നമ്മൾ കഴിക്കുന്ന പച്ചക്കറികളും പഴങ്ങളും എത്രത്തോളം സുരക്ഷിതമാണ്? കാർഷിക വികസന കർഷക ക്ഷേമ വകുപ്പിന്റെ സാമ്പത്തിക സഹായത്തോടെ കാർഷിക സർവകലാശാലയുടെ വെള്ളായണി കാർഷിക കോളേജിലെ കീടനാശിനി അവശിഷ്ട വിഷാംശ പരിശോധന ലബോറട്ടറിയിൽ നടപ്പിലാക്കി വരുന്ന 'സേഫ് ടു ഈറ്റ്' പദ്ധതിയുടെ 71-ാമത് റിപ്പോർട്ട് പുറത്തുവന്നു. 2026 ഏപ്രിൽ മുതൽ ജൂൺ വരെയുള്ള കാലയളവിലെ പരിശോധന ഫലങ്ങളാണ് ഈ റിപ്പോർട്ടിലുള്ളത്.

ഭക്ഷ്യ സുരക്ഷാ വകുപ്പ് ഉദ്യോഗസ്ഥർ കേരളത്തിലെ ആലപ്പുഴ, എറണാകുളം, കൊല്ലം, മലപ്പുറം, തിരുവനന്തപുരം എന്നീ അഞ്ച് ജില്ലകളിലെ വിവിധ ബ്ലോക്കുകളിൽ നിന്നും മുനിസിപ്പാലിറ്റികളിൽ നിന്നും നേരിട്ട് ശേഖരിച്ച പഴം, പച്ചക്കറി സാമ്പിളുകളാണ് പരിശോധനയ്ക്ക് വിധേയമാക്കിയത്. മൊത്തം ശേഖരിച്ച 178 സാമ്പിളുകളിൽ പരിശോധിച്ചതിൽ 4 സാമ്പിളുകളിൽ (2.25%) എഫ്എസ്എസ്എഐ/കോഡക്സ് (FSSAI/CODEX) നിശ്ചയിച്ചിരിക്കുന്ന അനുവദനീയ പരിധിയ്ക്ക് മുകളിലായി കീടനാശിനി സാന്നിദ്ധ്യം കണ്ടെത്തി.

എറണാകുളം തൃക്കാക്കര മുനിസിപ്പാലിറ്റിയിലെ കടയിൽ നിന്ന് ഏപ്രിൽ 2026-ൽ ശേഖരിച്ച കറുത്ത മുന്തിരി സാമ്പിളിൽ 0.70 ppm 'തയാമെത്തോക്സാം' കണ്ടെത്തി.

തിരുവനന്തപുരം വാമനപുരം ബ്ലോക്കിലെ വെഞ്ഞാറമൂടുള്ള കടയിൽ നിന്ന് മേയ് 2026-ൽ ശേഖരിച്ച തക്കാളി സാമ്പിളിൽ 0.07 ppm 'ഒമെത്തോയേറ്റ്' കണ്ടെത്തി.

മലപ്പുറം ജില്ലയിലെ വളാഞ്ചേരി മുനിസിപ്പാലിറ്റിയിലുള്ള വളാഞ്ചേരിയിലെ കടയിൽ നിന്ന് ജൂൺ 2026-ൽ ശേഖരിച്ച ബീറ്റ്റൂട്ട് സാമ്പിളിൽ 0.17 ppm 'ക്ലോറൻട്രാനിലി പ്രോൾ' കണ്ടെത്തി. കൂടാതെ മലപ്പുറം താനൂർ മുനിസിപ്പാലിറ്റിയിലെ 'പി.ജി. വെജിറ്റബിൾ സ്റ്റോർ' എന്ന കടയിൽ നിന്ന് ജൂൺ 2026-ൽ ശേഖരിച്ച ബീറ്റ്റൂട്ട് സാമ്പിളിലും 0.14 ppm 'ക്ലോറൻട്രാനിലി പ്രോൾ' കണ്ടെത്തി.

അതേസമയം, ആപ്പിൾ, വെണ്ടയ്ക്ക, കാരറ്റ്, ഓറഞ്ച്, മാമ്പഴം, നെല്ലിക്ക, പച്ചമുളക് തുടങ്ങിയ 44 ഇനം പഴം-പച്ചക്കറികളിൽ കീടനാശിനി അവശിഷ്ട വിഷാംശ തോത് അനുവദനീയ പരിധിക്ക് താഴെയാണ് കണ്ടെത്തിയത്. കൂടുതൽ വിവരങ്ങൾക്ക് കാർഷിക സർവകലാശാലയുമായോ ഭക്ഷ്യ സുരക്ഷാ വകുപ്പുമായോ ബന്ധപ്പെടാവുന്നതാണ്.