വിയറ്റ്നാം സംഘം സന്ദര്‍ശനം നടത്തി
കൊല്ലം: ഇന്ത്യയിലെ വിയറ്റ്നാം അംബാസഡര്‍ ഫാം സാങ് ചുവിന്റെ നേതൃത്വത്തിലുള്ള സംഘം ജില്ലയില്‍ സന്ദര്‍ശനം നടത്തി. കൊട്ടിയത്തെ കാഷ്യു ഡെവലപ്മെന്റ് കോര്‍പ്പറേഷന്‍ സംസ്‌കരണശാലയാണ് ആദ്യം സന്ദര്‍ശിച്ചത്. ഇവിടുത്തെ പ്രവര്‍ത്തനങ്ങള്‍ സംബന്ധിച്ച വിവരങ്ങള്‍ ആരാഞ്ഞു. കശുവണ്ടിയുടെ വിപണി സാധ്യതകള്‍ അന്വേഷിച്ചതിനൊപ്പം സംസ്‌കരണ രീതിയും കണ്ട് മനസ്സിലാക്കി.
നഗരത്തിലെ സ്വകാര്യ ഹോട്ടലില്‍ വിനോദസഞ്ചാര വകുപ്പ് ഒരുക്കിയ കലാപരിപാടികള്‍ ആസ്വദിച്ച് അഷ്ടമുടി കായലില്‍ ബോട്ട് യാത്രയും നടത്തി. പാരിപ്പള്ളിയിലെ ആനത്താവളവും സന്ദര്‍ശിച്ചു. മൂന്നു ദിവസത്തെ സന്ദര്‍ശനത്തിന് ഞായറാഴ്ച കേരളത്തിലെത്തിയ സംഘം ഇന്നലെ (നവംബര്‍ 9) വൈകിട്ട് മടങ്ങിപ്പോയി. സംസ്ഥാന സര്‍ക്കാരിന്റെ ഓഫീസര്‍ ഓണ്‍ സ്പെഷ്യല്‍ ഡ്യൂട്ടി വേണു രാജാമണി ഇതര ഉദ്യോഗസ്ഥര്‍ തുടങ്ങയിവരാണ് അനുഗമിച്ചത്.
