2025-ലെ കേരള സംസ്ഥാന ഊർജ്ജസംരക്ഷണ അവാർഡുകൾ പ്രഖ്യാപിച്ചു. കേരളത്തിൽ ഊർജ്ജസംരക്ഷണ പ്രവർത്തനങ്ങൾ പ്രോത്സാഹിപ്പിക്കുന്നതിനു വേണ്ടി കേരള സർക്കാർ ഏർപ്പെടുത്തിയ അവാർഡിന്റെ പ്രവർത്തനങ്ങൾ ഏകോപിപ്പിക്കുന്നത് എനർജി മാനേജ്‌മെന്റ് സെന്ററാണ്. സർക്കാർ നിയോഗിച്ച സംസ്ഥാനതല ജഡ്ജിംഗ് കമ്മിറ്റിയുടെ നേതൃത്വത്തിലാണ് അപേക്ഷകൾ വിലയിരുത്തി അവാർഡുകൾ പ്രഖ്യാപിച്ചത്. വൻകിട ഊർജ്ജ ഉപഭോക്താക്കൾ, ഇടത്തരം ഊർജ്ജ ഉപഭോക്താക്കൾ, ചെറുകിട ഊർജ്ജ ഉപഭോക്താക്കൾ, കെട്ടിടങ്ങൾ, സംഘടനകൾ / സ്ഥാപനങ്ങൾ, ഊർജ്ജക്ഷമതയുള്ള ഉൽപ്പന്നങ്ങളുടെ പ്രമോട്ടർമാർ, ആർക്കിടെക്ചറൽ-ഗ്രീൻ ബിൽഡിംഗ് കൺസൾട്ടൻസികൾ എന്നീ വിഭാഗങ്ങളിലായാണ് അപേക്ഷകൾ ക്ഷണിച്ചത്.

2025 ൽ ആകെ 90 അപേക്ഷകരാണ് ഉണ്ടായിരുന്നത്. അവാർഡ് അപേക്ഷകരെല്ലാം കൂടി 249 ദശലക്ഷം യൂണിറ്റ് വൈദ്യുതിയും 841 ടൺ ഇന്ധനവും ലാഭിച്ചു.

‘വൻകിട ഊർജ്ജ ഉപഭോക്താക്കൾ’ വിഭാഗത്തിൽ എറണാകുളം കൊച്ചിൻ ഷിപ്പ്യാർഡ് ലിമിറ്റഡിന് അവാർഡും ഒരു ലക്ഷം രൂപ ക്യാഷ് പ്രൈസും കോഴിക്കോട് പീകെ സ്റ്റീൽ കാസ്റ്റിംഗ്‌സ് പ്രൈവറ്റ് ലിമിറ്റഡിനും തിരുവനന്തപുരം ട്രാവൻകൂർ ടൈറ്റാനിയം പ്രോഡക്ട്‌സ് ലിമിറ്റഡിനും പ്രശസ്തിപത്രവും ലഭിച്ചു.

‘ഇടത്തരം ഊർജ്ജ ഉപഭോക്താക്കൾ’ വിഭാഗത്തിൽ ആലപ്പുഴ വി കെ എൽ സീസണിംഗ്‌സ് പ്രൈവറ്റ് ലിമിറ്റഡിനും മിൽമ കണ്ണൂർ ഡയറി MRCMPU ലിമിറ്റഡിനും പ്രശസ്തിപത്രം ലഭിച്ചു.

‘ചെറുകിട ഊർജ്ജ ഉപഭോക്താക്കൾ’ വിഭാഗത്തിൽ കോഴിക്കോട് ഫോർച്യൂൺ ഇലാസ്റ്റമേഴ്സ് പ്രൈവറ്റ് ലിമിറ്റഡിന് അവാർഡും ഒരു ലക്ഷം രൂപ ക്യാഷ് പ്രൈസും ലഭിച്ചു.

‘കെട്ടിടങ്ങൾ’ വിഭാഗത്തിൽ തിരുവനന്തപുരം ഇന്റർനാഷണൽ എയർപോർട്ട് ലിമിറ്റഡിന് അവാർഡും ഒരു ലക്ഷം രൂപ ക്യാഷ് പ്രൈസും ലഭിച്ചു. കുമരകം കോക്കനട്ട് ലഗൂൺ പ്രശസ്തിപത്രം നേടി.

‘സംഘടനകൾ / സ്ഥാപനങ്ങൾ’ വിഭാഗത്തിൽ കേരള സർവകലാശാല അവാർഡും ഒരു ലക്ഷം രൂപ ക്യാഷ് പ്രൈസും കരസ്ഥമാക്കി. കളമശ്ശേരി രാജഗിരി കോളേജ് ഓഫ് സോഷ്യൽ സയൻസസ് (Autonomous) പ്രശസ്തിപത്രവും നേടി.

‘ഊർജ്ജകാര്യക്ഷമത കൂടിയ ഉപകരണങ്ങളുടെ പ്രമോട്ടർമാർ’ വിഭാഗത്തിൽ ആലപ്പുഴ ആൾ എബൌട്ട് ഇന്നൊവേഷൻ ആൻഡ് അഡ്വാൻസ്ഡ് റിസർച്ച് പ്രൈവറ്റ് ലിമിറ്റഡിന് പ്രശസ്തിപത്രം ലഭിച്ചു.

‘ആർക്കിടെക്റ്റ്‌സ് & ഗ്രീൻ ബിൽഡിംഗ് കൺസൽട്ടൻസ്’ വിഭാഗത്തിൽ എറണാകുളം F5 സസ്‌റ്റൈനബിലിറ്റി കൺസൾട്ടന്റിന് പ്രശസ്തിപത്രം ലഭിച്ചു.