അതിദരിദ്രരെ കണ്ടെത്തുന്നതിനുള്ള ഫോക്കസ് ഗ്രൂപ്പ് യോഗങ്ങള്‍ക്ക് ജില്ലയില്‍ തുടക്കം
തൃശൂര്‍: സമൂഹത്തിലെ അതിദരിദ്രരെ കണ്ടെത്തുന്നതിനുള്ള നിര്‍ണായക ഫോക്കസ് ഗ്രൂപ്പ് യോഗങ്ങള്‍ക്ക് ജില്ലയില്‍ തുടക്കം. പദ്ധതിയില്‍ ഉള്‍പ്പെടേണ്ടവരുടെ വാര്‍ഡ് തല പട്ടിക തയ്യാറാക്കുന്ന ഫോക്കസ് ഗ്രൂപ്പ് യോഗങ്ങളാണ് ജില്ലയിലെ തദ്ദേശ സ്ഥാപന വാര്‍ഡുകളില്‍ ചേര്‍ന്നത്.
സാമൂഹിക, സന്നദ്ധ പ്രവര്‍ത്തകരുടെയും കുടുംബശ്രീ, അയല്‍ക്കൂട്ടം പ്രതിനിധികളുടെയും പ്രത്യേകം ഫോക്കസ് ഗ്രൂപ്പുകള്‍ ചേര്‍ന്നാണ് വാര്‍ഡ്- ഡിവിഷന്‍ തലങ്ങളില്‍ ആദ്യഘട്ട പട്ടിക തയ്യാറാക്കുന്നത്. വാര്‍ഡ് ജനപ്രതിനികള്‍, പഞ്ചായത്ത് തല ഉദ്യോഗസ്ഥര്‍, നേരത്തെ പരിശീലനം പൂര്‍ത്തിയാക്കിയ എന്യൂമറേറ്റര്‍മാര്‍ എന്നിവരുടെ നേതൃത്വത്തിലാണ് യോഗം ചേര്‍ന്നത്. ഫോക്കസ് ചര്‍ച്ചയിലൂടെ തയ്യാറാക്കിയ അതിദരിദ്രരുടെ വാര്‍ഡ് തല പട്ടിക ഇന്ന് (നവംബര്‍ 29) ചേരുന്ന വാര്‍ഡ് തല സമിതികള്‍ പരിശോധിച്ച് അന്തിമമാക്കും. ഫീല്‍ഡ് തലത്തില്‍ വിവര ശേഖരണം നടത്തുന്നതിനാവശ്യമായ അന്തിമ പട്ടികയാണ് വാര്‍ഡ്- ഡിവിഷന്‍ തലത്തില്‍ തയ്യാറാക്കുക.
കയ്പമംഗലം
ജില്ലയിലെ അതിദരിദ്രരെ കണ്ടെത്താനുള്ള ഫോക്കസ് ഗ്രൂപ്പ് യോഗത്തിന്റെ കയ്പമംഗലം മണ്ഡലതല ഉദ്ഘാടനം പെരിഞ്ഞനം പഞ്ചായത്തിലെ രണ്ടാം വാര്‍ഡില്‍
ഇ ടി ടൈസണ്‍ മാസ്റ്റര്‍ എംഎല്‍എ നിര്‍വഹിച്ചു. പെരിഞ്ഞനത്ത് വിവിധ വാര്‍ഡുകളില്‍ നടന്ന ഫോക്കസ് ചര്‍ച്ചകളില്‍ മതിലകം ബ്ലോക്ക് പഞ്ചായത്ത് പ്രസിഡന്റ് സി കെ ഗിരിജ, ബ്ലോക്ക് പഞ്ചായത്ത് സെക്രട്ടറി വിജയ, പഞ്ചായത്ത് വൈസ് പ്രസിഡന്റ് സായിദ മുത്തുക്കോയ തങ്ങള്‍, ബ്ലോക്ക് പഞ്ചായത്തംഗം ആര്‍ കെ ബേബി, ബ്ലോക്ക് കോര്‍ഡിനേറ്റര്‍ ഉണ്ണികൃഷ്ണന്‍, പഞ്ചായത്ത് കോര്‍ഡിനേറ്റര്‍ ഷീന എന്നിവര്‍ സംസാരിച്ചു.
