ലോകവ്യാപാരക്കരാറുകൾക്കെതിരെ കരുതിയിരിക്കണം: മന്ത്രി കെ.എൻ ബാലഗോപാൽ

കൊട്ടാരക്കര ബ്ലോക്കിന് അനുവദിച്ച മൊബൈൽ വെറ്ററിനറി യൂണിറ്റിന്റെ ഉദ്ഘാടനവും ഫ്ലാഗ് ഓഫും മന്ത്രി കെ.എൻ ബാലഗോപാൽ നിർവഹിച്ചു. ലോകവ്യാപാരക്കരാറുകൾ കർഷകരെ പ്രതികൂലമായി ബാധിക്കാതെ നോക്കാൻ സംസ്ഥാന സർക്കാർ പ്രതിജ്ഞാബദ്ധമാണെന്ന് മന്ത്രി പറഞ്ഞു. പാലും പാലുല്പന്നങ്ങളും ഇറക്കുമതി ചെയ്യാനുള്ള തീരുമാനം കർഷകരെ ബാധിക്കും. അത്തരം കരാറുകൾക്കെതിരെ ജാഗ്രത വേണ്ടതിനൊപ്പം അവയെ മറികടക്കാനുള്ള സാങ്കേതികവിദ്യകളും ഉണ്ടാകണം. ഏത് സമയത്തും വീട്ടുപടിക്കൽ സേവനം എത്തിക്കാൻ കഴിയുന്ന മൊബൈൽ വെറ്ററിനറി യൂണിറ്റ് വലിയ മാറ്റങ്ങൾ സൃഷ്ടിക്കും. ക്ഷീര കർഷകർക്ക് ചികിത്സാ ചെലവ് കുറയ്ക്കുന്നതിനും ഈ സംവിധാനം സഹായകരമാകുമെന്നും മന്ത്രി കൂട്ടിച്ചേർത്തു.

കൊട്ടാരക്കര ബ്ലോക്കിന് അനുവദിച്ച മൊബൈൽ വെറ്ററിനറി യൂണിറ്റ് കുഴിമതിക്കാട് മൃഗാശുപത്രി കേന്ദ്രമാക്കിയാണ് പ്രവർത്തിക്കുന്നത്. വൈകിട്ട് നാലു മുതൽ രാത്രി 12 വരെയാണ് ഈ യൂണിറ്റുകളുടെ പ്രവർത്തനം. ഒരു യൂണിറ്റിൽ ഒരു വെറ്ററിനറി സർജനും ഒരു ഡ്രൈവർ അറ്റൻഡറുമാണ് ഉണ്ടാവുക. 1962 എന്ന ടോൾഫ്രീ നമ്പറിലേക്ക് വിളിച്ചാൽ വാഹനം കർഷകരുടെ വീട്ടുമുറ്റത്തെത്തും. സേവനത്തിനുള്ള ഫീസ് ക്യൂ.ആർ കോഡ് വഴി അടയ്ക്കാം.

കൊട്ടാരക്കര ബ്ലോക്കിൽ എഴുകോൺ, കരീപ്ര, തേവലപ്പുറം, വെളിയം, പൂയപ്പള്ളി പഞ്ചായത്തുകളിലും ചിറ്റുമല ബ്ലോക്കിൽ മൺട്രോത്തുരുത്ത്, ഈസ്റ്റ് കല്ലട, പെരിനാട്, പേരയം, കുണ്ടറ, പനയം, തൃക്കരുവ എന്നീ പഞ്ചായത്തുകളിലും സേവനം ലഭ്യമാകും. കന്നുകാലികൾ, ആടുകൾ അരുമ മൃഗങ്ങൾ എന്നിവയുടെ രോഗ ചികിത്സയ്ക്ക് മൊബൈൽ യൂണിറ്റ് സഹായകമാകും.

കൊട്ടാരക്കര ബ്ലോക്ക് പഞ്ചായത്ത് പ്രസിഡന്റ് എ അഭിലാഷ് അധ്യക്ഷനായി. 'കാലി വളർത്തൽ കാലത്തിനൊത്ത്' വിഷയത്തിൽ കൊട്ടിയം ലൈവ് സ്റ്റോക്ക് മാനേജ്മെന്റ് പരിശീലനകേന്ദ്രം സംഘടിപ്പിച്ച സെമിനാർ പവിത്രേശ്വരം വെറ്ററിനറി സർജൻ ഡോ. ടി. അഭിലാഷ് നയിച്ചു.

കൊട്ടാരക്കര ബ്ലോക്ക് പഞ്ചായത്ത് അങ്കണത്തിൽ നടന്ന പരിപാടിയിൽ ജില്ലാ മൃഗസംരക്ഷണ ഓഫീസർ ഡോ ഷൈൻ കുമാർ, കരീപ്ര പഞ്ചായത്ത് പ്രസിഡന്റ് എസ് എസ് സുവിധ, കൊട്ടാരക്കര ബ്ലോക്ക് പഞ്ചായത്ത് വൈസ് പ്രസിഡന്റ് കെ. മിനി, ക്ഷേമകാര്യ സ്റ്റാൻഡിം​ഗ് കമ്മിറ്റി ചെയർപേഴ്‌സൺ എം ലീലാമ്മ, ആരോഗ്യ സ്റ്റാൻഡിം​ഗ് കമ്മിറ്റി ചെയർപേഴ്‌സൺ സജനി ഭദ്രൻ, ബ്ലോക്ക് പഞ്ചായത്ത് മെമ്പർമാരായ എം ശിവപ്രസാദ്, ദിവ്യാ സജിത്ത്, ഗീതാ ജോർജ്, വത്സമ്മ തോമസ്, മിനി അനിൽ, ഷീബ പി ബേബി, കൊട്ടാരക്കര ബ്ലോക്ക് പഞ്ചായത്ത് സെക്രട്ടറി എൽ വി റാണി, അസിസ്റ്റന്റ് പ്രൊജക്റ്റ് ഓഫീസർ ഡോ. എസ് ദീപ്തി, അസിസ്റ്റന്റ് ഡയറക്ടർ ഡോ.കെ.ജി പ്രദീപ്, ചീഫ് വെറ്ററിനറി ഓഫീസർ ജി. രമ ഉണ്ണിത്താൻ, വെറ്ററിനറി സർജൻ ഡോ. ഷാക്കിറമോൾ തുടങ്ങിയവർ പങ്കെടുത്തു.