കോട്ടയം പാറത്തോട് ഗ്രാമപഞ്ചായത്തിൽ പ്രളയത്തിൽ വീട് നഷ്ടപ്പെട്ട രണ്ടു കുടുംബങ്ങൾക്ക് കുടുംബശ്രീ പ്രവർത്തകർ നിർമിച്ചു നൽകിയ വീടിന്റെ താക്കോൽ വിതരണം ഗ്രാമപഞ്ചായത്ത് ഹാളിൽ സഹകരണ-തുറമുഖ വകുപ്പ് മന്ത്രി വി.എൻ. വാസവൻ നിർവഹിച്ചു. ഏതു പ്രതിസന്ധിയിലും കൂടെയുള്ളവരെ ചേർത്തുനിർത്തുന്ന കുടുംബശ്രീയുടെ പ്രവർത്തനം മാതൃകാപരമാണെന്ന് മന്ത്രി പറഞ്ഞു. ഏഷ്യയിലെ ഏറ്റവും വലിയ സ്ത്രീ ശാക്തീകരണ സംഘടനയാണ് കുടുംബശ്രീ. ഗ്രാമപഞ്ചായത്തുകളിലെ പല പദ്ധതികളും ഏറ്റെടുത്ത് നടപ്പാക്കുന്നതിലും കുടുംബശ്രീ വിജയം കൈവരിച്ചിട്ടുണ്ടെന്നും മന്ത്രി പറഞ്ഞു.

കൊച്ചുവീട്ടിൽ സുനിത ജോൺ, പാലാ തോട്ടത്തിൽ ബിന്ദു മധു എന്നിവർ വീടിന്റെ താക്കോൽ ഏറ്റുവാങ്ങി. 10.17 ലക്ഷം രൂപ ചെലവിലാണ് വീടുകൾ നിർമിച്ചത്. ഗ്രാമപഞ്ചായത്ത് പ്രസിഡന്റ് വിജയമ്മ വിജയലാൽ ചടങ്ങിൽ അധ്യക്ഷയായി. കോട്ടയം ഡി.എം.സി. പ്രശാന്ത് ബാബു കുടുംബശ്രീ സന്ദേശം നൽകി.