റോഡപകടങ്ങൾ കുറയ്ക്കാൻ 'ജീവ-സുയാത്ര' മിഷൻ
സംസ്ഥാനത്ത് റോഡപകടങ്ങളും മരണങ്ങളും 50 ശതമാനം കുറയ്ക്കുക എന്ന ലക്ഷ്യത്തോടെ സർക്കാർ നടപ്പാക്കുന്ന സമഗ്ര ജീവൻരക്ഷാ പദ്ധതിയായ 'ജീവ-സുയാത്ര' മിഷന്റെ സംസ്ഥാനതല ഉദ്ഘാടനം മുഖ്യമന്ത്രി വി.ഡി സതീശൻ നിർവഹിച്ചു. പദ്ധതിയുടെ ടീസറും മുഖ്യമന്ത്രി പ്രകാശനം ചെയ്തു. മിഷന്റെ ബ്രാൻഡ് അംബാസഡറായ നടൻ മമ്മൂട്ടി പദ്ധതിയുടെ ലോഗോ പ്രകാശനം ചെയ്തു. എറണാകുളം ടൗൺ ഹാളിൽ നടന്ന ചടങ്ങിൽ ഗതാഗത മന്ത്രി സി.പി ജോൺ അധ്യക്ഷത വഹിച്ചു.
റോഡ് അപകടങ്ങളുടെ കാര്യത്തിൽ കേരളം ആശങ്കാജനകമായ സാഹചര്യത്തിലൂടെയാണ് കടന്നുപോകുന്നത്. ദിവസവും നിരവധി ജീവനുകളാണ് റോഡുകളിൽ നഷ്ടപ്പെടുന്നത്. അപകടങ്ങളിൽ കുട്ടികളും യുവാക്കളും കുടുംബത്തിന്റെ ഏക ആശ്രയമായവരും ഇരകളാകുന്നു. ഗുരുതരമായി പരിക്കേറ്റ് ജീവിതകാലം മുഴുവൻ ദുരിതമനുഭവിക്കേണ്ടിവരുന്നവരും നിരവധിയാണ്. ഈ സാഹചര്യത്തിന് മാറ്റം വരുത്താൻ സമൂഹത്തിന്റെ കൂട്ടായ ഇടപെടൽ അനിവാര്യമാണെന്നും മുഖ്യമന്ത്രി പറഞ്ഞു.
റോഡ് സുരക്ഷ ഗതാഗത വകുപ്പിന്റെയോ പോലീസിന്റെയോ മോട്ടോർ വാഹന വകുപ്പിന്റെയോ മാത്രം ഉത്തരവാദിത്വമല്ല. ഓരോ പൗരനും ഇക്കാര്യത്തിൽ ഉത്തരവാദിത്വമുണ്ട്. നിയമങ്ങൾ പാലിക്കുന്നതും മറ്റുള്ളവരുടെ ജീവന് വിലകൽപ്പിക്കുന്നതും ജീവിതശൈലിയുടെ ഭാഗമാകണം. റോഡ് സംസ്കാരം വളർത്തിയെടുക്കുകയാണ് ലക്ഷ്യം. നിയമലംഘനങ്ങൾക്കെതിരെ മുഖം നോക്കാതെ കർശന നടപടി സ്വീകരിക്കണം. നിയമനടപടികളിൽ ജനപ്രതിനിധികളോ മറ്റാരെങ്കിലുമോ ശുപാർശകളുമായി ഇടപെടരുതെന്നും മുഖ്യമന്ത്രി വ്യക്തമാക്കി.
മദ്യപിച്ച് വാഹനമോടിക്കൽ, അമിതവേഗം, വാഹനമോടിക്കുമ്പോൾ മൊബൈൽ ഫോൺ ഉപയോഗിക്കൽ, ഗതാഗതസിഗ്നലുകളും നിയമങ്ങളും ലംഘിക്കൽ തുടങ്ങിയ പ്രവണതകൾ കർശനമായി നിയന്ത്രിക്കണം. നിയമലംഘകർക്ക് പിഴ ചുമത്തുന്നതുൾപ്പെടെയുള്ള നടപടികളിൽ വിട്ടുവീഴ്ചയുണ്ടാകരുത്. ആവശ്യമെങ്കിൽ ഡ്രൈവിങ് ലൈസൻസ് റദ്ദാക്കുന്നതുൾപ്പെടെയുള്ള നടപടികൾ സ്വീകരിക്കണം. റോഡ് മുറിച്ചുകടക്കുന്ന കാൽനടയാത്രക്കാർക്ക് മുൻഗണന നൽകുന്നതും സുരക്ഷിതമായ യാത്രയുടെ ഭാഗമാകണമെന്നും അദ്ദേഹം പറഞ്ഞു.