കൊടുങ്ങല്ലൂര്‍
കൊടുങ്ങല്ലൂര്‍ മണ്ഡലതല ഉദ്ഘാടനം കൊടുങ്ങല്ലൂര്‍ നഗരസഭ മൂന്നാം വാര്‍ഡില്‍ അഡ്വ.വി ആര്‍ സുനില്‍കുമാര്‍ എംഎല്‍എ നിര്‍വ്വഹിച്ചു. ചര്‍ച്ചകളില്‍ നഗരസഭ ചെയര്‍പേഴ്സണ്‍ എം യു ഷിനിജ, വാര്‍ഡ് കൗണ്‍സിലര്‍ ചന്ദ്രന്‍ കളരിക്കല്‍, നഗരസഭ സെക്രട്ടറി, കോര്‍ഡിനേറ്റര്‍മാര്‍ എന്നിവരും പങ്കെടുത്തു. പദ്ധതിയുടെ ഭാഗമായി ബ്ലോക്ക് പഞ്ചായത്തിന്റെയും നഗരസഭയുടെയും കീഴിലുള്ള എല്ലാ വാര്‍ഡുകളിലും സാമൂഹിക സംഘടന പ്രവര്‍ത്തകരുടെ നേതൃത്വത്തിലാണ് ഫോക്കസ് ഗ്രൂപ്പ് ചര്‍ച്ചകള്‍ സംഘടിപ്പിച്ചത്.
പറപ്പൂക്കര
അതിദരിദ്രരെ കണ്ടെത്തല്‍ പ്രക്രിയയുടെ ഭാഗമായി പറപ്പൂക്കര ഗ്രാമപഞ്ചായത്തില്‍ ചേര്‍ന്ന ഫോക്കസ് ഗ്രൂപ്പ് ചര്‍ച്ചകളുടെ ഉദ്ഘാടനം വാര്‍ഡ് ഒമ്പത് ആലത്തൂര്‍ നോര്‍ത്തില്‍ ജില്ലാ പഞ്ചായത്ത് പ്രസിഡന്റ് പി കെ ഡേവിസ് മാസ്റ്റര്‍ ഉദ്ഘാടനം ചെയ്തു. പറപ്പൂക്കര പഞ്ചായത്ത് പ്രസിഡന്റ് ഇ കെ അനൂപ് അധ്യക്ഷനായി. ആര്‍ ആര്‍ ടി വളണ്ടിയര്‍മാര്‍, സന്നദ്ധ പ്രവര്‍ത്തകര്‍, ക്ലബ് ഭാരവാഹികള്‍ എന്നിവര്‍ പങ്കെടുത്തു. ബ്ലോക്ക് മെമ്പര്‍ കവിത സുനില്‍, പഞ്ചായത്ത് അസിസ്റ്റന്റ് സെക്രട്ടറി ടി കെ സുരേഷ് കുമാര്‍, വി ഇ ഒ കൃഷ്ണകുമാര്‍ എന്നിവര്‍ സംസാരിച്ചു. വാര്‍ഡ് മെമ്പര്‍ എ രാജീവ് ചര്‍ച്ചകള്‍ക്ക് നേതൃത്വം നല്‍കി.
