കായിക കേരളത്തിന്റെ പ്രതീക്ഷകൾ വാനോളമുയർത്തി കേരള സ്‌കൂൾ കായിക മേളയ്ക്ക് കൊച്ചിയിൽ വർണാഭമായ തുടക്കം.എറണാകുളം മഹാരാജാസ് കോളേജ് ഗ്രൗണ്ടിലെ വേദിയിൽ പതിനാല് ജില്ലകളിൽ നിന്നും യുഎഇയിൽ നിന്നുമുള്ള കായികതാരങ്ങൾ അണിനിരന്ന മാർച്ച് പാസ്റ്റോടെയാണ് മേളയ്ക്ക് തുടക്കം കുറിച്ചത്.

സ്റ്റേഡിയത്തിൽ നടന്ന ദീപശിഖാപ്രയാണത്തിൽ പാലക്കാട് ജിഎംജി ഹയർസെക്കന്ററി സ്‌കൂളിലെ എസ്. സായന്ത്, മുരിക്കുംവയൽ വി.എച്ച്.എസ്.സി.യിലെ ജ്യുവൽ തോമസ്, കണ്ണൂർ സ്പോർട്ട്സ് സ്‌കൂളിലെ അഖില രാജൻ, കണ്ണൂർ സ്പോർട്ട്സ് ഡിവിഷനിലെ ശ്രീജി ഷാജി, സവിശേഷ പരിഗണന അർഹിക്കുന്ന എസ്. യശ്വിത, അനു ബിനു എന്നിവർ പങ്കെടുത്തു. തുടർന്ന് ഇവരിൽ നിന്നും മേളയുടെ ബ്രാൻഡ് അംബാസിഡറായ ഒളിമ്പ്യ9 പി. ആർ. ശ്രീജേഷ് ദീപശിഖ ഏറ്റുവാങ്ങി. വിദ്യാഭ്യാസ മന്ത്രി വി ശിവൻകുട്ടിയും പി. ആർ ശ്രീജേഷും വേളി ഇ.എം.എച്ച്.എസ്സിലെ സവിശേഷ പരിഗണന അർഹിക്കുന്ന കായികതാരമായ ശ്രീലക്ഷ്മിയും ചേർന്ന് ദിപശിഖ തെളിയിച്ചു. ശ്രീജി ഷാജി കായികതാരങ്ങൾക്കുള്ള പ്രതിജ്ഞ ചൊല്ലിക്കൊടുത്തു.

മേളയോടനുബന്ധിച്ചു നടന്ന സാംസ്‌കാരിക പരിപാടിയുടെ ഉദ്ഘാടനം ചലചിത്രതാരം മമ്മൂട്ടി നിർവ്വഹിച്ചു. ടി.ജെ. വിനോദ് എംഎൽഎ അധ്യക്ഷത വഹിച്ചു. ഹൈബി ഈഡൻ എം.പി, എം.എൽ.എമാരായ പി. വി. ശ്രീനിജിൻ, എൽദോസ് കുന്നപ്പിള്ളിൽ, കെ.എൻ. ഉണ്ണികൃഷ്ണൻ, ഉമ തോമസ്, കെ.ജെ. മാക്‌സി, കൊച്ചി മേയർ എം. അനിൽ കുമാർ, ജില്ലാ പഞ്ചായത്ത് പ്രസിഡൻറ് മനോജ് മൂത്തേടൻ, ജില്ലാ കളക്ടർ എൻ എസ് കെ ഉമേഷ്, പൊതുവിദ്യാഭ്യാസ ഡയറക്ടറുടെ ചുമതല വഹിക്കുന്ന ജീവൻ ബാബു, പൊതുവിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി റാണി ജോർജ്, എസ് സി ഇ ആർ ടി ഡയറക്ടർ ആർ. കെ. ജയപ്രകാശ്, സമഗ്ര ശിക്ഷ സ്റ്റേറ്റ് പ്രോജക്ട് ഡയറക്ടർ എ. ആർ. സുപ്രിയ, കൈറ്റ് സി ഇ ഒ അൻവർ സാദത്ത്, മഹാരാജാസ് കോളജ് പ്രിൻസിപ്പൽ എസ്. ഷാജില ബീവി, പൊതു വിദ്യാഭ്യാസ അഡീഷണൽ ഡയറക്ടർ സി. എ. സന്തോഷ്, ഡെപ്യൂട്ടി ഡയറക്ടർ ഹണി ജി. അലക്‌സാണ്ടർ സ്‌പോർട്‌സ് ഓർഗനൈസർ സി. എസ്. പ്രദീപ് തുടങ്ങിയവർ പങ്കെടുത്തു.

ഔദ്യോഗിക ഉദ്ഘാടനത്തിന് ശേഷം നാലായിരത്തിലധികം കുട്ടികൾ അണിനിരന്ന സാംസ്‌കാരിക പരിപാടികൾ നടന്നു. പിടി ഡിസ്‌പ്ലേ, കലസ്‌തെനിക്‌സ്, എയ്‌റോബിക്‌സ്, സൂംബ, അത്തച്ചമയം, ക്വീൻ ഓഫ് അറേബ്യൻ സീ, തിരുവാതിര, പുലികളി, ചെണ്ടമേളം തുടങ്ങിയവ അണിനിരന്നു.

