കേരള ഫോക്‌ലോർ അക്കാദമി 2024 വർഷത്തെ അവാർഡിന് നാമനിർദ്ദേശം ക്ഷണിച്ചു. ജനുവരി മുതൽ ഡിസംബർ വരെയുള്ള കലണ്ടർ വർഷമാണ്' അവാർഡ് നൽകുന്നതിനായി പരിഗണിക്കുന്നത്. അക്കാദമിയുടെ വെബ്‌സൈറ്റിൽ (www.keralafolklore.org) പ്രസിദ്ധീകരിച്ചിട്ടുള്ള നിശ്ചിതമാതൃകയിൽ വേണം നാമനിർദ്ദേശം സമർപ്പിക്കാൻ. കലാരംഗത്തെ പരിചയം തെളിയിക്കുന്നതിനായി തദ്ദേശസ്വയംഭരണ സ്ഥാപന അധികാരിയുടെ സാക്ഷ്യപത്രം സമർപ്പിക്കണം. കൂടാതെ ഒരു ജനപ്രതിനിധി, കലാകാരൻ ബന്ധപ്പെട്ട് പ്രവർത്തിക്കുന്ന സാംസ്‌കാരിക സ്ഥാപനം, അനുഷ്ഠാനകലയാണെങ്കിൽ ബന്ധപ്പെട്ട ആരാധനാലയം എന്നിവരിൽ നിന്ന് ലഭിക്കുന്ന സർട്ടിഫിക്കറ്റുകളും നാമനിർദ്ദേശത്തോടൊപ്പം സമർപ്പിക്കണം. ഒരാളുടെ പേര് മറ്റേതെങ്കിലും വ്യക്തിയോ, കലാസംഘടനയോ അവാർഡിന് നിർദ്ദേശിക്കുകയാണെങ്കിൽ കലാകാരന്റെ സമ്മതപത്രവും ഹാജരാക്കണം. കലാകാരനെ സംബന്ധിച്ച പരമാവധി വിവരങ്ങൾ നാമനിർദ്ദേശത്തോടൊപ്പം ഉണ്ടായിരിക്കണം. രണ്ട് പാസ്‌പോർട്ട് സൈസ് ഫോട്ടോകൾ, ആധാർകാർഡിന്റെ കോപ്പി, വയസ്സ് തെളിയിക്കുന്ന സർട്ടിഫിക്കറ്റ് എന്നിവ നാമനിർദ്ദേശപത്രികയ്‌ക്കൊപ്പം സമർപ്പിക്കണം. അക്കാദമിയുടെ ഏതെങ്കിലും പുരസ്‌കാരം ലഭിച്ച് മൂന്ന് വർഷത്തിന് ശേഷം മാത്രമേ മറ്റൊരു പുരസ്‌ക്കാരത്തിന് പരിഗണിക്കുകയുള്ളൂ. പുരസ്‌കാരങ്ങളും അവയ്ക്കുള്ള പ്രത്യേക നിബന്ധനകളും:

ഫെല്ലോഷിപ്പ്

65 വയസ്സ് പൂർത്തിയായവരും നാടൻ കലാരംഗത്ത് 30 വർഷത്തിലധികമായി ആചാര്യസ്ഥാനം അലങ്കരിക്കുന്നവരും മുൻവർഷങ്ങളിൽ അക്കാദമിയുടെ ഏതെങ്കിലും അവാർഡിന് അർഹരായവരുമായ കലാകാരന്മാർക്ക് നാമനിർദ്ദേശം സമർപ്പിക്കാം.

അവാർഡ്

നാടൻ കലാരംഗത്ത് പ്രാഗത്ഭ്യം തെളിയിച്ച ഇരുപത് വർഷത്തെ കലാപ്രാവിണ്യമുള്ള 40 മുതൽ 65 വയസ്സ് വരെയുള്ള നാടൻ കലാകാരന്മാർക്ക് നാമനിർദ്ദേശം സമർപ്പിക്കാം.

ഗുരുപൂജ പുരസ്‌കാരം

അറുപത്തിയഞ്ച് വയസ്സ് പൂർത്തിയാക്കിയവരും അക്കാദമിയുടെ പുരസ്‌കാരങ്ങളൊന്നും ലഭിച്ചിട്ടില്ലാത്തവരുമായ കലാകാരന്മാർക്ക് നാമനിർദ്ദേശം സമർപ്പിക്കാം.

യുവപ്രതിഭാ പുരസ്‌കാരം

നാടൻകലാരംഗത്ത് പ്രാഗത്ഭ്യം തെളിയിച്ച യുവ നാടൻ കലാകാരന്മാർക്ക് നാമനിർദ്ദേശം സമർപ്പിക്കാം. അപേക്ഷ സമർപ്പിക്കാനുള്ള പ്രായപരിധി ഇരുപത്തിയഞ്ച് വയസ്സിനും നാൽപത് വയസ്സിനും മദ്ധ്യേ.

കലാ പഠന-ഗവേഷണ ഗ്രന്ഥം

നാടൻ കലകളെ ആധാരമാക്കി രചിക്കപ്പെട്ടതും ഉന്നത നിലവാരം പുലർത്തുന്നതുമായ പഠന ഗവേഷണ ഗ്രന്ഥങ്ങൾക്ക് കേരള ഫോക്‌ലോർ അക്കാദമി അവാർഡുകൾ നൽകുന്നു. 2022, 2023, 2024 വർഷങ്ങളിൽ ഒന്നാം പതിപ്പായി പ്രസിദ്ധീകരിക്കപ്പെട്ട ഗ്രന്ഥങ്ങളായിരിക്കും പരിഗണിക്കുക. ഗ്രന്ഥകാരന്മാർക്കും പുസ്തക പ്രസാധകർക്കും പുസ്തകങ്ങൾ പരിഗണനക്ക് സമർപ്പിക്കാം. വായനക്കാർക്കും മികച്ച ഗ്രന്ഥങ്ങൾ നിർദ്ദേശിക്കാം. അപേക്ഷയോടൊപ്പം പുസ്തകങ്ങളുടെ മൂന്ന് കോപ്പികളും അടക്കം ചെയ്യണം.

ഡോക്യുമെന്ററി പുരസ്‌കാരം

നാടൻ കലകളെ ആധാരമാക്കി അരമണിക്കൂറിൽ കവിയാത്ത 2024 ജനുവരി മുതൽ ഡിസംബർ വരെ നിർമ്മിക്കപ്പെട്ടിട്ടുള്ള ഡോക്യുമെന്ററികളാണ് പരിഗണിക്കുന്നത്. അപേക്ഷയോടൊപ്പം ബന്ധപ്പെട്ട വിഷയത്തിലുള്ള ഡോക്യുമെന്ററിയുടെ 3 പെൻഡ്രൈവുകൾ ഉണ്ടാവണം. പ്രസ്തുത കാലയളവിൽ നിർമ്മിച്ചതാണെന്നുള്ള കലാകാരന്റെ സത്യവാങ്മൂലം അപേക്ഷയോടൊപ്പം സമർപ്പിക്കേണം.

അപേക്ഷകൾ 2026 ജനുവരി 31 -ാം തീയതിക്കുള്ളിൽ സെക്രട്ടറി, കേരള ഫോക്‌ലോർ അക്കാദമി, പി.ഒ. ചിറക്കൽ. കണ്ണൂർ-11 എന്ന വിലാസത്തിൽ ലഭ്യമാക്കണം. കൂടുതൽ വിവരങ്ങൾക്ക്: ഫോൺ - 0497 2778090.