'എല്ലാവർക്കും ഭൂമി, എല്ലാ ഭൂമിക്കും രേഖ' എന്ന ലക്ഷ്യം നിറവേറ്റുന്നതിന് സംസ്ഥാന സർക്കാർ നടപ്പിലാക്കുന്ന മൂന്നാം പട്ടയ മിഷൻ - 2022 പദ്ധതിയുടെ ഭാഗമായി ജില്ലയിലെ വിവിധ ലാൻഡ് ട്രൈബ്യൂണലുകൾ കേന്ദ്രീകരിച്ച് നവംബർ 14 മുതൽ പ്രത്യേക അദാലത്തുകൾ സംഘടിപ്പിക്കുന്നു. നിലവിൽ വിചാരണ നടന്നുവരുന്നതും വിചാരണകൾ നടത്തിയിട്ടില്ലാത്തതുമായ കേസുകളിൽ ഉൾപ്പെട്ട കക്ഷികൾക്ക് അദാലത്തിൽ പങ്കെടുത്ത് രേഖകൾ ഹാജരാക്കാം. അദാലത്തിൽ പങ്കെടുത്തവർക്കായി പ്രത്യേകം വിചാരണ നടത്തി എല്ലാ കേസുകളിലും 2023 മാർച്ച് 30 നകം തീർപ്പുകൽപ്പിക്കും.

മഞ്ചേരി ലാൻഡ് ട്രൈബ്യൂണൽ പരിധിയിൽ വരുന്ന താലൂക്കുകളിലുള്ളവർക്ക് മഞ്ചേരി വില്ലേജ് ഓഫീസ് ഹാളിലാണ് അദാലത്ത് നടക്കുക. നവംബർ 14ന് പെരിന്തൽമണ്ണ താലൂക്ക്, 15ന് ഏറനാട് താലൂക്ക്, 16 ന് നിലമ്പൂർ താലൂക്ക് എന്നിങ്ങനെ രാവിലെ 10.30 മുതൽ അദാലത്ത് നടക്കും. തിരൂർ ലാൻഡ് ട്രൈബ്യൂണൽ പരിധിയിൽ വരുന്ന തിരൂർ താലൂക്കിൽ നിന്നുള്ള കേസുകളിൽ നവംബർ 14നും പൊന്നാനി താലൂക്കിൽ നിന്നുള്ള കേസുകളിൽ 15നും തിരൂർ ലാൻഡ് ട്രൈബ്യൂണൽ ഓഫീസ് ഹാളിൽ വെച്ച് രാവിലെ 10.30ന് അദാലത്ത് നടക്കും. തിരൂരങ്ങാടി ലാൻഡ് ട്രൈബ്യൂണൽ പരിധിയിൽ വരുന്ന കൊണ്ടോട്ടി താലൂക്കിൽ നിന്നുള്ള കേസുകളിൽ 14നും തിരൂരങ്ങാടി താലൂക്കിൽ നിന്നുള്ള കേസുകളിൽ 15നും തിരൂരങ്ങാടി ലാൻഡ് ട്രൈബ്യൂണൽ ഓഫീസ് ഹാളിൽ വെച്ച് രാവിലെ 10.30 മുതൽ അദാലത്ത് നടക്കും.

തിരൂർ എൽ.എ (ജി) ഓഫീസിന് കീഴിൽ പൊന്നാനി താലൂക്ക് പരിധിയിൽ വരുന്ന കേസുകളിൽ എൽ.എ (ജി) ഹാളിൽ വെച്ചും മലപ്പുറം എൽ.എ (ജി) ഓഫീസിന് കീഴിൽ തിരൂർ താലൂക്ക് പരിധിയിൽ വരുന്ന കേസുകളിൽ എൽ.എ (ജി) ഓഫീസിൽ വെച്ചും നവംബർ 15 ന് രാവിലെ 10.30 മുതൽ അദാലത്ത് നടക്കും. എൽ.എ (എയർപോർട്ട് കരിപ്പൂർ) പരിധിയിൽ വരുന്ന കേസുകളിൽ നവംബർ 14ന് തിരൂർ എൽ.ടി ഓഫീസ് ഹാൾ, 15ന് തിരൂർ എൽ.എ (ജി) ഓഫീസ് ഹാൾ എന്നിവിടങ്ങിൽ വെച്ച് അദാലത്ത് നടക്കും.

മലപ്പുറം ദേവസ്വം പട്ടയ ഓഫീസിന് കീഴിൽ പെരിന്തൽമണ്ണ ആർ.ഡി.ഒ ഓഫീസ് പരിധിയിൽ വരുന്ന കേസുകളിൽ നവംബർ 14, 15 തിയ്യതികളിലും തിരൂർ ആർ.ഡി.ഒ ഓഫീസ് പരിധിയിൽ വരുന്ന കേസുകളിൽ നവംബർ 16, 17 തിയ്യതികളിലും മലപ്പുറം കളക്ടറേറ്റിലെ എൽ.ആർ ബ്ലോക്കിലെ ഓഫീസിൽ വെച്ചും രാവിലെ 10.30ന് അദാലത്ത് നടക്കും.

മുകളിൽ സൂചിപ്പിച്ച തീയ്യതിയിലും സമയത്തും ബന്ധപ്പെട്ട സ്ഥലത്ത് ഹാജരായി ആധാരം, അടിയാധാരം (ഇതിനകം ഹാജരാക്കിയിട്ടില്ലെങ്കിൽ), നടപ്പുവർഷത്തെ നികുതി രസീത്, കൈവശ സർട്ടിഫിക്കേറ്റ് എന്നിവ സമർപ്പിക്കണം. രേഖകൾ ഹാജരാക്കുന്നതിന് കൂടുതൽ സമയം ആവശ്യമുളളവർ അദാലത്തിൽ പങ്കെടുത്ത് ഇക്കാര്യം രേഖാമൂലം ആവശ്യപ്പെടേണ്ടതാണെന്നും ജില്ലാ കളക്ടർ അറിയിച്ചു.