നീര്‍ച്ചാലുകളുടെ ജനകീയ വീണ്ടെടുപ്പിന് പദ്ധതി; 'ഇനി ഞാനൊഴുകട്ടെ'
* ഡിസംബര്‍ 14 മുതല്‍ 22 വരെ നീര്‍ച്ചാല്‍ ശുചീകരണം ജനപങ്കാളിത്തത്തോടെ
തിരുവനന്തപുരം : ജലസ്രോതസുകളെ ജനകീയമായി സംരക്ഷിക്കുന്നതിനുള്ള കര്‍മപദ്ധതി ഇനി ഞാനൊഴുകട്ടെ ജില്ലയിലെ പഞ്ചായത്തുകളിലും നഗരസഭകളിലും നടപ്പാക്കും. പുഴയിലേക്ക് ഒഴുകിയെത്തുന്ന നീര്‍ച്ചാലുകളെ ജന പങ്കാളിത്തത്തോടെ വീണ്ടെടുക്കുന്നതിനാണ് ഇതിലൂടെ ലക്ഷ്യം വയ്ക്കുന്നത്. ജില്ലാ പഞ്ചായത്ത് പ്രസിഡന്റ് വി.കെ. മധുവിന്റെ അധ്യക്ഷതയില്‍ ജില്ലാ പഞ്ചായത്ത് ഹാളില്‍ ചേര്‍ന്ന ആലോചനായോഗമാണ് തീരുമാനമെടുത്തത്. കഴിഞ്ഞ മൂന്ന് വര്‍ഷമായി ഹരിതകേരളം മിഷന്റെ നേതൃത്വത്തില്‍ ഈ ദിശയില്‍ നടക്കുന്ന പ്രവര്‍ത്തനങ്ങള്‍ പുത്തന്‍ ഉണര്‍വ് പകര്‍ന്നിട്ടുണ്ടെന്ന് ജില്ലാ പഞ്ചായത്ത് പ്രസിഡന്റ് പറഞ്ഞു.
ഡിസംബര്‍ 14 മുതല്‍ 22 വരെയുള്ള ഏതെങ്കിലും ഒരു ദിവസം എല്ലാ പഞ്ചായത്തുകളിലും നഗരസഭകളിലും നീര്‍ച്ചാല്‍ ശുചീകരണം വിപുലമായ ജനകീയ പങ്കാളിത്തത്തോടെ സംഘടിപ്പിക്കണം. തദ്ദേശസ്വയം ഭരണ വകുപ്പ്, ജലസേചന വകുപ്പ്, മഹാത്മാഗാന്ധി ദേശീയ ഗ്രാമീണ തൊഴിലുറപ്പ് , അയ്യങ്കാളിതൊഴിലുറപ്പ്, കുടുംബശ്രീ, ക്ലീന്‍കേരള കമ്പിനി, ശുചിത്വമിഷന്‍, രാഷ്ട്രീയ യുവജന സന്നദ്ധ സംഘടനാ പ്രവര്‍ത്തകര്‍, എന്‍.എസ്.എസ്, എന്‍.സി.സി, എസ്.പി.സി, സ്‌കൗട്ട'് എന്നിവ ചേര്‍ന്നുള്ള പ്രവര്‍ത്തനമാണ് ഉദ്ദേശിക്കുന്നത്. ഡിസംബര്‍ 14 ന് രാവിലെ 9 ന് പൂവച്ചല്‍ ഗ്രാമപഞ്ചായത്തിലെ പൂവച്ചല്‍ മൈലോട്ടുമൂഴി നീര്‍ച്ചാല്‍ ശുചീകരണത്തോടെ ജില്ലാതല ശുചീകരണത്തിന് തുടക്കമാകും.
ശുചീകരണ പ്രവര്‍ത്തനത്തിന്റെ സാങ്കേതിക ചുമതലകള്‍ ജലസേചന, തദ്ദേശസ്ഥാപന ഉദ്യോഗസ്ഥരുടെ നേതൃത്വത്തില്‍ ക്രമീകരിക്കും. വിപുലമായ സംഘാടക പ്രവര്‍ത്തനങ്ങള്‍ക്ക് തദ്ദേശസ്ഥാപന അദ്ധ്യക്ഷന്‍മാരുടെ നേതൃത്വത്തില്‍ സംഘാടക സമിതി ഡിസംബര്‍ 11 ന് മുന്‍പ് ചേര്‍ന്ന് കാര്യപരിപാടിക്ക് അന്തിമ രൂപം നല്‍കണം. തദ്ദേശസ്ഥാപനതലത്തില്‍ ഉദ്ദ്യോഗസ്ഥര്‍ജനകീയ കര്‍മ്മ സമിതികള്‍ ഉണ്ടാക്കി ചുമതലകള്‍ നിര്‍ണയിച്ച് നല്‍കണം. 59 തദ്ദേശസ്വയം ഭരണ സ്ഥാപനങ്ങളില്‍ നിന്നായി 78 നീര്‍ച്ചാലുകളുടെ ഏകദിന ശുചീകരണ പ്രവര്‍ത്തനങ്ങള്‍ക്കുള്ള കര്‍മ്മ പദ്ധതിയ്ക്ക് രൂപം നല്‍കി. മഹാത്മാഗാന്ധി ദേശീയ തൊഴിലുറപ്പിന്റെ ഭാഗമായി 42 തദ്ദേശസ്ഥാപനങ്ങളിലായി 76 ബഹുതല ശുചീകരണ പ്രവര്‍ത്തനങ്ങള്‍ക്കും കര്‍മ്മ പരിപാടി തയ്യാറാക്കി. ഇതോടെ ജില്ലയില്‍ ജലസ്രോതസുകളുടെ വീണ്ടെടുക്കലിന്റെ ഭാഗമായി 154 നീര്‍ച്ചാല്‍/ഉപനീര്‍ച്ചാല്‍ ശുചീകരണ പ്രവര്‍ത്തനങ്ങളാണ് ഈ കാലഘട്ടത്തില്‍ നടക്കുക. എല്ലാ പ്രാദേശിക ശുചീകരണ കേന്ദ്രങ്ങളിലും ജനപ്രതിനിധികള്‍, സാംസ്‌കാരിക നായകന്‍മാര്‍, കലാസാഹിത്യ പ്രതിഭകള്‍, സിനിമനാടകരംഗത്തെ പ്രമുഖര്‍ തുടങ്ങിയവരെ പങ്കെടുപ്പിച്ചുകൊണ്ട് പ്രതിജ്ഞാ വാചകം ചൊല്ലി ഫഌഗ് ഓഫ് ചെയ്ത് വിപുലമായിട്ടായിരിക്കും ശുചീകരണ പ്രവര്‍ത്തനത്തിന് തുടക്കം കുറിക്കുന്നത്.