ഒല്ലൂക്കര
ജില്ലയിലെ അതിദരിദ്രരെ കണ്ടെത്താനുള്ള ഫോക്കസ് ഗ്രൂപ്പ് ചര്‍ച്ചകളുടെ ഭാഗമായി ഒല്ലൂക്കര ബ്ലോക്കിലും നാല് ഗ്രാമപഞ്ചായത്തിലും യോഗം ചേര്‍ന്നു. ബ്ലോക്ക് പഞ്ചായത്തിലെ എല്ലാ വാര്‍ഡുകളിലും സാമൂഹിക സംഘടനാ പ്രവര്‍ത്തകരുടെ നേതൃത്വത്തിലാണ് ഫോക്കസ് ഗ്രൂപ്പ് ചര്‍ച്ചകള്‍ സംഘടിപ്പിച്ചത്. ചര്‍ച്ചകളില്‍ ഒല്ലൂക്കര ബ്ലോക്ക് പ്രസിഡന്റ കെ ആര്‍ രവി, മാടക്കത്തറ ഗ്രാമപഞ്ചായത്ത് പ്രസിഡന്റ് ഇന്ദിര മോഹന്‍, പുത്തൂര്‍ ഗ്രാമപഞ്ചായത്ത് പ്രസിഡന്റ് മിനി ഉണ്ണികൃഷ്ണന്‍, പാണഞ്ചേരി പഞ്ചായത്ത് പ്രസിഡന്റ് പി പി രവീന്ദ്രന്‍, നടത്തറ പഞ്ചായത്ത് പ്രസിഡന്റ് ശ്രീവിദ്യ രാജേഷ്, പഞ്ചായത്ത് സെക്രട്ടറിമാര്‍, ബ്ലോക്ക് പഞ്ചായത്ത് സെക്രട്ടറി, മെമ്പര്‍മാര്‍ തുടങ്ങിയവര്‍ പങ്കെടുത്തു.
ചാലക്കുടി
ചാലക്കുടി ബ്ലോക്ക് പഞ്ചായത്ത് പരിധിയിലെ കൊരട്ടി, കാടുകുറ്റി, മേലൂര്‍, പരിയാരം, അതിരപ്പിള്ളി, കോടശ്ശേരി എന്നീ ആറ് ഗ്രാമപഞ്ചായത്തുകളിലും മുനിസിപ്പാലിറ്റിയിലും അതിദരിദ്രരെ കണ്ടെത്തുന്നതിനുള്ള ഫോക്കസ് ഗ്രൂപ്പ് ചര്‍ച്ചകള്‍ക്ക് തുടക്കം.
പദ്ധതിയുടെ ഭാഗമായി ബ്ലോക്ക് പഞ്ചായത്തിന് കീഴിലുള്ള ഗ്രാമപഞ്ചായത്തുകളിലും ചാലക്കുടി മുനിസിപ്പാലിറ്റിയിലെ എല്ലാ വാര്‍ഡുകളിലും സാമൂഹ്യ സംഘടന, കുടുംബശ്രീ പ്രവര്‍ത്തകരുടെയും നേതൃത്വത്തില്‍ ഫോക്കസ് ഗ്രൂപ്പ് ചര്‍ച്ചകള്‍ നടത്തി. കൊരട്ടി പഞ്ചായത്ത് പ്രസിഡന്റ് പി സി ബിജു, കാടുകുറ്റി പഞ്ചായത്ത് പ്രസിഡന്റ് പ്രിന്‍സി ഫ്രാന്‍സിസ്, മേലൂര്‍ പഞ്ചായത്ത് പ്രസിഡന്റ് സുനിത എം എസ്, പരിയാരം പഞ്ചായത്ത് പ്രസിഡന്റ് മായ ശിവദാസ്, അതിരപ്പിള്ളി പഞ്ചായത്ത് പ്രസിഡന്റ് കെ കെ റിജേഷ്, കോടശ്ശേരി പഞ്ചായത്ത് പ്രസിഡന്റ് ഡെന്നി വര്‍ഗീസ്, ചാലക്കുടി ബ്ലോക്ക് ബി ഡി ഒ യു ജി സരസ്വതി, ജനറല്‍ എക്സ്റ്റന്‍ഷന്‍ ഓഫീസര്‍ കെ രാധാകൃഷ്ണന്‍, ഹെഡ് ക്ലര്‍ക്ക് എം ബി രാജേഷ്, ഹെഡ് അക്കൗണ്ടന്റ് കെ പി ഷീബ തുടങ്ങിയവര്‍ വിവിധ യോഗങ്ങളില്‍ പങ്കെടുത്തു.
