തൃശൂര്‍: കോര്‍പ്പറേഷന്‍ പരിധിയിലെ വൈദ്യുത മീറ്റര്‍ റീഡിങിനുള്ള മൊബൈല്‍ അപ്ലിക്കേഷന്‍ തയ്യാറാകുന്നു. ഇനി മീറ്റര്‍ റീഡിങ്ങും ബില്ലടക്കലും ഒരു പോലെ സ്മാര്‍ട്ടാകും. ഈ സംവിധാനം തയ്യാറാവുന്നതോടെ മീറ്റര്‍ റീഡ് ചെയ്തു കഴിഞ്ഞാല്‍ ഉടന്‍ തന്നെ ഇ പേയ്‌മെന്റ് വെബ്‌സൈറ്റില്‍ ബില്ല് കാണാനാകും.  Tced online.in എന്ന വെബ് സൈറ്റില്‍ കയറിയാല്‍ ബില്ല്, കുടിശ്ശിക ബില്‍, പലിശ, അടച്ച ബില്ലിന്റെ വിവരങ്ങള്‍ എന്നിവ അറിയാനാകും.

ഇതിന്റെ ഭാഗമായി കോര്‍പ്പറേഷന്‍ പരിധിയിലെ എല്ലാ വീടുകളിലെയും വൈദ്യുത മീറ്ററുകളില്‍ ക്യു ആര്‍ കോഡ് പതിപ്പിക്കും. ഇതോടെ റീഡിങ് എടുക്കുന്ന ഉദ്യോഗസ്ഥന്‍ വീടുകളില്‍ മൊബൈലുമായാണ് എത്തുക. ഇതുപയോഗിച്ച് വീടുകളിലെ മീറ്ററിലുള്ള ക്യൂ ആര്‍ കോഡ് സ്‌കാന്‍ ചെയ്യുമ്പോള്‍ തന്നെ ഉപഭോക്താവിന്റെ എല്ലാ വിവരങ്ങളും ലഭിക്കും. റീഡിംഗ് രേഖപ്പെടുത്തുമ്പോള്‍ ഉടന്‍ തൃശൂര്‍ കോര്‍പ്പറേഷന്‍ ഇലക്ട്രിക്കല്‍ വകുപ്പിന്റെ സോഫ്റ്റ്‌വെയറിലെ ഡാറ്റാ ബേസിലേക്ക് നേരിട്ട് ഇത് എന്‍ട്രി ചെയ്യപ്പെടും. സമയ ലാഭത്തിന് പുറമെ പൂര്‍ണമായും കടലാസ് രഹിതമാകും ഇതോടെ മീറ്റര്‍ റീഡിങ്. അച്ചടി ചിലവും കുറയും. ഉപഭോക്താക്കളുടെ രജിസ്റ്റര്‍ ചെയ്ത മൊബൈല്‍ നമ്പറുകളിലേക്ക് ബില്ല് മെസേജായി അയയ്ക്കാനും ഇതോടെ സാധിക്കും. കോര്‍പ്പറേഷന്‍ പരിധിയിലെ ചെറുതും വലുതുമായ 40,000 വൈദ്യുത ഉപഭോക്താക്കള്‍ക്കാണ് ഇതിന്റെ ഗുണം ലഭിക്കുക.