ചരിത്രത്തിൽ ആദ്യമായി രണ്ടായിരത്തോളം ഭിന്നശേഷി കുട്ടികൾ കായികമേളയുടെ മത്സരങ്ങൾക്കൊപ്പം പങ്കുചേരും. 17 വേദികളിലായി 24000 ഓളം കുട്ടികൾ മത്സരിക്കും. മീറ്റിന്റെ പ്രധാന വേദിയായ മഹാരാജാസ് ഗ്രൗണ്ടിലാണ് ഇൻക്ലൂസീവ് മത്സരങ്ങൾ നടക്കുക. അത്ലറ്റിക്സ്, ഫുട്ബോൾ മത്സരങ്ങളാണ് ഇൻക്ലൂസീവ് വിഭാഗത്തിലുള്ളത്. ജില്ലയിലെ മറ്റ് 16 വേദികളിലായി ടെന്നീസ്, ടേബിൾ ടെന്നീസ്, ബാഡ്മിന്റൺ, ജൂഡോ, ഫുട്ബോൾ ത്രോ ബോൾ, സോഫ്റ്റ് ബോൾ വോളിബോൾ, ഹാൻഡ് ബോൾ, നീന്തൽ മത്സരങ്ങളും ആദ്യ ദിവസം നടക്കും. മത്സരങ്ങൾക്ക് അര മണിക്കൂർ മുമ്പ് തന്നെ റിപ്പോർട്ട് ചെയ്യണമെന്ന നിർദേശം മത്സരാർഥികൾക്ക് നൽകിയിട്ടുണ്ട്. ആദ്യ ദിവസം എട്ട് ഫൈനൽ മത്സരങ്ങളാണ് നടക്കുക.

മാർച്ച് പാസ്റ്റിൽ ഒന്നാം സ്ഥാനം കോട്ടയത്തിന്

കേരള സ്‌കൂൾ കായിക മേളയുടെ ഉദ്ഘാടനത്തിനു മുന്നോടിയായി മഹാരാജാസ് കോളേജ് ഗ്രൗണ്ടിൽ നടന്ന മാർച്ച് പാസ്റ്റിൽ കോട്ടയം ജില്ലയ്ക്ക് ഒന്നാംസ്ഥാനം. കൊല്ലം ജില്ലയാണ് രണ്ടാമത്. ആതിഥേയരായ എറണാകുളം ജില്ല മൂന്നാമതെത്തി.

കേരളത്തിന്റെ കൗമാരശക്തി അത്ഭുതപ്പെടുത്തുന്നു: മമ്മൂട്ടി

കേരളത്തിന്റെ കൗമാരശക്തിതന്നെ അത്ഭുതപ്പെടുത്തുന്നുവെന്ന് മമ്മൂട്ടി. കേരള സ്‌കൂൾ കായികമേളയോടനുബന്ധിച്ചുള്ള സാംസ്‌കാരിക പരിപാടികളുടെ ഉദ്ഘാടനം നിർവഹിക്കുകയായിരുന്നു അദ്ദേഹം. പ്രിയപ്പെട്ട തക്കുടുകളെയെന്ന് അഭിസംബോധന ചെയ്താണ് മമ്മൂട്ടി പ്രസംഗമാരംഭിച്ചത്. നാടിന്റെ അഭിമാനതാരങ്ങളാണ് നിങ്ങൾ. ജീവിതത്തിൽ രണ്ടാമതോ മൂന്നാമതോ അവസരങ്ങൾ കിട്ടുന്നവർ വളരെ ചുരുക്കമാണ്. കിട്ടുന്ന അവസരങ്ങളെല്ലാം ഉപയോഗപ്പെടുത്തുവാൻ ശ്രമിക്കണമെന്നും അദ്ദേഹം പറഞ്ഞു.

കൂടെ മത്സരിക്കുന്നവരാരും മോശക്കാരല്ലെന്ന് തിരിച്ചറിയണമെന്ന് അദ്ദേഹം കുട്ടികളെ ഓർപ്പെടുത്തി. കൂടെ ഓടാൻ ഒരാളുണ്ടാകുമ്പോൾ മാത്രമാണ് മത്സരമുണ്ടാകുക. മത്സരത്തിൽ ഒരാൾക്ക് മാത്രമേ വിജയിക്കാനാകൂ. കൂടെ മത്സരിക്കുന്നവരെ ഒരിക്കലും ശത്രുക്കളായി കാണരുതെന്നും മമ്മൂട്ടി പറഞ്ഞു. ഒരു നൂറ് ഒളിംപിക്സ് മെഡലുകളുമായി രാജ്യത്തിന്റെ അഭിമാനമാകാൻ ഓരോ കായിക താരത്തിനും കഴിയട്ടെയെന്നും അദ്ദേഹം ആശംസിച്ചു.