തീരമേഖലയിലെ ജനങ്ങളുടെ പ്രശ്‌നങ്ങൾ നേരിട്ട് മനസിലാക്കുന്നതിനും പരിഹരിക്കുന്നതിനുമായി ഫിഷറീസ് വകുപ്പ് സംഘടിപ്പിച്ച 'തീരത്തെ കേൾക്കാൻ, ചേർത്ത് പിടിക്കാൻ തീരസദസ്സ്' പരിപാടിയുടെ ഭാഗമായി തിരുവനന്തപുരം ജില്ലയിൽ 83,21,862 രൂപ ധനസഹായം നൽകി. നെയ്യാറ്റിൻകര, കോവളം, നേമം, തിരുവനന്തപുരം, കഴക്കൂട്ടം, ചിറയിൻകീഴ്, വർക്കല തുടങ്ങി ഏഴ് തീരദേശമണ്ഡലങ്ങളിലാണ് തീരസദസ്സ് നടന്നത്. ഫിഷറീസ് വകുപ്പ് മന്ത്രി സജി ചെറിയാന്റെ നേതൃത്വത്തിൽ അതത് മണ്ഡലങ്ങളിലെ എം.എൽ.എമാരും ജനപ്രതിനിധികളും പങ്കെടുത്തു. ജില്ലയിലാകെ 7602 അപേക്ഷകളാണ് ലഭിച്ചത്.

നെയ്യാറ്റിൻകര മണ്ഡലത്തിലാണ് ഏറ്റവും കൂടുതൽ അപേക്ഷകൾ ലഭിച്ചത്. 2430 അപേക്ഷകൾ നെയ്യാറ്റിൻകരയിൽ ലഭിച്ചു. മണ്ഡലത്തിൽ തീരസദസ്സിന്റെ ഭാഗമായി 21,84,500 രൂപ ധനസഹായം നൽകി. വിവാഹധനസഹായമായി 60 ഗുണഭോക്താക്കൾക്ക് ആറ് ലക്ഷം രൂപ നൽകി. മത്സ്യത്തൊഴിലാളി ഏഴ് ഗ്രൂപ്പുകൾക്ക് സ്വയം തൊഴിൽ വായ്പാ ധനസഹായമായി 4,19,500 രൂപയും അനുവദിച്ചു.

കോവളം മണ്ഡലത്തിൽ 2206 അപേക്ഷകളായിരുന്നു ലഭിച്ചത്. വിവാഹധനസഹായമായി 48 ഗുണഭോക്താക്കൾക്ക് 4,80,000 രൂപയും മരണാനന്തര ധനസഹായമായി 12 പേർക്ക് 1,80,000 രൂപയും മത്സ്യതൊഴിലാളി 6 ഗ്രൂപ്പുകൾക്ക് സ്വയം തൊഴിൽ വായ്പാ ധനസഹായമായി 4,32,500 രൂപയും ഉൾപ്പെടെ 10,92,500 രൂപയുടെ ധനസഹായം നൽകി.

നേമം മണ്ഡലത്തിൽ 4 മത്സ്യത്തൊഴിലാളി ഗ്രൂപ്പുകൾക്ക് സ്വയം തൊഴിൽ വായ്പാ ധനസഹായമായി 4,14,887 രൂപ ഉൾപ്പെടെ 4,24,887 രൂപയുടെ ധനസഹായമാണ് തീരസദസ്സിൽ നൽകിയത്. അദാലത്തിൽ വിവിധ ആവശ്യങ്ങൾക്കായുളള 30 അപേക്ഷകളാണ് ലഭിച്ചത്.