വിദേശരാജ്യങ്ങളിൽ വാഹനമോടിക്കുമ്പോൾ നിയമങ്ങൾ കൃത്യമായി പാലിക്കുന്ന മലയാളികൾ സ്വന്തം നാട്ടിലും അതേ ഉത്തരവാദിത്വബോധം പുലർത്തണം. നിയമങ്ങൾ കർശനമായി നടപ്പാക്കുന്നതിനൊപ്പം റോഡുകളുടെ സുരക്ഷയും ഗുണനിലവാരവും ഉറപ്പാക്കണം. അടുത്ത ആറുമാസക്കാലം ശക്തമായ പരിശോധനകളും നടപടികളും തുടർന്നാൽ ഒരു വർഷത്തിനുള്ളിൽ കേരളത്തിൽ മികച്ച റോഡ് സുരക്ഷാ സംസ്കാരം വളർത്തിയെടുക്കാൻ കഴിയുമെന്നും മുഖ്യമന്ത്രി കൂട്ടിച്ചേർത്തു.

റോഡ് സുരക്ഷയിൽ വേഗതയേക്കാൾ പ്രധാനം ജാഗ്രതയും കൃത്യതയുമാണെന്ന് നടൻ മമ്മൂട്ടി ചടങ്ങിൽ പറഞ്ഞു. റോഡപകടങ്ങളിൽ ഭൂരിഭാഗവും മനുഷ്യരുടെ അശ്രദ്ധ മൂലമാണുണ്ടാകുന്നത്. വാഹനമോടിക്കുന്നവരും കാൽനടയാത്രക്കാരും ഒരുപോലെ ഉത്തരവാദിത്തത്തോടെ പെരുമാറണം. മൊബൈൽ ഫോൺ ഉപയോഗിച്ചുകൊണ്ട് റോഡിലൂടെ നടക്കുന്നതും വാഹനമോടിക്കുമ്പോഴുള്ള അശ്രദ്ധയും അപകടങ്ങൾക്ക് കാരണമാകുന്നു. റോഡുകൾ അഭ്യാസപ്രകടനങ്ങൾക്കും മത്സരങ്ങൾക്കുമുള്ളതല്ലെന്നും അതിനായി പ്രത്യേക ട്രാക്കുകൾ ഉപയോഗിക്കണമെന്നും അദ്ദേഹം ഓർമിപ്പിച്ചു.
കൃത്യസമയത്ത് എത്താൻ അമിതവേഗത്തിൽ വാഹനമോടിക്കുന്നതിന് പകരം നേരത്തെ യാത്ര ആരംഭിക്കണം. കുട്ടികൾക്ക് ചെറുപ്പം മുതലേ റോഡ് സുരക്ഷാ നിയമങ്ങൾ പഠിപ്പിക്കണമെന്നും മറ്റുള്ളവരുടെ ജീവനും കുടുംബവും കൂടി പരിഗണിച്ചുള്ള യാത്രാശീലം വളർത്തണമെന്നും അദ്ദേഹം കൂട്ടിച്ചേർത്തു. അപകടങ്ങൾ കുറഞ്ഞ് സുരക്ഷിതമായ യാത്രാസംസ്കാരമുള്ള സംസ്ഥാനമായി കേരളം മാറണമെന്നും മമ്മൂട്ടി ആശംസിച്ചു.
കേരളത്തിൽ പ്രതിവർഷം റോഡപകടങ്ങളിൽ ജീവൻ നഷ്ടപ്പെടുന്നവരുടെ എണ്ണം ഏതാനും വർഷങ്ങൾക്കുള്ളിൽ പകുതിയായി കുറയ്ക്കുകയാണ് റോഡ് സുരക്ഷാ മിഷന്റെ പ്രധാന ലക്ഷ്യമെന്ന് അധ്യക്ഷ പ്രസംഗത്തിൽ ഗതാഗത വകുപ്പ് മന്ത്രി സി.പി. ജോൺ പറഞ്ഞു. നിയമനടപടികൾക്കും ശിക്ഷയ്ക്കും പ്രാധാന്യം നൽകുന്നതിനുപകരം ജനങ്ങളെ ബോധവൽക്കരിച്ച് മികച്ച ഡ്രൈവിങ് സംസ്കാരം വളർത്തിയെടുക്കുന്നതിനാണ് മിഷൻ മുൻഗണന നൽകുന്നത്. എൻലൈറ്റൻ ആൻഡ് എൻഫോഴ്സ്' എന്ന ആശയത്തിലൂന്നി മമ്മൂട്ടിയുടെ നേതൃത്വത്തിൽ ബോധവൽക്കരണവും സർക്കാരിന്റെ നേതൃത്വത്തിൽ നിയമനടപടികളും ശക്തമാക്കും. റോഡപകടങ്ങൾ നിരവധി കുടുംബങ്ങളുടെ ജീവിതത്തെ ദുരിതത്തിലാക്കുന്ന സാഹചര്യത്തിൽ, വിലപ്പെട്ട ജീവനുകൾ സംരക്ഷിക്കുകയും കേരളത്തിന്റെ കണ്ണീരൊപ്പുകയും ചെയ്യുന്ന ദൗത്യമായി റോഡ് സുരക്ഷാ മിഷൻ മാറുമെന്നും മന്ത്രി പറഞ്ഞു.

