ഗ്രാമീണ ടൂറിസം വഴികള്‍ തേടി ചോലപ്പുറം പച്ചത്തുരുത്ത്
വയനാട് വെങ്ങപ്പള്ളി പഞ്ചായത്തിലെ ചോലപ്പുറം പച്ചത്തുരുത്ത് ഗ്രാമീണ ടൂറിസത്തിന്റെ വഴികള്‍ തേടുന്നു. പുഴയോരത്തിന്റെ സ്വഭാവികത നഷ്ടപ്പെടാതെ തന്നെ മുളകളും മരങ്ങളും പഴവര്‍ഗ്ഗങ്ങളും ഇവിടെ നട്ടുപിടിപ്പിച്ചിട്ടുണ്ട്. എം.എസ് സ്വാമിനാഥന്‍ റിസേര്‍ച്ച് ഫൗണ്ടേഷന്റെ സഹായത്തോടെ പച്ചത്തുരുത്തിലെ മുഴുവന്‍ ചെടികളുടെയും കണക്കെടുത്ത് അവയെ തരംതിരിച്ച് അവയുടെ യഥാര്‍ത്ഥ പേര്, ശാസ്ത്രീയ നാമം എന്നിവ രേഖപ്പെടുത്തും. പച്ചത്തുരുത്തില്‍ അപൂര്‍വ്വ ഇനത്തില്‍പ്പെട്ട ചെടികളും നട്ടുപിടിപ്പിക്കും.
എം.എസ് സ്വാമിനാഥന്‍ റിസര്‍ച്ച് ഫൌണ്ടേഷന്റെ സഹകരണത്തോടെയാണ് പച്ചതുരുത്തിന്റെ തുടര്‍പ്രവര്‍ത്തങ്ങള്‍ ആസൂത്രണം ചെയ്തിരിക്കുന്നത്. ഹരിതകേരളം മിഷന്റെ നേതൃത്വത്തില്‍ തദ്ദേശ സ്വയംഭരണ സ്ഥാപനത്തിന്റെയും തൊഴിലുറപ്പ് പദ്ധതിയുടെയും സഹകരണത്തോടെ നടപ്പിലാക്കിയ ഈ പച്ചതുരുത്ത് ജില്ലയിലെ ഏറ്റവും മികച്ച പച്ചത്തുരുത്താണ്. എടത്തറക്കടവ് പുഴയുടെ തീരത്തായി ഒരു ഏക്കറിലധികം വിസ്തൃതിയില്‍ വ്യാപിച്ചു കിടക്കുന്ന ചോലപ്പുറത്തെ ഒരു ചെറു വനമാക്കാന്‍ ഹരിത കേരളം മിഷനും പഞ്ചായത്തും ചേര്‍ന്ന് തിരഞ്ഞെടുത്തു. ഹരിതകേരളം മിഷന്റെ നേതൃത്വത്തില്‍ തദ്ദേശ സ്വയംഭരണ സ്ഥാപനത്തിന്റെയും തൊഴിലുറപ്പ് പദ്ധതിയുടെയും സഹകരണത്തോടെയാണ് പച്ചത്തുരുത്തിന്റെ പരിപാലനം.
പച്ചത്തുരുത്തിന്റെ ഒരു ഭാഗം ചിത്രശലഭങ്ങള്‍ക്കായി ഒരുക്കും. വിവിധതരം ചിത്ര ശലഭങ്ങളെ ആകര്‍ഷിക്കുന്നത് വഴി പച്ചതുരുത്ത് കൂടുതല്‍ ആകര്‍ഷകമാകും. വൈല്‍ഡ് ഫ്രൂട്ട് ഗാര്‍ഡനും ഏവിയന്‍ സോണും പച്ചത്തുരുത്തിലെ ഒരു പ്രത്യേക സ്ഥലത്ത് നാടന്‍ പഴങ്ങളും സസ്യങ്ങള്‍ വളര്‍ത്തും. ഇവ പക്ഷികളെ ആകര്‍ഷിക്കാന്‍ സഹായിക്കും. പ്രകൃതിദത്ത ജൈവ വൈവിധ്യത്തെ സമ്പന്നമാക്കുക എന്ന ലക്ഷ്യത്തോടെയാണ് പദ്ധതി നടപ്പിലാക്കുന്നത്. ഓര്‍ക്കിഡുകള്‍ സംരക്ഷിക്കുന്നതിനുള്ള ഒരു ഓര്‍ക്കിഡോറിയം സോണ്‍ നിര്‍മ്മിക്കും. നിലവിലുള്ള മരങ്ങള്‍ എപ്പിഫൈറ്റിക് ഓര്‍ക്കിഡുകള്‍ വളര്‍ത്തുന്നതിന് ഉപയോഗപ്പെടുത്തും. വിവിധയിനം ഓര്‍ക്കിഡുകള്‍ വെച്ചുപിടിപ്പിക്കും. കൂടാതെ കുട്ടികള്‍ക്കും മുതിര്‍ന്നവര്‍ക്കുമുള്ള പാര്‍ക്ക്, വ്യത്യസ്ത ഇനം പന്നല്‍ ചെടികള്‍ക്കായി സംരക്ഷണ മേഖല, പച്ചതുരുത്തിനോട് ചേര്‍ന്ന പുഴയില്‍ താമരകളുടെ ഫ്‌ളോട്ടിങ് ഗാര്‍ഡന്‍, ഹെര്‍ബല്‍ ഗാര്‍ഡന്‍, വിവിധ ഇനം വള്ളിചെടികള്‍ ഉള്‍പ്പെടുത്തിയുള്ള ക്ലൈബര്‍ സോണ്‍ തുടങ്ങിയവും പച്ചതുരുത്തില്‍ നിര്‍മ്മിക്കും.
പച്ചത്തുരുത്തിന്റെ വിപുലീകരണ പ്രവര്‍ത്തനവുമായി ബന്ധപ്പെട്ട യോഗം ചോലപ്പുറം പച്ചത്തുരുത്തില്‍ ചേര്‍ന്നു. പച്ചത്തുരുത്തിനെ ഗ്രാമീണ ടൂറിസം പദ്ധതിയില്‍ ഉള്‍പ്പെടുത്തുക, പഠന കേന്ദ്രമാക്കുക എന്നിവയെക്കുറിച്ച് യോഗത്തില്‍ ചര്‍ച്ച ചെയ്തു.
