വിദ്യാർഥികൾ ഉൾപ്പെടെയുള്ള എല്ലാ ഇന്ത്യക്കാരും ഉടൻ കീവ് വിടണമെന്ന യുക്രൈനിലെ ഇന്ത്യൻ എംബസിയുടെ  അറിയിപ്പ് മലയാളികൾ ശ്രദ്ധിക്കണമെന്ന് മുഖ്യമന്ത്രി പിണറായി വിജയൻ അഭ്യർത്ഥിച്ചു. 

ലഭ്യമായ ട്രെയിൻ സർവീസുകളെയോ മറ്റേതെങ്കിലും ഗതാഗത സംവിധാനങ്ങളെയോ  ആശ്രയിക്കാനാണ് നിർദേശം. ഈ അറിയിപ്പിനനുസരിച്ച് നീങ്ങണം.

യുക്രൈനിൽ നിന്ന് തിങ്കളാഴ്ച ഡൽഹിയിൽ  എത്തിയ 36 വിദ്യാർത്ഥികളെ കൂടി ചൊവ്വാഴ്ച കേരളത്തിലെത്തിച്ചു. 

ഇതിൽ 25 പേരെ  രാവിലെ 5.35 ന് പുറപ്പെട്ട വിസ്താര യുകെ 883 ഫ്ലൈറ്റിൽ കൊച്ചിയിൽ എത്തിച്ചു. 11 പേരെ 8.45 ന് തിരുവനന്തപുരത്തേയ്ക്ക് പുറപ്പെട്ട വിസ്താര യുകെ 895 ഫ്ലൈറ്റിലും നാട്ടിലെത്തിച്ചു. 

ചൊവ്വാഴ്ച രണ്ട് ഇൻഡിഗോ ഫ്‌ളൈറ്റുകൾ കൂടി  ഡൽഹിയിലെത്തി.  ബുക്കാറസ്റ്റിൽ നിന്ന് തിങ്കളാഴ്ച രാവിലെ 10.30നും ബുഡാപെസ്റ്റിൽ നിന്ന് 10.55നും പുറപ്പെട്ട  ഫ്‌ളൈറ്റുകളാണ് ഡൽഹിയിൽ എത്തിയത്.  ബുക്കാറസ്റ്റിൽ നിന്ന് ചൊവ്വാഴ്ച രാവിലെ 11.30 ന് ഷെഡ്യൂൾ ചെയ്ത എയർ ഇന്ത്യയുടെ എ 1 1942 വിമാനം രാത്രി 9.20 ന് ഡൽഹിയിലെത്തും.