില്‍ എല്‍.ഇ.ഡി ബള്‍ബ് നിര്‍മ്മാണ യൂണിറ്റ് ആരംഭിച്ച് കുടുംബശ്രീ സി.ഡി.എസ് വനിതാ കൂട്ടായ്മ. ജില്ലാ പഞ്ചായത്ത് 2022-2023 വാര്‍ഷിക പദ്ധതിയില്‍ ഉള്‍പ്പെടുത്തിയാണ് യൂണിറ്റ് ആരംഭിച്ചത്. ഒന്‍പത്, 16, 24, 30 വാട്ടുകളിലുള്ള എല്‍.ഇ.ഡി ബള്‍ബുകള്‍, ഒന്‍പത് വാട്ട് ഇന്‍വര്‍ട്ടര്‍, അഞ്ച് വാട്ട് ടി ട്യൂബ്, 6, 10, 20 വാട്ടുകളില്‍ ട്യൂബ് ലൈറ്റ്, മാല ബള്‍ബ് തുടങ്ങിയവയാണ് നിര്‍മ്മിക്കുന്നത്.

ഒന്‍പത് വാട്ട് എല്‍.ഇ.ഡി ബള്‍ബിന് 80 രൂപ മുതലും ഇന്‍വര്‍ട്ടറിന് 350 രൂപ, ടി ട്യൂബിന് 150 രൂപ എന്നിങ്ങനെ നിരക്കിലാണ് ഗ്രാമദീപം ബള്‍ബുകള്‍ വില്‍പനയ്ക്ക് എത്തിക്കുന്നത്. വിപണിയിലെ മറ്റ് ബ്രാന്‍ഡുകളെ അപേക്ഷിച്ച് വിലക്കുറവിലും ഗുണമേന്മയിലുമാണ് ഉത്പ്പന്നങ്ങള്‍ എത്തുന്നത്. കടകളില്‍ എത്തുന്നതിനോടൊപ്പം നേരിട്ടും വില്‍പന നടത്തും.

ഗ്രാമപഞ്ചായത്തിലെ 10 പേരടങ്ങുന്ന സംഘം ബൾബ് നിർമാണത്തിൽ പരിശീലനം പൂര്‍ത്തിയാക്കിയിരുന്നു. ഇതില്‍ അഞ്ചു പേരായ, കെ. നസീമ, സി. രഞ്ജിഷ, സി. പ്രീത, ബിന്ദു പരമേശ്വരന്‍, അഫ്‌സത്ത് എന്നിവര്‍ ചേര്‍ന്നാണ് ഗ്രാമദീപം എന്ന പേരില്‍ എല്‍.ഇ.ഡി ബള്‍ബ് നിര്‍മാണ യൂണിറ്റ് ആരംഭിച്ചത്. കുടുംബശ്രീ ജില്ലാ മിഷന്റെ നേതൃത്വത്തില്‍ എറണാകുളത്ത് നിന്നെത്തിയ സംഘമാണ് ഇവര്‍ക്ക് പരിശീലനം നല്‍കിയത്. എറണാകുളത്ത് നിന്നാണ് നിര്‍മ്മാണത്തിന് ആവശ്യമായ സാധനങ്ങള്‍ എത്തിക്കുന്നത്. എല്‍.ഇ.ഡി ബള്‍ബ് നിര്‍മ്മാണ യൂണിറ്റിന്റെ ഉദ്ഘാടനം പി.പി സുമോദ് എം.എല്‍.എ നിര്‍വഹിച്ചു.