തൃശൂര്‍ : ജനകീയ കൂട്ടായ്മയോടെ എറിയാട് കടലോരത്ത് ആരംഭിച്ച ജിയോ ബാഗ് തടയണ നിര്‍മ്മാണത്തിന്റെ ഒന്നാംഘട്ടം പൂര്‍ത്തിയാകുന്നു. കടല്‍ക്ഷോഭം ഏറ്റവും രൂക്ഷമായ എറിയാട് ചന്ത കടപ്പുറത്ത് 700 മീറ്റര്‍ നീളത്തിലാണ് നാട്ടുകാരുടെ സഹായത്തോടെ തടയണ നിര്‍മ്മിച്ചത്. 5 ലക്ഷം രൂപയാണ് ഈ ഭാഗത്ത് ജിയോ ബാഗുകള്‍ വാങ്ങാന്‍ പഞ്ചായത്ത് ചെലവഴിച്ചത്. കടലാക്രമണം ഏറ്റവും രൂക്ഷമായ കയ്പമംഗലം മണ്ഡലത്തിലെ എറിയാട്, എടവിലങ്ങ് പഞ്ചായത്തുകള്‍ക്ക് തനത് ഫണ്ട് ഉപയോഗിക്കാന്‍ സര്‍ക്കാര്‍ ധാരണയായിരുന്നു. കടലാക്രമണത്തെ ചെറുക്കാന്‍ സംസ്ഥാന സര്‍ക്കാര്‍ ചിലവാക്കുന്ന പദ്ധതികള്‍ക്ക് പുറമെ അടിയന്തര ഘട്ടത്തില്‍ അഞ്ചു ലക്ഷം രൂപ വരെ പഞ്ചായത്തുകള്‍ക്ക് ഉപയോഗിക്കാന്‍ സാധിക്കും. ഇതനുസരിച്ചാണ് എറിയാട് പഞ്ചായത്തില്‍ 1200 ബാഗുകള്‍ വാങ്ങി നാട്ടുകാരുടെ സഹകരണത്തോടെ മണല്‍ നിറച്ച് തടയണ സ്ഥാപിച്ചത്. ഇറിഗേഷന്‍ വകുപ്പ് കരാര്‍ നല്‍കിയ തടയണകളും നിര്‍മ്മാണവും എറിയാട് മണപ്പാട്ട് ചാല്‍ ഭാഗത്ത് ഇതോടൊപ്പം പുനരാരംഭിച്ചിട്ടുണ്ട്. എറിയാട് എടവിലങ്ങ് പഞ്ചായത്തുകളിലായി 410 മീറ്റര്‍ തടയണയുടെ നിര്‍മ്മാണമാണ് കരാറുകാരന്‍ പുനരാരംഭിച്ചത്.

തീരദേശത്തെ പ്രശ്‌നങ്ങള്‍ ഉന്നയിച്ച് ഇ ടി ടൈസണ്‍ മാസ്റ്റര്‍ എം എല്‍ എ സര്‍ക്കാറിന് നല്‍കിയ കത്തിന് മറുപടിയായാണ് തദ്ദേശ സ്വയംഭരണ വകുപ്പ് മന്ത്രി എ സി മൊയ്തീന്‍ പ്രത്യേക ഉത്തരവ് ഇറക്കിയത്. ഇതോടൊപ്പം ജില്ലാ കളക്ടര്‍ക്ക് നല്‍കിയ അപേക്ഷ പ്രകാരം ഡിസാസ്റ്റര്‍ മാനേജ്‌മെന്റില്‍ നിന്നും തടയണ നിര്‍മ്മാണത്തിനായി ഫണ്ട് അനുവദിച്ച് ഉത്തരവായിട്ടുണ്ട്. തീരദേശത്തെ പ്രശ്‌നങ്ങളില്‍ സര്‍ക്കാരിന്റെയും ജനപ്രതിനിധികളുടെയും നിരന്തരമായ ഇടപെടല്‍ മൂലം മണ്ഡലത്തിന്റെ പല ഭാഗങ്ങളിലും കരിങ്കല്‍ ഭിത്തിയുടെയും ജിയോബാഗ് ഭിത്തിയുടെയും നിര്‍മ്മാണം നടക്കുന്നുണ്ട്.