സംസ്ഥാനത്ത് പരിശീലനം പൂർത്തിയാക്കിയ സിവിൽ എക്സൈസ് ഓഫീസർമാരുടെ പാസ്സിംഗ് ഔട്ട് പരേഡ് തൃശൂർ സ്റ്റേറ്റ് എക്സൈസ് അക്കാദമി പരേഡ് ഗ്രൗണ്ടിൽ നടന്നു. അടിസ്ഥാന പരിശീലനം പൂർത്തിയാക്കിയ 36-ാമത് ബാച്ചിലെ 68 സിവിൽ എക്‌സൈസ് ഓഫീസർമാരുടെയും 17-ാമത് ബാച്ചിലെ 2 വനിത സിവിൽ എക്‌സൈസ് ഓഫീസർമാരുടെയും പാസ്സിംഗ് ഔട്ട് പരേഡിൽ സഹകരണ വകുപ്പ് മന്ത്രി എം. ലിജു സേനാംഗങ്ങളുടെ സല്യൂട്ട് സ്വീകരിച്ചു.

എക്‌സൈസ് സേനയെ ശക്തിപ്പെടുത്തുന്നതിനായി സര്‍ക്കാര്‍ നിരവധി സംരംഭങ്ങള്‍ നടപ്പിലാക്കുന്നുണ്ടെന്ന് മന്ത്രി പറഞ്ഞു. ഈ ശ്രമങ്ങളുടെ ഭാഗമായി ആരംഭിച്ച ഓപ്പറേഷന്‍ തണ്ടറിന് ഗണ്യമായ പൊതുജന പിന്തുണ ലഭിച്ചു. ഈ പ്രവര്‍ത്തനവുമായി ബന്ധപ്പെട്ട് സംസ്ഥാനത്തൊട്ടാകെ ഏകദേശം 60,000 കേസുകള്‍ എക്‌സൈസ് വകുപ്പ് കണ്ടെത്തിയിട്ടുണ്ടെന്നും മന്ത്രി കൂട്ടിച്ചേര്‍ത്തു. പരിമിതമായ സൗകര്യങ്ങള്‍ ഉണ്ടായിരുന്നിട്ടും വകുപ്പിന്റെ പ്രകടകനത്തെ അഭിനന്ദിച്ച ലിജു ജീവനക്കാരുടെ എണ്ണം വര്‍ദ്ധിപ്പിക്കുന്നതിനുള്ള നടപടികള്‍ സര്‍ക്കാരിന്റെ പരിഗണനയിലാണെന്ന് മന്ത്രി സൂചിപ്പിച്ചു.

പരിശീലനാർത്ഥികളിൽ 44 പേർ ബിരുദധാരികളും ഒമ്പത് പേർ ബിരുദാനന്തര ബിരുദവും എട്ട് പേർ ബിടെക് ബിരുദവും ഒരാൾക്ക് ബിഎഡ് ബിരുദവും രണ്ട് പേർ ഡിപ്ലോമയും നേടിയിരുന്നു. വിവിധ വിഭാഗങ്ങളിൽ മികവ് പുലർത്തിയ പരിശീലനാർത്ഥികൾക്കുള്ള അവാർഡുകളും മന്ത്രി വിതരണം ചെയ്തു. അഡീഷണൽ എക്സൈസ് കമ്മീഷണർ (എൻഫോഴ്സ്മെന്റ്) ആർ. ജയശങ്കർ, എക്സൈസ് അക്കാദമി ഡയറക്ടർ എം. സുഗുണൻ എന്നിവരും പുതുതായി പരിശീലനം നേടിയ ഉദ്യോഗസ്ഥരിൽ നിന്ന് സല്യൂട്ട് സ്വീകരിച്ചു.