തിരുവനന്തപുരം മണ്ഡലത്തിൽ വിവാഹ ധനസഹായമായി 29 ഗുണഭോക്താക്കൾക്ക് 2,90,000 രൂപയും മരണാനന്തര ധനസഹായമായി 21 പേർക്ക് 3,15,000 രൂപയും നാല് മത്സ്യതൊഴിലാളി ഗ്രൂപ്പുകൾക്ക് സ്വയം തൊഴിൽ വായ്പാ ധനസഹായമായി 3,84,625 രൂപയും ഉൾപ്പെടെ 9,89,625 രൂപയുടെ ധനസഹായം നൽകി.

കഴക്കൂട്ടം മണ്ഡലത്തിൽ വിവാഹ ധനസഹായമായി നാല് ഗുണഭോക്താക്കൾക്ക് 40,000 രൂപയും അഞ്ച് സാഫ് വനിത മത്സ്യതൊഴിലാളി ഗ്രൂപ്പുകൾക്ക് സ്വയം തൊഴിൽ വായ്പാ ധനസഹായമായി 4,06,100 രൂപയും ഉൾപ്പെടെ 4,46,100 രൂപയുടെ ധനസഹായമാണ് മന്ത്രി അനുവദിച്ചത്.

ചിറയിൻകീഴ് മണ്ഡലത്തിൽ ഇൻഷുറൻസ് ധനസഹായമായി 3 പേർക്ക് 20,00,000 രൂപയും വിവാഹ ധനസഹായമായി 30 ഗുണഭോക്താക്കൾക്ക് 3,00,000 രൂപയും മരണാനന്തര ധനസഹായമായി 20 പേർക്ക് 3,00,000 രൂപയും ഏഴ് സാഫ് വനിത മത്സ്യതൊഴിലാളി ഗ്രൂപ്പുകൾക്ക് സ്വയം തൊഴിൽ വായ്പാ ധനസഹായമായി 2,66,225 രൂപയും ഉൾപ്പെടെ 28,65,225 രൂപയുടെ ധനസഹായം നൽകി.

വർക്കല മണ്ഡലത്തിലെ തീരസദസ്സിൽ വിവാഹ ധനസഹായമായി 14 ഗുണഭോക്താക്കൾക്ക് 1,40,000 രൂപയും മരണാനന്തര ധനസഹായമായി അഞ്ച് പേർക്ക് 75,000 രൂപയും രണ്ട് മത്സ്യതൊഴിലാളി ഗ്രൂപ്പുകൾക്ക് സ്വയം തൊഴിൽ വായ്പാ ധനസഹായമായി 1,04,025 രൂപയും ഉൾപ്പെടെ 3,19,025 രൂപയുടെ ധനസഹായമാണ് അനുവദിച്ചത്.

ഭവന സംബന്ധമായ പരാതികൾ, ലൈഫ് മിഷൻ, വീടിന്റെ ഉടമസ്ഥാവകാശം, പുനർഗേഹം, കെഎംഎഫ്ആർ ആക്ട് സംബന്ധമായ പരാതികൾ, വിഴിഞ്ഞം തുറമുഖ നഷ്ടപരിഹാരം, വിവിധ ധനസഹായ പദ്ധതികൾ, റേഷൻകാർഡ്, പട്ടയം, റീസർവേ, ഇൻഷുറൻസ്, കടാശ്വാസം, മത്സ്യബന്ധന ഉപകരണങ്ങൾ, മണ്ണെണ്ണ പെർമിറ്റ്, മത്സ്യഫെഡ് സൊസൈറ്റി അഫിലിയേഷൻ, വൈദ്യുതി, കുടിവെള്ള കണക്ഷൻ, റോഡ് ടാറിംഗ് തുടങ്ങി അൻപതിലധികം വിഷയങ്ങളാണ് തീരസദസ്സിൽ പരിഗണനയ്‌ക്കെത്തിയത്. ഫിഷറീസ് വകുപ്പുമായി ബന്ധപ്പെട്ട അപേക്ഷകളിൽ തീരസദസിൽ തന്നെ നടപടി എടുക്കുകയും മറ്റ് അപേക്ഷകൾ തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറുകയും ചെയ്തു.