തൃശൂർ: പുന്നയൂര്‍ ഗ്രാമപഞ്ചായത്തിലെ മത്സ്യഭവന്‍ കുടിവെള്ള പദ്ധതി വനം വകുപ്പ് മന്ത്രി എ കെ ശശീന്ദ്രന്‍ ഉദ്ഘാടനം ചെയ്തു. 11, 14 വാര്‍ഡുകളിലായി വരുന്ന ഇരുന്നൂറോളം  കുടുംബങ്ങളുടെ കുടിവെള്ളക്ഷാമത്തിന് പരിഹാരമാണ് മത്സ്യഭവന്‍ കുടിവെള്ള പദ്ധതി. ചാവക്കാട് ബ്ലോക്ക് പഞ്ചായത്ത് ഫണ്ടില്‍നിന്നും 10 ലക്ഷം രൂപയും  ഗ്രാമപഞ്ചായത്ത് ഫണ്ടില്‍നിന്ന്  19,32,000 രൂപയും വിനിയോഗിച്ച് ഒരു വര്‍ഷം കൊണ്ടാണ് പദ്ധതിയുടെ പണി പൂര്‍ത്തീകരിച്ചത്. അയ്യായിരം ലിറ്റര്‍ വെള്ളം സംഭരണശേഷിയുള്ള രണ്ട് ടാങ്കാണ് പദ്ധതിക്ക് വേണ്ടി തയ്യാറാക്കിയിട്ടുള്ളത്. സമീപത്തെ കിണറ്റില്‍ നിന്നുള്ള വെള്ളം ശുദ്ധീകരിച്ച് ടാങ്കില്‍ സംഭരിക്കും.  രണ്ട് വീടിന് ഒരു ടാപ്പ് എന്ന നിലയില്‍ വീടുകളിലേക്ക് പൈപ്പ് ലൈന്‍ വഴി കുടിവെള്ളം എത്തിക്കും. രാവിലെ വാര്‍ഡ് പതിനൊന്നിലേക്കും ഉച്ചയ്ക്ക് വാര്‍ഡ് പതിനാലിലേക്കും എന്ന രീതിയിലാണ് വെള്ളം തുറന്ന് വിടുക.