പരിയാരം കണ്ണൂർ ഗവ. മെഡിക്കൽ കോളേജ് ആശുപത്രിയിലെ ഫിസിക്കൽ മെഡിസിൻ ആൻഡ് റീഹാബിലിറ്റേഷൻ (പിഎംആർ) വിഭാഗത്തിൽ ആരംഭിച്ച ശൈശവ വൈകല്യ നിവാരണ ക്ലിനിക്കിന്റെ ഉദ്ഘാടനം എം വിജിൻ എം എൽ എ നിർവ്വഹിച്ചു. ഗവ മെഡിക്കൽ കോളേജ് പ്രിൻസിപ്പൽ ഡോ. സൈറു ഫിലിഫ് അധ്യക്ഷത വഹിച്ചു. മാസത്തിലെ ആദ്യ ശനിയാഴ്ച രാവിലെ പത്ത് മുതൽ 12 വരെയാണ് ക്ലിനിക്ക് നടക്കുക. ഗവ. മെഡിക്കൽ കോളേജിലെ പിഎംആർ വിഭാഗത്തെ സെന്റർ ഓഫ് എക്‌സലൻസ് ഇൻ റീഹാബിലിറ്റേഷൻ ആക്കി മാറ്റാനുള്ള പരിശ്രമത്തിന്റെ ആദ്യപടിയായാണ് ക്ലിനിക്ക് ആരംഭിച്ചത്. സഹായ ഉപകരണങ്ങൾ ആവശ്യമുള്ള ഭിന്നശേഷിയുള്ള ഗുണഭോക്താക്കളെ കണ്ടെത്തുന്നതിന് ഒരു മാസത്തെ ക്യാമ്പും സംഘടിപ്പിക്കുന്നുണ്ട്. ക്യാമ്പിന്റെ ഉദ്ഘാടനവും എം എൽ എ നിർവ്വഹിച്ചു.

കുട്ടികളിലെ വൈകല്യം നേരത്തേ തിരിച്ചറിയൽ എന്ന വിഷയത്തിൽ ഡോ കവിത പവിത്രനും കുട്ടികളിലെ വൈകല്യ നിവാരണം എന്ന വിഷയത്തിൽ ഡോ. പി സാബിറും ബോധവത്കരണ ക്ലാസെടുത്തു. പിഎംആർ വിഭാഗം മേധാവി ഡോ. സൂരജ് രാജഗോപാൽ, ഡോ ഷീബ ദാമോദരൻ, ഡോ.കെ സുദീപ്, ഡോ എസ്.എം സരിൻ, ഡോ വി. സുനിൽ, ഡോ. മുഹമ്മദ് എം ടി പി, ഡോ ഹേമലത എന്നിവർ സംസാരിച്ചു.