തിരുവനന്തപുരം : സംസ്ഥാനത്തിന്റെ പുതിയ ചീഫ് സെക്രട്ടറിയായി ഡോ. വിശ്വാസ് മേത്ത ചുമലതയേറ്റു. രാവിലെ 9.35നാണ് സെക്രട്ടേറിയറ്റിലെ ഓഫീസിലെത്തി ചുമതലയേറ്റത്. ഭാര്യ പ്രീതി മേത്ത അദ്ദേഹത്തോടൊപ്പം ഉണ്ടായിരുന്നു. സ്ഥാനമൊഴിഞ്ഞ ചീഫ് സെക്രട്ടറി ടോം ജോസ് ബൊക്കെ നല്‍കി അദ്ദേഹത്തെ സ്വീകരിച്ചു. പുതിയ ചീഫ് സെക്രട്ടറിക്ക് എല്ലാ ആശംസകളും നേരുന്നതായി അദ്ദേഹം പറഞ്ഞു. തുടര്‍ന്ന് ചുമതല കൈമാറി. അഡീഷണല്‍ ചീഫ് സെക്രട്ടറിമാരായ ടി. കെ. ജോസ്, ആശാ തോമസ്, ടിക്കറാം മീണ, രാജഷ് കുമാര്‍ സിംഗ്, സംസ്ഥാന പോലീസ് മേധാവി ലോക്‌നാഥ് ബെഹ്‌റ, വിവിധ വകുപ്പുകളുടെ സെക്രട്ടറിമാര്‍, തിരുവനന്തപുരം ജില്ലാ പോലീസ് മേധാവി ബല്‍റാം കുമാര്‍ ഉപാധ്യായ എന്നിവര്‍ സന്നിഹിതരായിരുന്നു. മുഖ്യമന്ത്രിയുടെ അധ്യക്ഷതയില്‍ നടന്ന കോവിഡ് 19 ഉന്നതതല യോഗത്തില്‍ പുതിയ ചീഫ് സെക്രട്ടറി പങ്കെടുത്തു.

കഴിവിനനുസരിച്ച് സംസ്ഥാനത്തെ സേവിക്കാന്‍ കഴിഞ്ഞുവെന്നാണ് വിശ്വാസമെന്ന് സ്ഥാനമൊഴിഞ്ഞ ചീഫ് സെക്രട്ടറി ടോം ജോസ് പറഞ്ഞു.സ്ഥാനമേറ്റെടുത്ത ശേഷം പ്രളയം, നിപ്പ, കോവിഡ് 19 തുടങ്ങി നിരവധി വെല്ലുവിളികളെ നേരിടേണ്ടി വന്നു. മാലിന്യസംസ്‌കരണ പദ്ധതികള്‍ക്ക് തുടക്കമിടാനായി എന്ന ചാരിതാര്‍ത്ഥ്യത്തോടെയാണ് വിരമിക്കുന്നതെന്നും അദ്ദേഹം പറഞ്ഞു. ചീഫ് സെക്രട്ടറിയുടെ ഓഫീസിലെ ജീവനക്കാര്‍ അദ്ദേഹത്തിന് ഉപഹാരം സമ്മാനിച്ചു. ജീവനക്കാര്‍ക്കൊപ്പം ഗ്രൂപ്പ് ഫോട്ടോ എടുത്ത ശേഷമാണ് അദ്ദേഹം മടങ്ങിയത്