കേരളത്തിൽ പ്രതിവർഷം റോഡപകടങ്ങളിൽ 3,500 മുതൽ 4,000 വരെ പേർ മരിക്കുന്ന സാഹചര്യം വലിയ ദുരന്തമാണെന്ന് ഉന്നതവിദ്യാഭ്യാസ വകുപ്പ് മന്ത്രി ഡോ. റോജി എം. ജോൺ പറഞ്ഞു. നൂറ്റാണ്ടിലെ വലിയ ദുരന്തങ്ങളായി കണക്കാക്കുന്ന പ്രളയങ്ങളിലും ഉരുൾപൊട്ടലുകളിലും ഉണ്ടായതിനേക്കാൾ കൂടുതൽ ജീവനുകളാണ് ഓരോ വർഷവും റോഡുകളിൽ നഷ്ടമാകുന്നത്. റോഡപകട മരണങ്ങളും അപകടങ്ങളും കുറച്ച് നിരത്തുകൾ സുരക്ഷിതമായ യാത്രയിടങ്ങളാക്കി മാറ്റാൻ റോഡ് സുരക്ഷാ മിഷനായ ജീവ സുയാത്ര മിഷന് കഴിയട്ടെയെന്നും മന്ത്രി ആശംസിച്ചു.
പദ്ധതിയുടെ ലക്ഷ്യങ്ങളും പ്രവർത്തനങ്ങളും:
2030-ഓടെ റോഡപകട മരണങ്ങളും പരുക്കുകളും പകുതിയായി കുറയ്ക്കുക എന്ന ലക്ഷ്യത്തോടെയാണ് മിഷൻ ആവിഷ്കരിച്ചിരിക്കുന്നത്.
സുരക്ഷിത നിരത്തുകൾ, സുരക്ഷിത പെരുമാറ്റം, അപകടാനന്തര അടിയന്തര പ്രതികരണം, സുരക്ഷിത വേഗത, സുരക്ഷിത വാഹനങ്ങൾ എന്നീ അഞ്ച് ലക്ഷ്യങ്ങൾ മുൻനിർത്തിയാണ് മിഷൻ പ്രവർത്തിക്കുക.
സ്കൂളുകളിലും കോളേജുകളിലും റോഡ് സുരക്ഷാ ബോധവൽക്കരണം, അപകടമേഖലകൾ പരിഹരിക്കുന്നതിനുള്ള അത്യാധുനിക എൻജിനീയറിങ് പരിഹാരങ്ങൾ, നൂതന സാങ്കേതികവിദ്യകളുടെ സഹായത്തോടെയുള്ള ഗതാഗത നിയമപാലനം എന്നിവ നടപ്പാക്കും. കുടുംബശ്രീ, തദ്ദേശ സ്ഥാപനങ്ങൾ, വിദ്യാർഥികൾ, പൊതുജനങ്ങൾ എന്നിവരുടെ സജീവ പങ്കാളിത്തം പദ്ധതിയിൽ ഉറപ്പാക്കും.
ഹൈബി ഈടൻ എം പി, എം എൽ എ ടി ജെ വിനോദ്, കൊച്ചി മുനിസിപ്പൽ കോർപ്പറേഷൻ മേയർ വി. കെ. മിനിമോൾ, ജില്ലാ കളക്ടർ ജി പ്രിയങ്ക ഐ എ എസ്, ഗതാഗത വകുപ്പ് സെക്രട്ടറി ഡോ. ഷർമിള മേരി ജോസഫ് ഐ.എ.എസ്, സിറ്റി പോലീസ് കമ്മിഷണർ ആർ നിശാന്തിനി ഐ.പി.എസ്, ട്രാൻസ്പോർട്ട് കമ്മിഷണർ ജി. സ്പർജൻ കുമാർ ഐ.പി.എസ്, വാർഡ് കൗൺസിലർ സുധ ദിലീപ് കുമാർ, ഐ ജി പി, ട്രാഫിക് & റോഡ് സേഫ്റ്റി കമ്മീഷണർ എസ്. സതീഷ് ബിനോ ഐ.പി.എസ് തുടങ്ങിയവർ ചടങ്ങിൽ പങ്കെടുത്തു.









