ചാമ്പ്യൻസ് ബോട്ട് ലീഗ് അഞ്ചാം സീസൺ സംസ്ഥാനതല ഉദ്ഘാടനം ടൂറിസം, പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ് ഓൺലൈനായി കൈനകരിയിൽ നിർവഹിച്ചു.

ആറാം സീസണിൽ എത്തുമ്പോൾ ചാമ്പ്യൻസ് ബോട്ട് ലീഗ് ലോക ശ്രദ്ധ പിടിച്ചുപറ്റുമെന്നും അതിനുള്ള ശ്രമങ്ങൾക്ക് സർക്കാർ തുടക്കം കുറിച്ചതായും മന്ത്രി പറഞ്ഞു.സിബിഎൽ തുടങ്ങി നാലാം സീസൺ എത്തിയപ്പോഴേക്കും രാജ്യാന്തരശ്രദ്ധ പിടിച്ചുപറ്റാൻ നമുക്ക് സാധിച്ചു. ആറാം സീസണിലേക്ക് എത്തുമ്പോൾ ലോകശ്രദ്ധ പിടിച്ചുപറ്റുന്ന നിലയിലേക്കെത്തുവാനുള്ള പ്രവർത്തനങ്ങൾ ടൂറിസം വകുപ്പ് ആരംഭിച്ചിട്ടുണ്ട്. ഇതിന്റെ ഭാഗമായി ലോകരാജ്യങ്ങളിൽ ചാമ്പ്യൻസ് ബോട്ട് ലീഗിന്റെ പ്രചാരണത്തിനുവേണ്ടി സർക്കാർ മൈക്രോ സൈറ്റ് പുറത്തിറക്കി. വള്ളംകളിയുടെ സമഗ്രവിവരങ്ങൾ രേഖപ്പെടുത്തിയ സൈറ്റ് വഴി കൂടുതൽ വിദേശ സഞ്ചാരികളെ സിബിഎൽ വേദിയിലേക്ക് എത്തിക്കുകയാണ് ലക്ഷ്യം.

ഭാവിയിൽ ഈ സൈറ്റ് വഴി ടൂർ ബുക്കിംഗ് വരെ നടപ്പാക്കാൻ ലക്ഷ്യമുണ്ടെന്നും അദ്ദേഹം പറഞ്ഞു. സംസ്ഥാനമൊട്ടാകെയുള്ള വള്ളംകളി മത്സരങ്ങളെ കോർത്തിണക്കി വള്ളംകളി കൂടുതൽ വ്യാപകമായി സംഘടിപ്പിക്കണമെന്നാണ് സർക്കാർ ലക്ഷ്യം. അതുകൊണ്ടുതന്നെ ഇത്തവണ കേരളത്തിന്റെ വടക്കുഭാഗത്തുള്ള ജില്ലകളിലും ബോട്ട് ലീഗിന്റെ ഭാഗമായി വള്ളംകളി മത്സരങ്ങൾ സംഘടിപ്പിക്കുന്നുണ്ടെന്നും മന്ത്രി പറഞ്ഞു.

ഉദ്ഘാടന സമ്മേളനത്തിൽ മുൻ എംഎൽഎ സി കെ സദാശിവൻ അധ്യക്ഷനായി. ജില്ലാ കളക്ടർ അലക്സ് വർഗീസ് സിബിഎൽ സന്ദേശം നൽകി.