തദ്ദേശസ്വയംഭരണ സ്ഥാപനങ്ങളിൽ വാർഷിക പദ്ധതികൾ സമയബന്ധിതമായി നടപ്പാക്കുന്നുവെന്ന് ഉറപ്പാക്കുന്നതോടൊപ്പം 2023-24 വർഷത്തെ സമഗ്ര വാർഷിക പദ്ധതി ആസൂത്രണം വേഗത്തിലാക്കി 2023 ജനുവരിയോടെ ആസൂത്രണ സമിതിയുടെ അംഗീകാരം നേടുന്ന രീതിയിൽ ക്രമീകരിക്കണമെന്ന് ജില്ലാ ആസൂത്രണ സമിതി യോഗം നിർദേശിച്ചു. പദ്ധതി പ്രവർത്തനം വിലയിരുത്താൻ തദ്ദേശ സ്വയംഭരണ സ്ഥാപനങ്ങളിൽ മാസത്തിൽ രണ്ടുതവണ സ്ഥിരംസമിതി അധ്യക്ഷരുടെ യോഗം ചേരാൻ ജില്ലാ ആസൂത്രണ സമിതി അധ്യക്ഷ പി പി ദിവ്യ നിർദേശം നൽകി. പദ്ധതികൾ കൃത്യമായി നടപ്പാക്കാൻ പദ്ധതി കലണ്ടർ നിർമിച്ച് പ്രവർത്തനങ്ങൾ മുന്നോട്ടുപോകണം. 2023 ജനുവരി 16നകം ഗ്രാമ പഞ്ചായത്തുകളുടെ വാർഷിക പദ്ധതികൾക്കും 23നകം ബ്ലോക്ക്, ജില്ലാ പഞ്ചായത്തിന്റെയും വാർഷിക പദ്ധതികൾക്കും ജില്ലാ ആസൂത്രണ സമിതി അംഗീകാരം നൽകും.

ബ്ലോക്കുതല അവലോകന യോഗങ്ങളിൽ ഉന്നയിക്കപ്പെടുന്ന വിഷയങ്ങളിൽ വകുപ്പുകളുടെ ജില്ലാ മേധാവികൾ അടുത്ത ഡി പി സി യോഗത്തിൽ നടപടി റിപ്പോർട്ട് സമർപ്പിക്കണം. തദ്ദേശസ്വയംഭരണ സ്ഥാപനങ്ങളിലെ റോഡുകളുടെ ടാറിങ് പ്രവൃത്തി ഡബിൾ ബാരൽ മെഷീൻ ഉപയോഗിച്ച് ചെയ്യണമെന്ന് സർക്കാർ നിർദേശം പ്രായോഗികമായി നടപ്പാക്കാനാകില്ലെന്ന് ചൂണ്ടിക്കാട്ടി കോൺട്രാക്ടർമാർ ബഹിഷ്‌കരിക്കരണം നടത്തുകയാണ്. ഇത് അനന്തമായി നീളുന്നതിനാൽ അടിയന്തര നടപടി സ്വീകരിക്കാൻ സർക്കാരിലേക്ക് കത്തയക്കാനും ഡി പി സി യോഗം തീരുമാനിച്ചു.

വൃക്ക രോഗികൾക്ക് ധനസഹായം നൽകുന്ന പദ്ധതികൾ സർക്കാർ നിർദേശ പ്രകാരം മെഡിക്കൽ ഓഫീസർമാർ സമയബന്ധിതമായി നടപ്പാക്കാനും യോഗം നിർദേശിച്ചു. സംസ്ഥാന കേരളോത്സവം കണ്ണൂരിൽ നടക്കുമെന്നും ജില്ലാ കേരളോത്സവം ഡിസംബർ 10 മുതൽ ആരംഭിക്കുമെന്നും യോഗത്തിൽ അറിയിച്ചു. മികച്ച രീതിയിൽ നടത്തുന്നതിന്റെ ഭാഗമായി ബ്ലോക്ക് തലങ്ങളിൽ കേരളോത്സവം ഡിസംബർ അഞ്ചിനകം പൂർത്തിയാക്കണമെന്നും തദ്ദേശ സ്വയംഭരണ സ്ഥാപനങ്ങൾക്ക് നിർദേശം നൽകി.

തദ്ദേശ സ്വയംഭരണ വകുപ്പ് മന്ത്രി എം ബി രാജേഷിന്റെ അധ്യക്ഷതയിൽ തദ്ദേശസ്വയംഭരണ സ്ഥാപനങ്ങളിലെ പദ്ധതികളുടെ അവലോകന യോഗം നവംബർ 25ന് രാവിലെ 10ന് ജില്ലാ പഞ്ചായത്ത് കോൺഫറൻസ് ഹാളിൽ നടക്കും. നഗരസഞ്ചയ പദ്ധതികൾക്കായി കൈപ്പറ്റിയ ഫണ്ട് തദ്ദേശ സ്ഥാപനങ്ങൾ ഫലപ്രദമായി വിനിയോഗിക്കണമെന്ന് മേയർ അഡ്വ. ടി ഒ മോഹനൻ പറഞ്ഞു. യോഗത്തിൽ 20 തദ്ദേശ സ്വയംഭരണ സ്ഥാപനങ്ങളിലെ പദ്ധതികൾ ഭേദഗതിയോടെ അംഗീകരിച്ചു.